ଚଣ୍ଡିଗଡ଼,୨୮।୯: ପଞ୍ଜାବ କଂଗ୍ରେସ ସଭାପତି ପଦରୁ ଇସ୍ତଫା ଦେଇଛନ୍ତି ନବଜୋତ ସିଂ ସିଦ୍ଧୁ। ସେ ନିଜର ଇସ୍ତଫା ପତ୍ର ଦଳର ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ପଠାଇଛନ୍ତି। ପଞ୍ଜାବର ଭବିଷ୍ୟତ ସହ କୌଣସି ସାଲିସ କରିପାରିବି ନାହିଁ ବୋଲି ସିଦ୍ଧୁ କହିଥିବା ବେଳେ ଏବେ ପ୍ରତିକ୍ରିୟା ରଖିଛନ୍ତି କଂଗ୍ରେସ ଏମ୍ପି ତଥା କ୍ୟାପ୍ଟେନ୍ ଅମରିନ୍ଦର ସିଂହଙ୍କ ସ୍ତ୍ରୀ ପ୍ରୀତି କୌର।
ସିଦ୍ଧୁଙ୍କୁ ବାଳୁଙ୍ଗା ପିଲା ପରି ନୁହେଁ ବରଂ ଦଳର ସଭାପତି ଭଳି ଆଚରଣ କରିବାର ଥିଲା। ସିଦ୍ଧୁଙ୍କ ବିଷୟରେ ସମସ୍ତଙ୍କୁ ଜଣା। ସେ ବିଷୟରେ ବେଶି କିଛି କହିବା ଆବଶ୍ୟକ ନହେଁ। କିନ୍ତୁ ଗୋଟିଏ କଥା ସ୍ପଷ୍ଟ ଯେ, ସିଦ୍ଧୁଙ୍କ ଏହି ପଦକ୍ଷେପ ପଞ୍ଜାବ କଂଗ୍ରେସର ଭବିଷ୍ୟତ ସହ ସାଲିସ ହୋଇଛି ବୋଲି ସେ କହିଛନ୍ତି।
ପ୍ରକାଶ ଯେ, ୨୦୧୭ ବିଧାନସଭା ନିର୍ବାଚନ ପୂର୍ବରୁ ଭାଜପାରୁ କଂଗ୍ରେସକୁ ଆସିଥିଲେ ସିଦ୍ଧୁ। ପ୍ରାୟ ଦୁଇ ମାସ ପୂର୍ବେ ଅର୍ଥାତ ଜୁଲାଇ ୨୩ରେ ସିଦ୍ଧୁ ପଞ୍ଜାବ କଂଗ୍ରେସର ସଭାପତି ଭାବେ ଦାୟିତ୍ୱ ଗ୍ରହଣ କରିଥିଲେ। ଏହାକୁ ମାତ୍ର ୭୨ ଦିନ ହୋଇଥିବା ବେଳେ ସେ ଇସ୍ତଫା ଦେଇ ଚର୍ଚ୍ଚାର ପରିସରକୁ ଆସିଛନ୍ତି। ଏନେଇ ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର କହିଛନ୍ତି, ସିଦ୍ଧୁ ଜଣେ ସ୍ଥିର ବ୍ୟକ୍ତି ନୁହନ୍ତି ବୋଲି କହିଥିଲି। ଏଥିଯୋଗୁ ତାଙ୍କୁ କୌଣସି କାର୍ଯ୍ୟଭାର ଦେବା ଉଚିତ ନୁହେଁ।
