ଭୁବନେଶ୍ୱର,୧୩ା୫(ବ୍ୟୁରୋ): ବ୍ରଜରାଜନଗର ଉପନିର୍ବାଚନ ପାଇଁ ନାମାଙ୍କନ ଦାଖଲର ସମୟ ଶେଷ ହୋଇଯାଇଥିବାବେଳେ ପ୍ରଚାର ଲାଗି ସବୁ ଦଳର ପ୍ରସ୍ତୁତି ଆରମ୍ଭ ହୋଇଯାଇଛି। ଇତିମଧ୍ୟରେ ଗୁରୁବାର କଂଗ୍ରେସ ଷ୍ଟାର କ୍ୟାମ୍ପେନର ତାଲିକା ଘୋଷଣା କରିଛି। ଅପରପକ୍ଷରେ ଭାଜପା ଏବଂ ବିଜେଡି ପକ୍ଷରୁ ଶନିବାର ସୁଦ୍ଧା ତାଲିକା ପ୍ରକାଶ ପାଇବ ବୋଲି ଜଣାପଡ଼ିଛି। କଂଗ୍ରେସ ଏହାର
ଷ୍ଟାର କ୍ୟାମ୍ପେନର ତାଲିକାରେ ବହୁ ରାଜ୍ୟ ବାହାର ନେତାଙ୍କ ନାଁ ରଖିଥିବାରୁ ସେମାନେ ସତରେ ଆସିବେ ନା କେବଳ ତାଲିକାରେ ରହିଯିବେ ତା ଉପରେ ଏବେ ସମସ୍ତଙ୍କ ନଜର। କାରଣ ପୂର୍ବରୁ ବାଲେଶ୍ୱର, ତିର୍ତ୍ତୋଲ
ଏବଂ ପିପିଲି ଉପନିର୍ବାଚନ ସମୟରେ ଭାଜପା ପକ୍ଷରୁ ଅନେକ କେନ୍ଦ୍ର ନେତାମାନଙ୍କ ନାମ ଷ୍ଟାର ପ୍ରଚାର ତାଲିକାରେ ରଖାଯାଇଥିଲା। ହେଲେ ସେମାନେ କେହି ଆସି ନ ଥିଲେ। ତେଣୁ ଏବେ ଉଭୟ ଜାତୀୟ ଦଳର ଷ୍ଟାର କ୍ୟାମ୍ପେନର ତାଲିକାରେ ଥିବା କେନ୍ଦ୍ରୀୟ ନେତାଙ୍କ ପ୍ରଚାରକୁ ଦଳୀୟ କର୍ମୀମାନେ ଅପେକ୍ଷା କରିଥିବା ଆଲୋଚନା ହେଉଛି। ଅପରପକ୍ଷରେ ବିଜେଡି ବିଭିନ୍ନ ନେତାଙ୍କ ମଧ୍ୟରେ ଦାୟିତ୍ୱ ବଣ୍ଟନ କରି ଭଲ ସଫଳତା ହାସଲ କରିବା ଦିଗରେ ଉଦ୍ୟମ ଚଳାଇଛି।
ତେବେ କଂଗ୍ରେସ ଷ୍ଟାର କ୍ୟାମ୍ପେନର ତାଲିକାରେ ଛତିଶଗଡ଼ର ବହୁ ନେତାଙ୍କୁ ସାମିଲ କରାଯାଇଛି। ତାଲିକାରେ ଓଡ଼ିଶା ପ୍ରଭାରୀ ଏ. ଚେଲ୍ଲା କୁମାର, ରୁଦ୍ର ରାଜୁ, ନିରଞ୍ଜନ ପଟ୍ଟନାୟକ, ନରସିଂହ ମିଶ୍ର, ସନ୍ତୋଷ ସିଂ ସାଲୁଜା, ତାରାପ୍ରସାଦ ବାହିନୀପତି, ରମେଶ ଚନ୍ଦ୍ର ଜେନା, ଅଧିରାଜ ମୋହନ ପାଣିଗ୍ରାହୀ, ସି.ଏସ୍. ରାଜନ ଏକ୍କା, ସୁରେଶ କୁମାର ରାଉତରାୟ, ଶରତ ପଟ୍ଟନାୟକ, ଯଜ୍ଞେଶ୍ୱର ବାବୁ, ଜୟଦେବ ଜେନା, ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ, ଛତିଶଗଡ଼ ସ୍ବାସ୍ଥ୍ୟମନ୍ତ୍ରୀ ଟି.ଏସ୍. ସିଂଦେଓ, ଭକ୍ତ ଦାସ, ଉମେଶ ପଟେଲ, ସପ୍ତଗିରି ଉଲାକା,କହ୍ନେୟା କୁମାର, ଜିଗନେଶ ମଓ୍ବାନୀ, ମହମ୍ମଦ ମୋକିମ, ପ୍ରକାଶ ନାଏକ, ଜଗନ୍ନାଥ ପଟ୍ଟନାୟକ, ଅମରଜିତ ଭଗତ, ରାଜକିଶୋର ଷଡ଼ଙ୍ଗୀ, କଓ୍ବାଶି ଲକ୍ଷମା, ମୋହନ ମକ୍ରମ, ଚିରଞ୍ଜୀବ ବିଶ୍ୱାଳ, ଶରତ ରାଉତ, ରାଗିଣୀ ନାଏକ, ଗଣେଶ୍ୱର ବେହେରା, ପଞ୍ଚାନନ କାନୁନ୍ଗୋ, ବିଜୟଲକ୍ଷ୍ମୀ ସାହୁ, ବନ୍ଦିତା ପରିଡ଼ା, ହମିଦ ହୁସେନ, ସ୍ମୃତିରଞ୍ଜନ ଲେଙ୍କା, ୟାସିର ନଓ୍ବାଜ, ଆର୍ଯ୍ୟ କୁମାର ଜ୍ଞାନେନ୍ଦ୍ର, ରାମଚନ୍ଦ୍ର ଖୁଣ୍ଟିଆ ଏବଂ ଦେବାଶିଷ ପଟ୍ଟନାୟକଙ୍କ ନାଁ ଏହି ତାଲିକାରେ ରହିଛି।
ଅନ୍ୟପଟେ ଭାଜପାର ଏକ କୋର୍ କମିଟି ବୈଠକ ଦଳର ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଅନୁଷ୍ଠିତ ହେବ ବୋଲି ଜଣାପଡିଛି। ଦଳ ଏଥିରେ ଗତ ପଞ୍ଚାୟତ ଓ ପୌର ନିର୍ବାଚନର ଖରାପ ପ୍ରଦର୍ଶନ ଏବଂ ଆସନ୍ତା ଉପନିର୍ବାଚନ ପ୍ରସ୍ତୁତି ଆଲୋଚନା କରିବ। ଅନ୍ୟପଟେ ବ୍ରଜରାଜନଗର ଉପନିର୍ବାଚନ ପ୍ରଚାର ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଅଶ୍ୱିନୀ ବୈଷ୍ଣବ ଆସୁ ନ ଥିବା ବିଶ୍ୱସ୍ତ ସୂତ୍ରରୁ ଜଣାପଡିଛି।
