ଚେନ୍ନାଇ,୬।୫: ତାମିଲନାଡୁରେ ନୂତନ ସରକାର ଗଠନ ପାଇଁ ବିଜୟଙ୍କ ଟିଭିକେକୁ ସମର୍ଥନ ଜଣାଇ କଂଗ୍ରେସ ବୁଧବାର ରାଜ୍ୟରେ ଡିଏମକେ ସହିତ ଦୀର୍ଘକାଳୀନ ମେଣ୍ଟ ଭାଙ୍ଗି ଦେଇଛି। କଂଗ୍ରେସ କହିଛି ଟିଭିକେ ସହିତ ଏହାର ମେଣ୍ଟ “କେବଳ ଏହି ସରକାର ଗଠନ ପାଇଁ ନୁହେଁ, ବରଂ ସ୍ଥାନୀୟ ସଂସ୍ଥା ସଂଗଠନ, ଲୋକସଭା ଏବଂ ରାଜ୍ୟସଭା ପାଇଁ ଭବିଷ୍ୟତରେ ନିର୍ବାଚନ ପାଇଁ ମଧ୍ୟ।”
ତାମିଲନାଡୁରେ କଂଗ୍ରେସ ଏବଂ ଡିଏମକେ ମଧ୍ୟରେ ମେଣ୍ଟ ଶେଷ ହୋଇଛି। ଏହି ଖବର ଆମଠାରୁ ନୁହେଁ, ବରଂ କଂଗ୍ରେସ ଦଳର ଏକ ଏକ୍ସ-ପୋଷ୍ଟରୁ ପ୍ରକାଶ ପାଇଛି। ଏହି ରାଜନୈତିକ ପରିବର୍ତ୍ତନ ମଧ୍ୟରେ, ଟିଭିକେ ମୁଖ୍ୟ ବିଜୟଙ୍କ ପାଇଁ ସରକାର ଗଠନ କରିବାର ପଥ ବହୁତ ସହଜ ହୋଇଯାଇଛି। ଟିଭିକେ ଅଧ୍ୟକ୍ଷ ବିଜୟ ଆନୁଷ୍ଠାନିକ ଭାବରେ କଂଗ୍ରେସର ସମର୍ଥନ ମାଗିଥିଲେ, ଯାହା ପରେ ତାମିଲନାଡୁ କଂଗ୍ରେସ କମିଟି ଏବଂ କଂଗ୍ରେସ ବିଧାୟକ ଦଳ (ସିଏଲପି) ରାଜ୍ୟରେ ସରକାର ଗଠନ ପାଇଁ ଟିଭିକେକୁ ସମର୍ଥନ କରିବାକୁ ନିଷ୍ପତ୍ତି ନେଇଥିଲେ। କଂଗ୍ରେସ ତାର ବିବୃତ୍ତିରେ କହିଛି ଯେ ତାମିଲନାଡୁର ଲୋକମାନେ, ବିଶେଷକରି ଯୁବପିଢ଼ି, ଏକ ଧର୍ମନିରପେକ୍ଷ, ପ୍ରଗତିଶୀଳ ଏବଂ କଲ୍ୟାଣକାରୀ ସରକାରଙ୍କ ସପକ୍ଷରେ ସ୍ପଷ୍ଟ ଜନାଦେଶ ଦେଇଛନ୍ତି।
କଂଗ୍ରେସ ଏହା ମଧ୍ୟ ସ୍ପଷ୍ଟ କରିଛି ଯେ ଏହାର ସମର୍ଥନ ସମ୍ପୂର୍ଣ୍ଣ ନିଃସର୍ତ୍ତ ରହିବ ନାହିଁ। ଦଳ କହିଛି ଯେ ଟିଭିକେ ଭାରତୀୟ ସମ୍ବିଧାନର ମୂଲ୍ୟବୋଧରେ ବିଶ୍ୱାସ କରୁନଥିବା କୌଣସି ସାମ୍ପ୍ରଦାୟିକ ଶକ୍ତିକୁ ମେଣ୍ଟରେ ସାମିଲ କରିବ ନାହିଁ। ଏହି ସର୍ତ୍ତ କଂଗ୍ରେସର ବିଚାରଧାରା ଏବଂ ଏହାର ଧର୍ମନିରପେକ୍ଷ ପ୍ରତିଛବିକୁ ଦୃଷ୍ଟିରେ ରଖି ରଖାଯାଇଛି। ଏହି ନୂତନ ରାଜନୈତିକ ସମୀକରଣ ଅନୁଯାୟୀ, କଂଗ୍ରେସ ଏବଂ ଟିଭିକେ ତାମିଲନାଡୁରେ ଏକ ସ୍ଥିର ଏବଂ ଲୋକାଭିମୁଖୀ ସରକାର ପ୍ରଦାନ କରିବା ପାଇଁ ଏକାଠି କାମ କରିବାକୁ ପ୍ରତିଶ୍ରୁତି ଦେଇଛନ୍ତି। ଏହି ମେଣ୍ଟର ଉଦ୍ଦେଶ୍ୟ କେବଳ ସରକାର ଗଠନ କରିବା ନୁହେଁ ବରଂ ଭବିଷ୍ୟତରେ ସ୍ଥାନୀୟ ସଂସ୍ଥା ନିମର୍ବାଚନ, ଲୋକସଭା ଏବଂ ରାଜ୍ୟ ସଭା ନିର୍ବାଚନ ଏକାଠି ଲଢ଼ିବା ମଧ୍ୟ।
