କଟକ,୧୬।୭ (କାର୍ତ୍ତିକ ସାହୁ)ମେଡିକାଲ ପ୍ରବେଶିକା ପରୀକ୍ଷା (ନିଟ୍)ରେ ଜଣେ ଭିନ୍ନକ୍ଷମ ଛାତ୍ରଙ୍କୁ କମ୍ ମାର୍କ ମିଳିଛି। ସେ ଓଏମ୍ଆର୍ ସିଟ୍ରେ ଯେତିକି ଠିକ୍ ଉତ୍ତର ଦେଇଛନ୍ତି ତାଙ୍କୁ ସେତିକି ମାର୍କ ମିଳିନାହିଁ। କମ୍ପ୍ୟୁଟରରେ ମୂଲ୍ୟାୟନଜନିତ ତ୍ରୁଟି ପାଇଁ ତାଙ୍କର ନମ୍ବର କମ୍ ହୋଇଛି। ଯାହାଦ୍ୱାରା ସେ ମେଡିକାଲ ପାଠ୍ୟକ୍ରମରେ ନାମଲେଖା ନିମନ୍ତେ ହେବାକୁ ଥିବା କାଉନ୍ସେଲିଂ ପ୍ରକ୍ରିୟାରେ ଭାଗ ନେବାରୁ ବଞ୍ଚତ୍ତ ହେବେ। ଏହାକୁ ନେଇ ଆବେଦନକାରୀ ରିଶିରାଜ ଦାଶଙ୍କ ପକ୍ଷରୁ ହାଇକୋର୍ଟରେ ଆଗତ ମାମଲାର ଶୁଣାଣି ଶୁକ୍ରବାର ହୋଇଛି। ବିଚାରପତି ଡ. ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ ଓ ବିଚାରପତି ମୁରାହରି ଶ୍ରୀ ରମଣଙ୍କୁ ନେଇ ଗଠିତ ଖଣ୍ଡପୀଠ ଉକ୍ତ ମାମଲାର ଶୁଣାଣି କରି ପରୀକ୍ଷା ପରିଚାଳନା କରୁଥିବା ନୂଆଦିଲ୍ଲୀସ୍ଥିତ ନ୍ୟାଶନାଲ ଟେଷ୍ଟିଂ ଏଜେନ୍ସି (ଏନ୍ଟିଏ)ର ଚେୟାରପର୍ସନ୍ଙ୍କୁ ଜବାବ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ଆବେଦନକାରୀ ରିଶିରାଜ ଜଣେ ଭିନ୍ନକ୍ଷମ ପରୀକ୍ଷାର୍ଥୀ। ୨୦୨୩ ମେ’ ୭ରେ ନିଟ୍ ପରୀକ୍ଷା ଅନୁଷ୍ଠିତ ହୋଇଥିଲା। ଜୁନ୍ ୧୩ରେ ଫଳ ପ୍ରକାଶନ ପରେ ରିଶିରାଜଙ୍କୁ ୭୬ ମାର୍କ ମିଳିଥିବା ସେ ଜାଣିବାକୁ ପାଇଥିଲେ। ଏଥିରେ ଅସନ୍ତୁଷ୍ଟ ହୋଇ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ମାମଲାର ଶୁଣାଣି କରି ତାଙ୍କୁ ଓଏମ୍ଆର୍ ସିଟ୍ର ନକଲ ସହିତ ରିଚେକିଂ କରି ତଥ୍ୟ ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ। ତାଙ୍କୁ ଏନ୍ଟିଏ ପକ୍ଷରୁ ଓଏମ୍ଆର୍ ସିଟ୍ର ନକଲ ଇ-ମେଲ ଜରିଆରେ ଯୋଗାଇ ଦିଆଯାଇଥିଲା। ଏନ୍ଟିଏ ପକ୍ଷରୁ ତାଙ୍କୁ ସୂଚିତ କରାଯାଇଥିଲା ଯେ, ସେ ୧୭୯ଟି ପ୍ରଶ୍ନର ଉତ୍ତର ଦେଇଛନ୍ତି। ତନ୍ମଧ୍ୟରୁ ୫୧ଟି ଉତ୍ତର ଠିକ୍ ହୋଇଥିବାବେଳେ ୧୨୮ଟି ଉତ୍ତର ଭୁଲ୍ ରହିଛି ଏବଂ ସେ ମୋଟ ୭୬ ନମ୍ବର ପାଇଛନ୍ତି। ହେଲେ ଏନ୍ଟିଏ ଓ୍ବେବ୍ସାଇଟ୍ରେ ଉପଲବ୍ଧ ଆନ୍ସର କି’ ସହିତ ଇ-ମେଲ୍ ଯୋଗେ ପାଇଥିବା ଓଏମ୍ଆର୍ ସିଟ୍ରେ ଦେଇଥିବା ଉତ୍ତରଗୁଡ଼ିକୁ ରିଶିରାଜ ମିଳାଇଥିଲେ। ଏଥିରେ ସେ ୧୭୪ଟି ଉତ୍ତର ଠିକ୍ ଦେଇଥିବା ଅବଗତ ହୋଇଥିଲେ। କମ୍ପ୍ୟୁଟରରେ ଓଏମ୍ଆର୍ ସିଟ୍ଗୁଡ଼ିକୁ ମୂଲ୍ୟାୟନବେଳେ ତ୍ରୁଟି ପାଇଁ ରିଶିରାଜ ଏଭଳି ପରିସ୍ଥିତିରେ ପଡ଼ିଥିବା ସ୍ପଷ୍ଟ ହୋଇଥିଲା। ଆବେଦନକାରୀଙ୍କ ପକ୍ଷରୁ ଆଇନଜୀବୀ ରାଜୀବ ରଥ ମାମଲା ପରିଚାଳନା କରୁଛନ୍ତି।
