କେନ୍ଦ୍ରାପଡ଼ା, ୧୫ା୭ (ଜଗନ୍ନାଥ ଧଳ): ସରକାରୀ ଯୋଜନାର ଅପବ୍ୟବହାର ହେଉଛି। ରାଜନୈତିକ ବାଛବିଚାର ଚାଲିଛି। ଯୋଜନାରେ ବହୁ ଅନିୟମିତା ବିଭାଗୀୟ ଓ ପ୍ରଶାସନିକ ଅଧିକାରୀଙ୍କ ଦୃଷ୍ଟିକୁ ନିଆ ଯାଉଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉନାହିଁ। ଫଳରେ ସାଧାରଣ ଲୋକ ସୁଫଳ ପାଇବା ପରିବତ୍ତେ ରାଜନୈତିକ ଚାପରେ ଅଣନିଃଶ୍ୱସୀ ହୋଇଛନ୍ତି। ଏହିପରି ଅଭିଯୋଗ ଆଣି କେନ୍ଦ୍ରାପଡ଼ା ବ୍ଲକ ଓ ନଗର କଂଗ୍ରେସ ପକ୍ଷରୁ ଶୁକ୍ରବାର ପଞ୍ଚାୟତ ସମିତି କାର୍ଯ୍ୟାଳୟ ଶୁକ୍ରବାର ଘେରାଉ କରିଛନ୍ତି। ପୂର୍ବତନ ମନ୍ତ୍ରୀ ତଥା ବରିଷ୍ଠ ନେତା ଗଣେଶ୍ୱର ବେହେରାଙ୍କ ନେତୃତ୍ୱରେ ହୋଇଥିବା ଏହି ବିକ୍ଷୋଭ ଓ ପ୍ରତିବାଦ ସଭାରେ ରାଜ୍ୟ ସରକାର, ସ୍ଥାନୀୟ ଶାସକ ଦଳର ଲୋକ ପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ସମାଲୋଚନା କରିଛନ୍ତି। ସଭାରେ ଜିଲା ସଭାପତି ଅଂଶୁମାନ ମହାନ୍ତି, ପୂର୍ବତନ ବିଧାୟକ ଦେବେନ୍ଦ୍ର ଶର୍ମା, ଚିନ୍ମୟ ପ୍ରସାଦ ବେହୁରା, ବରିଷ୍ଠ ନେତା ପ୍ରଫୁଲ୍ଲ ଦାସ, ରତିକାନ୍ତ କାନୁନ୍ଗୋ, ଜୟନ୍ତ ମହାନ୍ତି, ବ୍ଲକ ସଭାପତି ଚିତ୍ରସେନ ପରିଡା, ନଗର ସଭାପତି ରାକେଶ ମହାନ୍ତି ପ୍ରମୁଖ ଭାଗ ନେଇଥିଲେ। ସେମାନେ ଦର୍ଶାଇଥିଲେ ଯେ, କେନ୍ଦ୍ରାପଡ଼ା ଜିଲାର ଆର୍ଥିକ ବିକାଶ ରାଜ୍ୟର ଅନ୍ୟ ଜିଲା ତୁଳନାରେ ବହୁ ପଛୁଆ ଅଛି। ସରକାରୀ ଯୋଜନାକୁ ଶାସକ ଦଳର ଲୋକ ପ୍ରତିନିଧି ହଡ଼ପ କରୁଛନ୍ତି। ସାଧାରଣ ଲୋକ ଖାଦ୍ୟ, ବାସସ୍ଥାନ, ପାନୀୟ ଜଳ ପରି ମୌଳିକ ସୁବିଧା ପାଇ ପାରୁନାହାନ୍ତି। ରାଜନୈତିକ ଆକ୍ରୋଶ ରଖାଯାଇ ଶାସକ ଦଳର ଲୋକ ପ୍ରତିନିଧି କାର୍ଯ୍ୟ କରୁଛନ୍ତି। ସେହିପରି ଉନ୍ନୟନ ଯୋଜନା ଅର୍ଥକୁ ପ୍ରଶାସନିକ ଅଧିକାରୀ, ଠିକା ସଂସ୍ଥା ଓ ସ୍ଥାନୀୟ ଶାସକ ଦଳର ଲୋକ ଭାଗବଣ୍ଟା କରି ନେଉଛନ୍ତି। ଫଳରେ ଆଖିବୁଜା ଦୁର୍ନୀତି ଯୋଗୁ ଯୋଜନା ଶ୍ରୀହୀନ ହେଉଛି। ଏହି ବିକ୍ଷୋଭ ପୂର୍ବରୁ ଜିଲା କଂଗ୍ରେସର ଏକ ରାଲି ଗରାପୁରଠାରୁ ବ୍ଲକ ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା।
