ମୁମ୍ବାଇ, ୧୧।୯ : ସୁପ୍ରିମକୋର୍ଟର ପ୍ରଧାନ ବିଚାରପତି(ସିଜେଆଇ) ୟୁୟୁ ଲଲିତ ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏକାଠି ଗୋଟିଏ ମଞ୍ଚରେ ଏକ କାର୍ଯ୍ୟକ୍ରମରେ ଯୋଗଦେବାକୁ ବିରୋଧୀ ଦଳଙ୍କ ପକ୍ଷରୁ ନିନ୍ଦା କରାଯାଇଛି। ଏହାକୁ ନେଇ ମହା ବିକାଶ ଆଘାଡିଙ୍କ ସହଯୋଗୀମାନେ ପ୍ରଶ୍ନ ଉଠାଇଛନ୍ତି।
ଏନସିପି ଅଧ୍ୟକ୍ଷ ଜୟନ୍ତ ପାଟିଲ କହିଛନ୍ତି ଯେ ଏକନାଥ ଶିନ୍ଦେ ସରକାରଙ୍କ ବୈଧତାକୁ ଚ୍ୟାଲେଞ୍ଜ କରୁଥିବା ଏକ ଗୁରୁତର ମାମଲା ସୁପ୍ରିମକୋର୍ଟର ଏକ ସାମ୍ବିଧାନିକ ବେଞ୍ଚ ଦ୍ୱାରା ଶୁଣାଣି ହେଉଛି। ତେଣୁ ଶିନ୍ଦେ ଭାରତର ପ୍ରଧାନ ବିଚାରପତିଙ୍କ ସହ ମଞ୍ଚରେ ଉପସ୍ଥିତ ରହିବା ଅନ୍ୟାୟ। ଏହା ପ୍ରୋଟୋକଲ ଅନୁଯାୟୀ ଠିକ ନୁହେଁ।
ଶନିବାର ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ ୟୁୟୁ ଲଲିତଙ୍କୁ ସମ୍ମାନିତ କରାଯାଇଥିଲା। ଏହି କାର୍ଯ୍ୟକ୍ରମରେ କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁଙ୍କ ସହିତ ଶିନ୍ଦେ ମଧ୍ୟ ଉପସ୍ଥିତ ଥିଲେ।
ଏହି କାର୍ଯ୍ୟକ୍ରମର ଫଟୋ ପୋଷ୍ଟ କରି କଂଗ୍ରେସ ମୁଖପାତ୍ର ସଚିନ ସାୱନ୍ତ ଟୁଇଟ କରି କହିଛନ୍ତି ଯେ ଯେତେବେଳେ ମାନ୍ୟବର ସୁପ୍ରିମକୋର୍ଟଙ୍କ ଦ୍ୱାରା ଶିନ୍ଦେ- ଦେବେନ୍ଦ୍ର ଫଡନାଭିସ ସରକାରଙ୍କ ବୈଧତା ଯାଞ୍ଚ କରାଯାଉଛି ଏପରିସ୍ଥଳେ ଏଭଳି କାର୍ଯ୍ୟ ଦ୍ୱାରା କେବଳ ବର୍ତ୍ତମାନର ସରକାର ନୁହେଁ, ମୁଖ୍ୟମନ୍ତ୍ରୀଙ୍କୁ ମଧ୍ୟ ଅଯୋଗ୍ୟ ଘୋଷଣା କରାଯାଇ ପାରିବ।
ଏନେଇ ଶିବସେନା ମୁଖପାତ୍ର ଅରବିନ୍ଦ ସାୱନ୍ତ କହିଛନ୍ତି, ଆଜିକାଲି ନିୟମ ଏବଂ ଆଇନ ଅନୁଯାୟୀ କିଛି ଘଟୁନାହିଁ। ସେଥିପାଇଁ ଆମେ କହୁଛୁ ଗଣତନ୍ତ୍ର ବିପଦ ଏବଂ ସଙ୍କଟରେ ଅଛି।
