ବେଙ୍ଗାଲୁରୁ,୬।୫ : କର୍ନାଟକ ବିଧାନସଭା ନିର୍ବାଚନ ପାଇଁ ପ୍ରଚାର ଜୋର ଧରିଛି। ଭାଜପା ଓ କଂଗ୍ରେସର ବରିଷ୍ଠ ନେତାମାନେ ପରସ୍ପର ଉପରେ ଆରୋପ ପ୍ରତ୍ୟାରୋପ ଜାରି ରଖିଛନ୍ତି। ଏହି କ୍ରମରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କଂଗ୍ରେସକୁ ନିଷିଦ୍ଧ ପପୁଲାର ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ) ର ଏଜେଣ୍ଡା ଉପରେ କାର୍ଯ୍ୟ କରୁଥିବା ଅଭିଯୋଗ କରିଛନ୍ତି।
କଂଗ୍ରେସ ଆପତ୍ତିଜନକ ରାଜନୀତି କରୁଛି। ଦଳ ସ୍ବାଧୀନତା ସଂଗ୍ରାମୀ ତଥା ହିନ୍ଦୁତ୍ୱ ଭାବନାଧାରୀ ଭି.ଡି ସାବରକର ତଥା ପ୍ରଭୁ ହନୁମାନଙ୍କୁ ଅପମାନିତ କରିଛି। ଭୋଟ ବ୍ୟାଙ୍କ ପାଇଁ କଂଗ୍ରେସ ଦଳ ବିଭାଜନ ରାଜନୀତି କରୁଛି। ସର୍ବପ୍ରଥମେ, ଦଳ ଚାରି ପ୍ରତିଶତ ମୁସଲମାନ ସଂରକ୍ଷଣ ପ୍ରଦାନ କରିଥିଲା। ଦଳ ଜାଣିଥିଲା ଭାରତୀୟ ସମ୍ବିଧାନ ଧର୍ମ ଆଧାରରେ ସଂରକ୍ଷଣ ପ୍ରଦାନ କରେ ନାହିଁ। କିନ୍ତୁ ଏହି ଅସାମ୍ବିଧାନିକ ମୁସଲିମ ସଂରକ୍ଷଣକୁ ରଦ୍ଦ କରି ଭାଜପା ଲିଙ୍ଗାୟତ ଏବଂ ଭୋକାଲିଗାସ ପାଇଁ କୋଟା ଦୁଇ ପ୍ରତିଶତ ବୃଦ୍ଧି କରିଛି।
ବେଲଗାଭି ଜିଲାରେ ଏକ ସାଧାରଣ ସଭାକୁ ସମ୍ବୋଧିତ କରି ଶାହା କହିଛନ୍ତି ଯଦି କଂଗ୍ରେସ କ୍ଷମତାକୁ ଆସେ ତେବେ ମୁସଲମାନ ସଂରକ୍ଷଣକୁ ଫେରାଇ ଆଣିବ ଏବଂ ଚାରି ପ୍ରତିଶତ ପରିବର୍ତ୍ତେ ସଂରକ୍ଷଣକୁ ୬ ପ୍ରତିଶତକୁ ନେଇଯିବେ ପ୍ରତିଶ୍ରୁତି ଦେଇଛି। ତେଣୁ ଭୋଟର ଏହାର ଉଚିତ ଜବାବ ଦେବା ଜରୁରୀ।
ଭାଜପା ଭୋଟ ବ୍ୟାଙ୍କ ରାଜନୀତିରେ ଲିପ୍ତ ନାହିଁ। ଯିଏ ଜାତୀୟ ବିରୋଧୀ କାର୍ଯ୍ୟ କରିବ ସେ ଜେଲକୁ ଯିବ। ୭୦ ବର୍ଷ ଧରି ଅଯୋଧ୍ୟାରେ ରାମ ମନ୍ଦିର ନିର୍ମାଣକୁ ଅନୁମତି ନ ଦେଇ ପ୍ରଭୁ ରାମଙ୍କୁ ତାଲା ପକାଇ କଂଗ୍ରେସ ରଖିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ଷମତାକୁ ଆସିବା ପରେ ରାମ ମନ୍ଦିର ପାଇଁ ମୂଳଦୁଆ ପକାଇଥିଲେ। କଂଗ୍ରେସର ଜଣେ ବରିଷ୍ଠ ନେତା ପଚାରିଥିଲେ ବଜରଙ୍ଗବାଲିଙ୍କ ଜନ୍ମ ତାରିଖ କ’ଣ, ଆପଣଙ୍କ ପାଖରେ ଜନ୍ମ ପ୍ରମାଣପତ୍ର ଅଛି କି? ତାଙ୍କର ଜନ୍ମ ତାରିଖ ସାରା ଦେଶ ଜାଣେ। ଏହା ହନୁମାନ ଜୟନ୍ତୀ ଭାବେ ପାଳନ କରାଯାଏ। କଂଗ୍ରେସ କେବଳ ତୁଷ୍ଟିକରଣ ରାଜନୀତି କରିଥାଏ ବୋଲି ଶାହା ଅଭିଯୋଗ କରିଛନ୍ତି।
