କୁଜଙ୍ଗ, ୯ା୧୨ (ଡି.ଏନ୍.ଏ.):ଜଗତ୍ସିଂହପୁର ଜିଲାର କୁଜଙ୍ଗ ବ୍ଲକ ପକ୍ଷରୁ ଯେତେସବୁ କଂକ୍ରିଟ୍ ରାସ୍ତାଘାଟ ଓ ପକ୍କା ଗୃହ ନିର୍ମାଣ ଚାଲିଛି, ସେସବୁ ଲୁଣାବାଲିରେ ହେଉଥିବା ଅଭିଯୋଗ ହେଉଛି। ଏହାକୁ ସାଧାରଣ ଲୋକ ଜାଣିବା କଷ୍ଟକର। ପାରାଦୀପଠାରୁ ୪୮ କିମି ଦୂର ପର୍ଯ୍ୟନ୍ତ ମହାନଦୀରେ ସମୁଦ୍ର ଜୁଆର ପାଣି ପଶୁଥିବାରୁ ନଦୀବାଲି ଲବଣାକ୍ତ ରହୁଛି। ତେଣୁ ପାରାଦୀପ ବନ୍ଦର ତା’ର ସମସ୍ତ ନିର୍ମାଣ କାର୍ଯ୍ୟ ମହାନଦୀର ତାରପୁରଠାରୁ କଟକ ପର୍ଯ୍ୟନ୍ତ ଓ ଜଗତ୍ସିଂହପୁରର ଦେବୀ ନଦୀ ବାଲି ବ୍ୟବହାର କରୁଛି। ପୂର୍ତ୍ତ ଓ କୋଠାବାଡ଼ି ନିର୍ମାଣ ବିଭାଗ ଜଗତ୍ସିଂହପୁର ଜିଲାର ତାରପୁର ଓ ଅନ୍ୟ ବାଲି ସଇରାତ୍ରୁ ବାଲି ଆଣି ବ୍ୟବହାର କରିବାର ନିୟମ କରିଛି। କୁଜଙ୍ଗ ବ୍ଲକ ଅଞ୍ଚଳର ସାଧାରଣ ଲୋକ ନିଜର ଗୃହ ଓ ଅନ୍ୟ ନିର୍ମାଣ କାର୍ଯ୍ୟ ପାଇଁ ତାରପୁରଠାରୁ କଟକ ପର୍ଯ୍ୟନ୍ତ ବାଲି ବ୍ୟବହାର କରୁନାହାନ୍ତି। କାହିଁକିନା ତାରପୁର ପୋଲ ପର୍ଯ୍ୟନ୍ତ ବାଲି ଲବଣାକ୍ତ ରହୁଛି। ମାତ୍ର କୁଜଙ୍ଗ ବ୍ଲକ ପ୍ରଶାସନ ପକ୍ଷରୁ ଯେତେ ସରକାରୀ କାର୍ଯ୍ୟ ହେଉଛି, ପ୍ରାୟତଃ ତହସିଲ ଅନ୍ତର୍ଗତ ବଡ଼ପାଳ ବାଲି ସଇରାତରୁ ଲୁଣା ତଥା ପୋତା ବାଲି ଆଣି ବ୍ୟବହାର କରାଯାଉଛି। ଫଳରେ ନିର୍ମାଣ ହେଉଥିବା ରାସ୍ତାଘାଟ, ଘର ବର୍ଷେ ଦୁଇବର୍ଷ ମଧ୍ୟରେ ନଷ୍ଟ ହୋଇଯାଉଥିବା ଲକ୍ଷ୍ୟ କରାଯାଉଛି।
ସୂଚନାଯୋଗ୍ୟ, ବ୍ଲକର ୮୦% କାମର କାର୍ଯ୍ୟାଦେଶ ବିଭାଗୀୟ ଯନ୍ତ୍ରୀଙ୍କ ନାମରେ ରହୁଛି। ପରୋକ୍ଷରେ ଠିକାଦାରମାନେ ବଡ଼ପାଳ ବାଲିରେ କାମ କରି ପ୍ରଚୁର ମୁନାଫା ଉଠାଉଛନ୍ତି। ଏ ସମ୍ପର୍କରେ ବ୍ଲକ୍ ସହକାରୀ ଯନ୍ତ୍ରୀ ସୂର୍ଯ୍ୟନାରାୟଣ ବାରିକଙ୍କୁ ପଚାରିବାରେ ବ୍ଲକ କାର୍ଯ୍ୟାଳୟର ୧୫ କିମି ବ୍ୟାସାର୍ଦ୍ଧ ଭିତରେ ବାଲି ଆଣି କାମ କରିହେବ। କୁଜଙ୍ଗଠାରୁ ତାରପୁର ୩୫ କିମି ଦୂର ହୋଇଥିବା ବେଳେ ସେ ପର୍ଯ୍ୟନ୍ତ ପାରାଦୀପ ବନ୍ଦର ପରୀକ୍ଷା କରି ଦେଖିଛି ଯେ, ଲୁଣା ବାଲି ପଡୁଛି। ମାତ୍ର ବଡ଼ପାଳର ଦୂରତା ବ୍ଲକ କାର୍ଯ୍ୟାଳୟଠାରୁ ୫ କିମି ହୋଇଥିବା ବେଳେ ଯନ୍ତ୍ରୀମାନେ ନିର୍ମାଣ କାର୍ଯ୍ୟରେ ଏହି ବାଲିର ବ୍ୟବହାରକୁ କିଭଳି ଅନୁମତି ଦେଉଛନ୍ତି ତାହା ପ୍ରଶ୍ନବାଚୀ ସୃଷ୍ଟି କରିଛି। ଅନ୍ୟପକ୍ଷରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀଙ୍କୁ ପଚାରିବାରେ ଯେଉଁ ବାଲି ସଇରାତ୍କୁ ସରକାର ଲିଜ୍ ଦେଇଥିବେ, ସେଠାରୁ ବାଲି ଆସିପାରିବ। ମାତ୍ର ବଡ଼ପାଳ ସଇରାତ୍ ବାଲି ଲୁଣା ହୋଇଥିବାରୁ ତାହା ବ୍ୟବହାର ହେବା କଥା ନୁହେଁ। କିନ୍ତୁ କୁଜଙ୍ଗ ବ୍ଲକ ପକ୍ଷରୁ ନିର୍ମାଣ କାର୍ଯ୍ୟରେ ବଡ଼ପାଳ ବାଲିର ବହୁଳ ବ୍ୟବହାର ସମ୍ପର୍କରେ କହିଥିଲେ ଯେ, ତାଙ୍କ ନିକଟକୁ ଜିଲାନାସୀରୁ ଗୋଟିଏ ଅଭିଯୋଗ ଆସିଥିଲା, ସେ କାମକୁ ବନ୍ଦ କରି ଦିଆଯାଇଛି। ଆଉ କେଉଁଠୁ ଅଭିଯୋଗ ଆସିନାହିଁ ବା ବାଲିର ବ୍ୟବହାର ସମ୍ପର୍କରେ ଯନ୍ତ୍ରୀମାନଙ୍କ ସହ କଥା ହେଲା ପରେ ପ୍ରକୃତ ଘଟଣା କ’ଣ ସେ କହିବେ ବୋଲି କହିଛନ୍ତି। ବାସ୍ତବରେ କୁଜଙ୍ଗ ବ୍ଲକରେ ଲୁଣାବାଲି ବ୍ୟବହାର ସମ୍ପର୍କରେ ଏକ ଉଚ୍ଚସ୍ତରୀୟ ତଦନ୍ତ କରାଗଲେ ସତ୍ୟତା ଜଣାପଡିବ ବୋଲି ମାଟି ସୁରକ୍ଷା ମଞ୍ଚର ସଂଯୋଜକ ହୃଷୀକେଶ ନାଥ ଦାବି କରିଛନ୍ତି।
