ଧାମନଗର, ୧୦ା୮(ଡି.ଏନ.ଏ.)-କ୍ରାନ୍ତି ଦିବସ ଉପଲକ୍ଷେ ଭଦ୍ରକ ଜିଲା ଧାମନଗର ବ୍ଲକର ୩ଜଣ ବରିଷ୍ଠ ସ୍ବାଧୀନତା ସଂଗ୍ରାମୀଙ୍କୁ ସମ୍ବର୍ଦ୍ଧିତ କରାଯାଇଛି। ସଂଗ୍ରାମୀ ରାମହରି ଗୋସ୍ବାମୀ, ବ୍ରଜକିଶୋର ରାଉତ ଏବଂ ଗୌରିଶ୍ୟାମ ଗୋସ୍ବାମୀଙ୍କୁ ରାଷ୍ଟ୍ରପତିଙ୍କ ଦ୍ୱାରା ପ୍ରଦତ୍ତ ମାନପତ୍ର ଓ ଉପଢୌକନ ଜିଲାପାଳଙ୍କ ଦ୍ୱାରା ପ୍ରଦାନ କରାଯାଇଛି।
ବରିଷ୍ଠ ସଂଗ୍ରାମୀ ଭାବେ ଧାମନଗର ବ୍ଲକର ଏହି ୩ଜଣ ସ୍ବାଧୀନତା ସଂଗ୍ରାମୀଙ୍କୁ ରାଷ୍ଟ୍ରପତି ପୁରସ୍କାର ପାଇଁ ମନୋନୀତ କରାଯାଇଥିଲା। କୋଭିଡ୍ କାରଣରୁ ସେମାନଙ୍କୁ ଦିଲ୍ଲୀ ଯିବା ପାଇଁ ଅନୁମତି ମିଳି ନ ଥିଲା। ସେମାନଙ୍କ ନିକଟରେ ପ୍ରଶାସନ ପହଞ୍ଚି ସମ୍ମାନିତ କରିବା ପାଇଁ ସ୍ବୀକୃତି ମିଳିଥିଲା। ରବିବାର ଭଦ୍ରକ ଜିଲାପାଳ ଜ୍ଞାନରଞ୍ଜନ ଦାସ, ଏଡିଏମ ଶ୍ୟାମାଭକ୍ତ ମିଶ୍ର, ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଗୋଲକ ଚନ୍ଦ୍ର ବେହେରା, ବିଡିଓ ଦୁର୍ଗାଚରଣ ମୁର୍ମୁ, ଧୂଷରୀ ଥାନା ଏସ୍ଆଇ ଦୁଷ୍ମନ୍ତ କୁମାର ଦାସ ସୂର୍ଯ୍ୟପୁରରେ ପହଞ୍ଚି ପ୍ରଥମେ ରାମହରି ଗୋସ୍ବାମୀ ଏବଂ ଗୌରୀଶ୍ୟାମ ଗୋସ୍ବାମୀଙ୍କୁ ଭେଟି ସମ୍ମାନିତ କରିଥିଲେ। ଏହାପରେ ଧାମନଗର ଥାନା ଆଇଆଇସି ରତିକାନ୍ତ ଗିରିଙ୍କ ସମେତ ଅଧିକାରୀମାନେ କମାରବନ୍ଧ ଗ୍ରାମକୁ ଯାଇ ସଂଗ୍ରାମୀ ବ୍ରଜକିଶୋର ରାଉତଙ୍କୁ ସମ୍ମାନିତ କରିଥିଲେ। ଏହାପରେ ଭଦ୍ରକ ଏମ୍ପି ମଞ୍ଜୁଲତା ମଣ୍ଡଳ, ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ, ବାଲେଶ୍ୱର ଭଦ୍ରକ କେନ୍ଦ୍ର ସମବାୟ ବ୍ୟାଙ୍କ ସଭାପତି ରଘୁନାଥ ଲେଙ୍କା ମଧ୍ୟ ସଂଗ୍ରାମୀମାନଙ୍କ ଘରକୁ ଯାଇ ସମ୍ମାନିତ କରିଥିଲେ। ସେହିପରି କଂଗ୍ରେସ ଦଳ ତରଫରୁ ସୂର୍ଯ୍ୟପୁରର ଦୁଇଜଣ ସଂଗ୍ରାମୀଙ୍କୁ ସମ୍ମାନିତ କରାଯାଇଛି। ପିସିସି ସଭ୍ୟ ହୃଦାନନ୍ଦ ସେଠୀ, ରାଜ୍ୟ ଓବିସି ସେଲ ଉପସଭାପତି ଅଭିଷେକ ରାଉତ, ବରିଷ୍ଠ କଂଗ୍ରେସ ନେତା ପ୍ରସନ୍ନ ଧଳ, ପରମାନନ୍ଦ ସାଏନ୍ତ, ଭାଗୀରଥୀ ପରିଡା, ସଂଗ୍ରାମ ନାୟକ, ପ୍ରଦୀପ୍ତ କିଶୋର ଦାସ, ସୁଧୀର ଖଟୁଆ, ରବୀନ୍ଦ୍ର ନାୟକ ପ୍ରମୁଖ ଉପସ୍ଥିତ ରହି ସଂଗ୍ରାମୀଙ୍କୁ ସମ୍ମାନିତ କରିଥିଲେ ।
