ଭୁବନେଶ୍ୱର, ୧।୭(ବ୍ୟୁରୋ): କେନ୍ଦ୍ର ସରକାରଙ୍କ ତ୍ରୁଟିଗତ ପରିଚାଳନା, ପେଟ୍ରୋଲ, ଡିଜେଲ, ରନ୍ଧନ ଗ୍ୟାସ, ଖାଇବା ତେଲ ଇତ୍ୟାଦିର ଅହେତକୁ ଦରଦାମ ବୃଦ୍ଧି ପ୍ରସଙ୍ଗ ଲୋକଲୋଚନକୁ ଆଣିବାକୁ ଓଡ଼ିଶା ପ୍ରଦେଶ ଯୁବ କଂଗ୍ରେସ ପ୍ରୟାସ କରୁଛି। ଯୁବ କଂଗ୍ରେସ ପକ୍ଷରୁ ବୁଧବାର ରାଜ୍ୟ ସଭାପତି ସ୍ମୃତି ରଞ୍ଜନ ଲେଙ୍କାଙ୍କ ନେତୃତ୍ୱରେ ଆୟୋଜିତ ୱେବିନାରରେ ରାଜ୍ୟ ପଦାଧିକାରୀ, ସବୁ ଜିଲାର ସଭାପତି ଓ ବିଭିନ୍ନ ବ୍ଲକରୁ ଯୁବ କଂଗ୍ରେସ ନେତାମାନେ ଯୋଗଦେଇଛନ୍ତି। କେନ୍ଦ୍ର ସରକାରଙ୍କ କୋଭିଡ ପରିଚାଳନାରେ ତ୍ରୁଟି ଯଥା ୨ୟ ଲହରରେ ମେଡିକାଲରେ ବେଡ ସମସ୍ୟା, ଅକ୍ସିଜେନର ଓ ଭେଣ୍ଟିଲେଟର ଅଭାବ ପରିଲିକ୍ଷିତ ହୋଇଥିଲା। ଫଳରେ ହଜାର ହଜାର ଲୋକଙ୍କ ଜୀବନ ଯାଇଥିଲା। କିନ୍ତୁ ଏହିସବୁ ସମସ୍ୟା ନ ଥିଲେ ସେମାନଙ୍କୁ ବଞ୍ଚାଯାଇ ପାରିଥାଆନ୍ତା ବୋଲି ସ୍ମୃତି କହିଛନ୍ତି। କରୋନା ପରିଚାଳନାରେ ତ୍ରୁଟିକୁ ଲୋକଙ୍କ ଆଗରେ ରଖିବ ଯୁବ କଂଗ୍ରେସ ରଖିବ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୋଭିଡର ୨ୟ ଲହର ପାଇଁ ପ୍ରସ୍ତୁତ ହୋଇ ନ ଥିଲେ। ଆଗରୁ ବାରମ୍ବାର ରାହୁଲ ଗାନ୍ଧୀ ୨ୟ ଲହରର ପୂର୍ବାନୁମାନ କରି ସତର୍କ କରାଇଥିଲେ ମଧ୍ୟ କେନ୍ଦ୍ର ସରକାର ଏହାକୁ ଗୁରୁତ୍ୱ ଦେଇ ନାହାନ୍ତି। ଆଗକୁ କରୋନାର ୩ୟ ଲହର ଆସିବାର ପୂର୍ବାନୁମାନ କରାଯାଉଥିବା ବେଳେ ସେଥିପାଇଁ ରାଜ୍ୟର ସବୁ ଜିଲା ଏବଂ ବ୍ଲକର ଯୁବ କଂଗ୍ରେସ କର୍ମୀଙ୍କୁ ପ୍ରସ୍ତୁତ ରହିବାକୁ ସ୍ମୃତି କହିଛନ୍ତି।
