ଭୁବନେଶ୍ୱର,୯ା୮(ବ୍ୟୁରୋ):ଅଖିଳ ଭାରତ ଜାତୀୟ କଂଗ୍ରେସ କମିଟି(ଏଆଇସିସି)ର ନିର୍ଦ୍ଦେଶାନୁସାରେ ଓଡ଼ିଶା ପ୍ରଦେଶ କଂଗ୍ରେସ ଆସନ୍ତା ଅଗଷ୍ଟ ୯ କ୍ରାନ୍ତି ଦିବସରୁ ଅଗଷ୍ଟ ୧୪ ତାରିଖ ପର୍ଯ୍ୟନ୍ତ ରାଜ୍ୟର ପ୍ରତ୍ୟେକ ଜିଲାରେ ୭୫ କି.ମି. ପର୍ଯ୍ୟନ୍ତ ପଦଯାତ୍ରା କରିବ। ସୋମବାର କଂଗ୍ରେସ ଭବନରେ ଆୟୋଜିତ ଖବରଦାତା ସମ୍ମିଳନୀରେ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଶରତ ପଟ୍ଟନାୟକ ଏହି ସୂଚନା ଦେଇଛନ୍ତି। ସେ କହିଛନ୍ତି, ସ୍ବାଧୀନତା ପ୍ରାପ୍ତି ପାଇଁ ମହାମତ୍ା ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ବମ୍ବେ ଅଧିବେଶନରେ ଭାରତ ଛାଡ଼ ଆନ୍ଦୋଳନ ଡାକରା ଦିଆଗଲା। ‘କର ବା ମର’ ନିଷ୍ପତ୍ତିିକୁ ଗ୍ରହଣ କରି ପଣ୍ଡିତ ଜବାହରଲାଲ ନେହେରୁ, ସର୍ଦ୍ଦାର ବଲ୍ଲଭ ଭାଇ ପଟେଲ, ସୁଭାଷ ଚନ୍ଦ୍ର ବୋଷ୍, ମୌଲାନା ଅବୁଲ କଲାମ ଆଜାଦ, ମହମ୍ମଦ ଅଲ୍ଲୀ ଜିନ୍ନା, ଅଶୋକ ମେହେଟ୍ଟା, ଚକ୍ରବର୍ତ୍ତୀ ରାଜଗୋପାଳ ଆଚାରୀ, ଡକ୍ଟର ରାଜେନ୍ଦ୍ର ପ୍ରସାଦ ପ୍ରମୁଖ ବହୁ ତୁଙ୍ଗନେତା ତଥା ଭାରତବର୍ଷର ଆବାଳବୃଦ୍ଧବନିତା ଭାରତ ଛାଡ଼ ଆନ୍ଦୋଳନରେ ଝାସ ଦେଇଥିଲେ। ସ୍ବାଧୀନତା ପରେ ପରେ ଦେଶରେ ଗୋଟିଏ ଛୁଞ୍ଚତ୍ କାରଖାନା ମଧ୍ୟ ନ ଥିଲା। କିନ୍ତୁ ଦୂରଦର୍ଶୀ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ଯୋଗୁ ଭାରତବର୍ଷର ବହୁମୁଖୀ ନଦୀବନ୍ଧ ଯୋଜନା କରାଯାଇଥିଲା। ୧୯୫୦ରେ ଆଇଆଇଟି ଏବଂ ୧୯୫୬ରେ ଏମ୍ସ, ୧୯୬୧ରେ ଆଇଆଇଏମ୍ ପ୍ରତିଷ୍ଠା କରାଯାଇଥିଲା। ସେହିଭଳି ୧୯୬୪ରେ ଭେଲ ପ୍ରତିଷ୍ଠା, ୧୯୭୪ରେ ପରମାଣୁ ବୋମା ପରୀକ୍ଷା କରାଯାଇଥିଲା। ୧୯୬୯ରେ ଇସ୍ରୋ, ୧୯୫୮ରେ ଡିଆର୍ଡିଓ, ୧୯୬୩ରେ ଥୁମ୍ବା ରକେଟ ଲଞ୍ଚତ୍ଂ ପ୍ରତିଷ୍ଠା କରାଯାଇଥିଲା। ଖାଦ୍ୟଶସ୍ୟ କ୍ଷେତ୍ରରେ ସ୍ବାବଲମ୍ବୀ ହେବା ପାଇଁ ସବୁଜ ବିପ୍ଳବର ଆହ୍ବାନ ଦିଆଯାଇଥିଲା। ଦୁଗ୍ଧକ୍ଷେତ୍ରରେ ସ୍ବାବଲମ୍ବୀ ହେବା ପାଇଁ ଶ୍ୱେତ ବିପ୍ଳବର ଡାକରା ଦିଆଯାଇଥିଲା। ମାତ୍ର ଗତ ୮ ବର୍ଷ ଭିତରେ ଜାତୀୟ ସମ୍ପତ୍ତି ବିକିବା ଛଡ଼ା ଗୋଟିଏ ବି ଜାତୀୟ ସମ୍ପଦ ସୃଷ୍ଟି କରିବାରେ ନଜିର ନାହିଁ। ଠିକ୍ ସେହିଭଳି ଦୀର୍ଘ ୨୨ ବର୍ଷର ଶାସନ ଭିତରେ ଶିକ୍ଷା, ସ୍ବାସ୍ଥ୍ୟ, କୃଷି ଆଦି କ୍ଷେତ୍ରରେ ଓଡ଼ିଶା ଆଜି ବହୁପଛରେ।
ଡାକ୍ତରଖାନା ଅଛି ଡାକ୍ତର ନାହାନ୍ତି, ସ୍କୁଲ୍ ଅଛି ଶିକ୍ଷକ ନାହାନ୍ତି। ୭୫ ବର୍ଷର ସ୍ବାଧୀନତା ପ୍ରାପ୍ତି ପରେ ଏ ସରକାର ଜନସାଧାରଣଙ୍କ ସ୍ବାର୍ଥରକ୍ଷା କରିବାରେ ବିଫଳ ହୋଇଛନ୍ତି। ଦେଶକୁ ଜାତି, ଧର୍ମ ନାମରେ ଭାଗ ଭାଗ କରାଯାଉଛି। ହିଂସା, ଦ୍ୱେଷ, ଘୃଣାର ମଞ୍ଜି ପୋତାଯାଉଛି। ଏଭଳି ଭାରତବର୍ଷର ସ୍ବପ୍ନ ଆମ ମହାମନୀଷୀମାନେ ଦେଖି ନ ଥିଲେ। ଜାତିର ପିତା ମହାତ୍ମା ଗାନ୍ଧୀଙ୍କୁ ଅସମ୍ମାନିତ କରାଯାଉଛି। ତାଙ୍କ ଫଟୋଚିତ୍ର ରଖି ତା’ଉପରକୁ ଗୁଳି ବର୍ଷଣ କରୁଛନ୍ତି। ତ୍ରିରଙ୍ଗା ଆମ ହୃଦୟରେ ରହିଛି ଏବଂ ତ୍ରିରଙ୍ଗା ପ୍ରତି ଆମର ଯଥେଷ୍ଟ ସମ୍ମାନ ଅଛି। ତ୍ରିରଙ୍ଗା ଆମର ଜାତୀୟ ପତାକା। ଆମେ ସବୁଦିନ ଏହାକୁ ଉଡ଼ାଉଛୁ। କିନ୍ତୁ ୧୯୪୭ ମସିହାଠାରୁ ଦୀର୍ଘ ୫୨ ବର୍ଷ ଧରି ଆରଏସ୍ଏସ୍ ଜାତୀୟ ପତାକାକୁ କେବେହେଲେ ନିଜ କାର୍ଯ୍ୟାଳୟରେ ଉଡ଼ାଇ ନାହିଁ। ଜାତୀୟ ସଙ୍ଗୀତକୁ ମଧ୍ୟ କେବେ ଗାନ କରନ୍ତିନାହିଁ। ଏମାନଙ୍କ ପାଖରୁ ଜାତୀୟତାବାଦ୍ ଶିଖିବାର କିଛି ଆବଶ୍ୟକତା ନାହିଁ ବୋଲି ପିସିସି ସଭାପତି କହିଛନ୍ତି। ଏହି ଖବରଦାତା ସମ୍ମିଳନୀରେ ଏଆଇସିସି ସମ୍ପାଦକ ତଥା ଓଡ଼ିଶା ସହପ୍ରଭାରୀ ଜି. ରୁଦ୍ର ରାଜୁ, ପିସିସି ମିଡିଆ ସେଲ୍ ଆବାହକ ସତ୍ୟପ୍ରକାଶ ନାୟକ ଉପସ୍ଥିତ ଥିଲେ।
