ନୂଆଗଡ଼/ଆର.ଉଦୟଗିରି,୫ା୪: ରାଜ୍ୟରେ ସହରାଞ୍ଚଳମାନଙ୍କରେ ୫-ଜି ମୋବାଇଲ ସେବା ଚାଲୁ ରହିଥିବା ବେଳେ ଗ୍ରାମାଞ୍ଚଳରେ ମିଳୁନି ମୋବାଇଲ ସେବା। ଗାଁ ଗହଳିରେ ମୋବାଇଲ ଟାୱାର ହେବ ବୋଲି ସରକାର ଘୋଷଣା କରିଥିଲା ବେଳେ ଗ୍ରାମାଞ୍ଚଳବାସୀଙ୍କୁ ଉପହାସ ଭଳି ହେଉଛି। ଏମିତି ଘଟଣା ଦେଖିବାକୁ ମିଳିଛି ଗଜପତି ଜିଲା ନୂଆଗଡ଼ ଅଞ୍ଚଳରେ। ଆଜିକାଲି ପାଠପଢ଼ା ଠାରୁ ଅଙ୍ଗନୱାଡ଼ି, ସ୍କୁଲ, କଲେଜର ଡାଟା, ବ୍ୟାଙ୍କ ସେବା, ସରକାରୀ ଏବଂ ବେସରକାରୀ ଅଫିସ କାର୍ଯ୍ୟ ଓ ଅନ୍ୟାନ୍ୟ କାର୍ଯ୍ୟ କରିବାକୁ ଇଣ୍ଟରନେଟ୍ ଉପରେ ଏବଂ ଜରୁରୀକାଳୀନ ସେବା ପାଇବା ପାଇଁ ମୋବାଇଲ ସେବା ଆବଶ୍ୟକ ହେଉଥିବା ବେଳେ କିଛି ଅଞ୍ଚଳ ଅଛି ଯେଉଁଠାରେ ନେଟୱାର୍କ ସମସ୍ତଙ୍କୁ ଉପେକ୍ଷା କରିଛି। ଅନେକ ଅଞ୍ଚଳ ରହିଛି ଯେଉଁଠି କି ମୋବାଇଲ ସେବା ସମ୍ପୂର୍ଣ୍ଣ ଅପହଞ୍ଚ। ଯଦ୍ୱାରା ଛାତ୍ରୀଛାତ୍ର, ଅଙ୍ଗନୱାଡ଼ି କର୍ମୀ, ଶିକ୍ଷକ ଓ ସାଧାରଣ ଜନତା ଜରୁରୀ ଆବଶ୍ୟକ କାର୍ଯ୍ୟରେ ଜୀବନକୁ ବାଜି ଲଗାଇ ପାହାଡ଼ ଚଡ଼ି ଲୋକେ ନେଟୱାର୍କ ଏବଂ ଇଣ୍ଟରନେଟ୍ ଆସୁଥିବା ସ୍ଥାନରେ ସମ୍ପାଦନ କରୁଛନ୍ତି। ସେହିପରି ଅଙ୍ଗନୱାଡ଼ି କେନ୍ଦ୍ର, ବିଦ୍ୟାଳୟର ଦୈନିକ ରିପୋର୍ଟ ପଠାଇବା ପାଇଁ ମହିଳା କର୍ମୀ, ଶିକ୍ଷକମାନେ ବହୁ ଉଚ୍ଚ ପାହାଡ଼ ଉପରକୁ ଚଢ଼ୁଛନ୍ତି। ଦୁର୍ଗମ ନୂଆଗଡ଼ ବ୍ଲକରେ ୧୯ପଞ୍ଚାୟତ ରହିଛି। ସେଥିମଧ୍ୟରୁ ୪/୫ଟି ପଞ୍ଚାୟତକୁ ଛାଡ଼ିଦେଲେ ଦୁର୍ଗମ ନଦୀମୁଠା ଅଞ୍ଚଳର ପରିମଳ, ସୁନ୍ଦରଡାଙ୍ଗ, କିରାମା, ଅନୁଗୁର, ସମ୍ବଲପୁର, ଉଦୟପୁର ୬ଟି ପଞ୍ଚାୟତ ସମେତ ଅନ୍ୟପଟରେ ପୁଟୁରୁପଡ଼ା, ବେତାରସିଂ, ଟାଙ୍ଗିଲି, ଆତରସିଂ ୪ଟି ପଞ୍ଚାୟତ ରହିଛି। କେରେଡାଙ୍ଗ, ପି.ଅନ୍ତରଡା, ଲୁହାଙ୍ଗର ୩ଟି ପଞ୍ଚାୟତରେ ପହଞ୍ଚି ପାରିନି ମୋବାଇଲ ସେବା। ଏହି ପଞ୍ଚାୟତର ଲୋକେ ଜରୁରୀକାଳୀନ ସେବା ପାଇବାରୁ ବଞ୍ଚିତ ହେଉଛନ୍ତି। ଅଙ୍ଗନୱାଡ଼ି କର୍ମୀମାନେ ପାହାଡ଼ ଚଢ଼ି ଅନଲାଇନ୍ କାମ କରୁଥିବା ଦେଖିବାକୁ ମିଳୁଛି। ଏ ନେଇ ଜନପ୍ରତିନିଧି ଓ ଅଞ୍ଚଳବାସୀ ବହୁବାର ବ୍ଲକ ଏବଂ ଜିଲା ପ୍ରଶାସନ ଓ ନେତା ମନ୍ତ୍ରୀଙ୍କୁ ଗୁହାରି କରି ଥକି ଗଲେଣି। ହେଲେ ଗ୍ରାମାଞ୍ଚଳରେ ଟାୱାର ହୋଇପାରୁନାହିଁ। ସରକାର ପଦକ୍ଷେପ ନେଇ ଟାୱାର ନିର୍ମାଣ କରିବାକୁ ଦାବି ଜୋର ଧରିଛି।
