ନୂଆଦିଲ୍ଲୀ,୨୩।୧: କଂଗ୍ରେସର ଭାରତ ଯୋଡୋ ଯାତ୍ରା ବର୍ତ୍ତମାନ ଜମ୍ମୁ-କଶ୍ମୀରରେ ଜାରି ରହିଛି। ଇତିମଧ୍ୟରେ ଜମ୍ମୁ-କଶ୍ମୀରର ଉରି ସେକ୍ଟରରେ ଆତଙ୍କବାଦୀ ଆକ୍ରମଣ ପରେ ୨୦୧୬ରେ ଭାରତ ପାକିସ୍ତାନ ବିରୋଧରେ ହୋଇଥିବା ସର୍କିକାଲ ଷ୍ଟ୍ରାଇକ୍ ଉପରେ ପ୍ରଶ୍ନ ଉଠାଇଛନ୍ତି ବରିଷ୍ଠ କଂଗ୍ରେସ ନେତା ଦିଗ୍ବିଜୟ ସିଂ। ଜମ୍ମୁରେ ସୋମବାର ଉଦ୍ବୋଧନ ଦେଇ କଂଗ୍ରେସ ନେତା କହିଛନ୍ତି, ସର୍ଜିକାଲ ଷ୍ଟ୍ରାଇକ୍ରେ ଅନେକ ଆତଙ୍କବାଦୀଙ୍କୁ ନିପାତ କରିଥିବା କେନ୍ଦ୍ର ସରକାର ଦାବି କରୁଛନ୍ତି, ଯାହାର କୌଣସି ପ୍ରମାଣ ନାହିଁ। ଭାଜପାର ଶାସନ ମିଥ୍ୟା ଉପରେ ଆଧାରିତ ବୋଲି ଦିଗ୍ବିଜୟ କହିବା ସହ ୨୦୧୯ରେ ପୁଲ୍ଓ୍ବାମାରେ ଆତଙ୍କବାଦୀ ଆକ୍ରମଣରେ ୪୪ ସିଆର୍ପିଏଫ୍ ଯବାନ ଶହୀଦ ହେବା ଘଟଣାରେ କେନ୍ଦ୍ରକୁ ଟାର୍ଗେଟ କରିଥିଲେ। ଉକ୍ତ ଅଞ୍ଚଳ ସମ୍ବେଦନଶୀଳ ହୋଇଥିବାରୁ ଯବାନମାନେ ବିମାନରେ ଶ୍ରୀନଗରରୁ ଦିଲ୍ଲୀ ଯିବା ପାଇଁ ସିଆର୍ପିଏଫ୍ କେନ୍ଦ୍ରକୁ ଜଣାଇଥିଲା। କେନ୍ଦ୍ର ସରକାର ଏହାକୁ ଅଗ୍ରାହ୍ୟ କରିଦେଇଥିଲେ। ଆକ୍ରମଣକାରୀ ଥିବା ଯାନକୁ ଉପଯୁକ୍ତ ଭାବେ ଯାଞ୍ଚ କରାଯାଇଥିଲେ ପୁଲ୍ଓ୍ବାମା ଆକ୍ରମଣକୁ ଏଡ଼ାଇ ଦିଆଯାଇପାରିଥାନ୍ତା ବୋଲି ଦିଗ୍ବିଜୟ କହିଛନ୍ତି। ପୁଲଓ୍ବାମା ଆକ୍ରମଣ ଲାଗି ଆତଙ୍କବାଦୀମାନେ ୩୦୦ କିଲୋଗ୍ରାମ ଆର୍ଡିଏକ୍ସ କେଉଁଠୁ ପାଇଲେ ବୋଲି ସେ ପ୍ରଶ୍ନ କରିଛନ୍ତି। ଆତଙ୍କବାଦୀଙ୍କ ସହ ଡିଏସ୍ପି ଦେବେନ୍ଦ୍ର ସିଂ ଧରାପଡ଼ିଥିବା ବେଳେ ତାଙ୍କୁ କାହିଁକି ଛାଡ଼ିଦିଆଗଲା ବୋଲି କଂଗ୍ରେସ ନେତା କହିଛନ୍ତି। ଭାରତର ସଶସ୍ତ୍ର ବଳ ଉପରେ ପ୍ରଶ୍ନ ଉଠାଇଥିବା ଦିଗ୍ବିଜୟଙ୍କୁ ଭାଜପା ସମାଲୋଚନା କରିଛି।
