ନୂଆଦିଲ୍ଲୀ, ୧୨।୧୧: ଆଇପିଏଲ ଟିମ ସନରାଇଜର୍ସ ହାଇଦ୍ରାବାଦ (SRH)ର ମାଲିକାଣୀ କାବ୍ୟା ମାରାନ ଅନିରୁଦ୍ଧ ରବିଚନ୍ଦରଙ୍କୁ ବିବାହ କରିଛନ୍ତି। ଅନିରୁଦ୍ଧ ନିଜ ସୋସିଆଲ ମିଡିଆରେ କାବ୍ୟାଙ୍କ ସହ ଏକ ଫଟୋ ଶେୟାର କରି ଏହି ଖୁସି ଖବର ଦେଇଛନ୍ତି। କାବ୍ୟା ଆଇପିଏଲ ନିଲାମୀ ସମୟରେ ସନରାଇଜର୍ସ ହାଇଦ୍ରାବାଦ ପକ୍ଷରୁ ଖେଳାଳିଙ୍କ ପାଇଁ ବିଡ ଲଗାଉଥିବା ନଜର ଆସନ୍ତି। ଏହାବ୍ୟତୀତ ନିଜ ଦଳକୁ ଉତ୍ସାହିତ କରିବା ପାଇଁ ସେ ଷ୍ଟାଡିୟମରେ ମଧ୍ୟ ଉପସ୍ଥିତ ରହିଥାନ୍ତି। କାବ୍ୟାଙ୍କ ସ୍ବାମୀ ଅନିରୁଦ୍ଧ ନିଜ ଇନଷ୍ଟାଗ୍ରାମରେ ଫଟୋ ଶେୟାର କରି ଲେଖିଛନ୍ତି, ମୋ ଜୀବନର ସେହି ଏକମାତ୍ର ମୁହୂର୍ତ୍ତ, ଯାହା ସାରା ଜୀବନ ପାଇଁ ସ୍ମରଣୀୟ ହୋଇ ରହିବ। ୧୧.୧୧।
ଫଟୋରେ ଅନିରୁଦ୍ଧ ଓ କାବ୍ୟା ପରସ୍ପରର ହାତ ଧରି ହସୁଥିବା ନଜର ଆସିଛନ୍ତି। ଉଭୟଙ୍କ ଆକର୍ଷଣୀୟ ପୋଷାକକୁ ମଧ୍ୟ ସୋସିଆଲ ମିଡିଆରେ ବେଶ ପ୍ରଶଂସା କରାଯାଉଛି। ଫଟୋରେ ଉଭୟଙ୍କ ଉପରେ ଫୁଲ ବର୍ଷା ହେଉଥିବା ଦେଖାଯାଉଛି। ସେମାନଙ୍କ ପଛରେ ହଳଦିଆ ଫୁଲରେ ସଜାଯାଇଥିବା ଏକ ସୁନ୍ଦର ମଣ୍ଡପ ମଧ୍ୟ ନଜର ଆସୁଛି।
ଅନିରୁଦ୍ଧ ଆଇଭରି ରଙ୍ଗର କୁର୍ତ୍ତା ସହ ମ୍ୟାଚିଂ ବେଷ୍ଟି ପିନ୍ଧିଛନ୍ତି। ଏହା ଉପରେ ସେ ଏକ ଲମ୍ବା ଜ୍ୟାକେଟ ପିନ୍ଧିଥିବା ବେଳେ ତାଙ୍କ ଲୁକ ବେଶ ଆକର୍ଷଣୀୟ ଲାଗୁଛି। ସେହିପରି କାବ୍ୟା ଗୋଲାପୀ ରଙ୍ଗର ଲେହେଙ୍ଗା ପିନ୍ଧିଛନ୍ତି। ଏଥିରେ ସୁନ୍ଦର ଏମ୍ବ୍ରୋଡେରି କାମ କରାଯାଇଛି। ଏହି ନବଦମ୍ପତିଙ୍କୁ ସୋସିଆଲ ମିଡିଆରେ ଖୁବ ପସନ୍ଦ କରାଯାଉଛି।
ଆଇପିଏଲ ସମୟରେ ମଧ୍ୟ କାବ୍ୟା ନିଜ ଲୁକ୍କୁ ନେଇ ବେଶ ଚର୍ଚ୍ଚାରେ ରହିଥାନ୍ତି। ଆଇପିଏଲ ନିଲାମୀରେ ସେ ସନରାଇଜର୍ସ ହାଇଦ୍ରାବାଦ ପକ୍ଷରୁ ଖେଳାଳି କିଣିବା ପାଇଁ ବିଡ ଲଗାଉଥିବା ଦେଖିବାକୁ ମିଳେ। ଏହାସହ ପ୍ରାୟ ପ୍ରତ୍ୟେକ ମ୍ୟାଚ୍ରେ ଷ୍ଟାଡିୟମରେ ପହଞ୍ଚି ନିଜ ଦଳର ମନୋବଳ ବଢ଼ାଇଥାନ୍ତି। ଡିସେମ୍ବର ୧୬ରେ ହେବାକୁ ଥିବା ଆଇପିଏଲ ୨୦୨୭ ନିଲାମୀରେ ମଧ୍ୟ କାବ୍ୟା ନଜର ଆସିପାରନ୍ତି।
କାବ୍ୟାଙ୍କ ସ୍ବାମୀ ଅନିରୁଦ୍ଧ ଜଣେ ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଓ କମ୍ପୋଜର। ସେ ଲୋକପ୍ରିୟ ଗୀତ ‘କୋଲାଭେରି ଡି’ର ସଙ୍ଗୀତ ରଚନା କରିଥିଲେ। ଏହି ଗୀତଟି ଦେଶ ଓ ବିଦେଶରେ ବେଶ ଲୋକପ୍ରିୟ ହୋଇଥିଲା। ଏହାବ୍ୟତୀତ ସେ ‘ବିକ୍ରମ’, ‘ଜେଲର’ ଏବଂ ‘ଲିଓ’ ଭଳି ଲୋକପ୍ରିୟ ଚଳଚ୍ଚିତ୍ରରେ ମଧ୍ୟ ସଙ୍ଗୀତ ଦେଇଛନ୍ତି।
୨୦୨୩ରେ ରିଲିଜ ହୋଇଥିବା ଶାହରୁଖ ଖାନଙ୍କ ଫିଲ୍ମ ‘ଯବାନ’ର ଲୋକପ୍ରିୟ ଗୀତ ‘ଜିନ୍ଦା ବନ୍ଦା’ର ସଙ୍ଗୀତ ମଧ୍ୟ ଅନିରୁଦ୍ଧ ରଚନା କରିଥିଲେ। ଏହା ତାଙ୍କ ସଙ୍ଗୀତ କ୍ୟାରିୟରର ଏକ ବଡ଼ ଉପଲବ୍ଧି ଥିଲା।
