ନୂଆଦିଲ୍ଲୀ, ୭।୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଦିବଂଗତ ଭାଜପା ନେତ୍ରୀ ସୋନାଲି ଫୋଗାଟଙ୍କ ପରିବାରକୁ ଭେଟିଥିଲେ। ପଞ୍ଜାବର ମୁଖ୍ୟମନ୍ତ୍ରୀ ଭାଗବନ୍ତ ମନ ମଧ୍ୟ ତାଙ୍କ ସହ ଉପସ୍ଥିତ ଥିଲେ। ସିବିଆଇ ଦ୍ୱାରା ସୋନାଲି ଫୋଗାଟ ମାମଲାର ତଦନ୍ତ କରାଯିବାକୁ ନେଇ କେଜ୍ରିୱାଲ ଦାବି ଉଠାଇଥିଲେ। ସେ କହିଛନ୍ତି, ହରିୟାଣା ଏବଂ ଗୋଆରେ ଭାଜପା ସରକାର ଅଛି। ସିବିଆଇ ଦ୍ୱାରା ଏହି ସମଗ୍ର ଘଟଣାର ଅନୁସନ୍ଧାନ କରାଯିବା ଉଚିତ। ସୋନାଲିଙ୍କ ପରିବାରକୁ ନ୍ୟାୟ ମିଳିବା ଜରୁରୀ। ସିବିଆଇ ଅନୁସନ୍ଧାନରେ ଯେତେ ବିଳମ୍ବ ହେବ ସେତେ ଅଧିକ ସନ୍ଦେହ ବଢିବ। ବଡ ନେତା, ବଡ ଲୋକ, ବଡ ବ୍ୟବସାୟୀ ଏଥିରେ ଜଡିତ ଥିବା ନେଇ ଆଶଙ୍କା ପ୍ରକାଶ ପାଇଛି ବୋଲି ସେ କହିଛନ୍ତି। ସିବିଆଇ ତଦନ୍ତ ହେଲେ ଏହି ସମସ୍ତ ସନ୍ଦେହ ସ୍ପଷ୍ଟ ହେବ।
ସୂଚନାଯୋଗ୍ୟ,ଗତ ଅଗଷ୍ଟ ୨୩ରେ ଅଭିନେତ୍ରୀ ତଥା ଭାଜପା ନେତ୍ରୀ ସୋନାଲି ଫୋଗଟଙ୍କ ଗୋଆରେ ମୃତ୍ୟୁ ଘଟିଥିଲା। ପ୍ରାରମ୍ଭରେ, ମୃତ୍ୟୁର କାରଣ ହୃଦଘାତ ବୋଲି କୁହାଯାଉଥିଲା, କିନ୍ତୁ ଧୀରେ ଧୀରେ ଏହା ହତ୍ୟାକାଣ୍ଡ ବୋଲି ଏବେ ଚର୍ଚ୍ଚା ହେଉଛି। ସୋନାଲିଙ୍କ ପିଏ ଏଥିରେ ସମ୍ପୃକ୍ତ ଥିବା ମଧ୍ୟ କୁହାଯାଉଛି।
