ଚିତ୍ରଦୁର୍ଗ,୮ ।୧: କର୍ନାଟକର ଚିତ୍ରଦୁର୍ଗରେ ରବିବାର କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖର୍ଗେ କେନ୍ଦ୍ର ସରକାରଙ୍କ ଉପରେ ଖୁବ୍ ବର୍ଷିଛନ୍ତି । ସରକାରୀ ପଦବି ଖାଲି ରଖିଥିବା ଅଭିଯୋଗ କରି ମଲ୍ଲିକାର୍ଜୁନ ଖର୍ଗେ କହିଛନ୍ତି, ୩୦ ଲକ୍ଷ ସରକାରୀ ପଦବୀ ଖାଲି ରହିଛି, ପ୍ରଧାନମନ୍ତ୍ରୀ ମୋଦି ତାହାକୁ ପୂରଣ କରୁ ନାହାନ୍ତି, କାହିଁକି? ଆମେ ଏହା ପ୍ରଶ୍ନ କରିବା ଉଚିତ । ୧୫ ଲକ୍ଷ ଚାକିରି ଏସସି-ଏସଟିଙ୍କ ପାଇଁ ସଂରକ୍ଷିତ ରହିଛି, ଯଦି ଗରିବଙ୍କୁ ଏହାର ଲାଭ ମିଳନ୍ତା ତା’ପରେ ସେମାନେ କେନ୍ଦ୍ରକୁ ବାହାର କରିଦେବେ । ସେଥିପାଇଁ କେନ୍ଦ୍ର ସରକାର ଖାଲି ପଦକୁ ପୂରଣ କରୁ ନାହାନ୍ତି ।
ଚିତ୍ରଦୁର୍ଗରେ ବିଭିନ୍ନ ପ୍ରସଙ୍ଗକୁ ନେଇ ଖର୍ଗେ ରାଜ୍ୟ ଓ କେନ୍ଦ୍ର ସରକାରଙ୍କ ଉପରେ ଖୁବ୍ ବର୍ଷିଛନ୍ତି । କଂଗ୍ରେସ ଅଧ୍ୟକ୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରି କହିଛନ୍ତି, ଭାଜପା ସଦସ୍ୟ ମୋଦିଙ୍କୁ ଭଗବାନ ବୋଲି କହୁଛନ୍ତି ଓ ତାଙ୍କୁ ଭଗବାନ ବୋଲି ମାନୁଛନ୍ତି । ଏହା ଏକଛତ୍ରବାଦୀ ଶାସନ ବ୍ୟତୀତ ଆଉ କିଛି ନୁହେଁ । ଏହାକୁ ଦୂର କରିବାର ଆବଶ୍ୟକତା ରହିଛି । ଖର୍ଗେ ଏହା ପୂର୍ବରୁ ଶୁକ୍ରବାର ରାମ ମନ୍ଦିରର ଉଦଘାଟନ ତାରିଖ ଘୋଷଣା କରିବାକୁ ନେଇ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ଉପରେ ପ୍ରଶ୍ନ ଉଠାଇଥିଲେ ।
