ସିନାପାଲି,୧୭।୧୧(ଡି.ଏନ୍.ଏ.): ନୂଆପଡ଼ା ଜିଲା ସିନାପାଲି ଥାନା ଅଧୀନ ଚଟିଆଗୁଡ଼ା ନିକଟ ଫୋରୱେ ରାସ୍ତାରେ ଗୁରୁବାର ଏକ ଟ୍ରକ୍ ଚାପାରେ ଜଣେ କଲେଜ ଛାତ୍ରୀଙ୍କ ମୃତ୍ୟୁ ଘଟିଛି। ଏହି ଘଟଣାରେ ଅନ୍ୟ ଜଣେ ଛାତ୍ରୀ ଗୁରୁତର ଆହତ ହୋଇଛନ୍ତି। ମୃତ ଛାତ୍ରୀ ଜଣକ ଗୋର୍ଲା ଗ୍ରାମ ଭରୋପଡାର ବେଦମତୀ ମାଝି(୧୬)। ଗୁରୁତର ହେଲେ କମଳାକାନ୍ତି ମାଝି। ଛାତ୍ରୀ ଦ୍ୱୟ ସିନାପାଲି ସ୍ଥିତ ମହିଳା ମହାବିଦ୍ୟାଳୟକୁ ଗୁରୁବାର କ୍ଲାସ କରିବାକୁ ଆସିଥିଲେ। କଲେଜରୁ ଘରକୁ ଫେରିବା ବେଳେ ଏହି ଦୁର୍ଘଟଣା ଘଟିଛି।
ଅନ୍ୟପକ୍ଷେ କ୍ଷତିପୂରଣ ଦାବିରେ ପରିବାର ଲୋକେ ଘଟଣାସ୍ଥଳରେ ମୃତଦେହ ରଖି ରାସ୍ତାରୋକୋ କରିଥିଲେ। ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ଘଟଣାର ତଦନ୍ତ ଚଳାଇଛି। ପରିବାର ଲୋକେ କ୍ଷତିପୂରଣ ଦାବିରେ ଅଡି ବସିଥିବା ବେଳେ ପ୍ରଶାସନିକ ଅଧିକାରୀ କିମ୍ବା ଟ୍ରକ୍ ମାଲିକ ପହଞ୍ଚି ନ ଥିଲେ।
ମିଳିଥିବା ସୂଚନା ମୁତାବକ, ଛାତ୍ରୀମାନେ ସାଇକେଲରେ ଘରକୁ ଫେରୁଥିଲେ। ଏକ ଟ୍ରକ୍ (ସିଜି୦୪ଏମଜି୮୮୦୮) ଚଟିଆଗୁଡା ନିକଟରେ ଛାତ୍ରୀଙ୍କୁ ଧକ୍କା ଦେଇ ଡ୍ରାଇଭର ଟ୍ରକକୁ ସିନାପାଲି ପେଟ୍ରୋଲ ପମ୍ପ ନିକଟରେ ଛାଡି ଫେରାର ହୋଇଯାଇଥିଲେ। ଜଣେ ଛାତ୍ରୀ ଟ୍ରକରେ ଚାପି ହୋଇଯିବାରୁ ଘଟଣାସ୍ଥଳରେ ମୃତ୍ୟ ଘଟିଥିଲା। ଅନ୍ୟ ଜଣକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସିନାପାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ବର୍ତ୍ତମାନ ଛାତ୍ରୀଙ୍କ ସ୍ବାସ୍ଥ୍ୟାବସ୍ଥା ଠିକ୍ ଥିବା ଜଣାପଡିଛି।
