ଓ୍ବେଲିଂଟନ୍,୨୨।୧: ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ଲାଗି ଜେସିଣ୍ଡା ଆର୍ଡେର୍ନ ଘୋଷଣା କରିବା ପରେ ଦେଶର ଶିକ୍ଷାମନ୍ତ୍ରୀ କ୍ରିସ୍ ହିପ୍କିନ୍ସ ପରବର୍ତ୍ତୀ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି। ପ୍ରଧାନମନ୍ତ୍ରୀ ପଦ ପାଇଁ ସେ ଏକମାତ୍ର ପ୍ରାର୍ଥୀ ଭାବେ ଦୌଡ଼ରେ ପ୍ରବେଶ କରିଛନ୍ତି। ତଥାପି ୪୪ ବର୍ଷୀୟ ହିପ୍କିନ୍ସଙ୍କୁ ରବିବାର ପାର୍ଲାମେଣ୍ଟରେ ଲେବର ପାର୍ଟି ସଦସ୍ୟମାନଙ୍କ ସମର୍ଥନ ହାସଲ କରିବାକୁ ହେବ, ଯାହାକି ଏବେ ଏକ ଔପଚାରିକତା। ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ପଦରେ ୫ ବର୍ଷରୁ ଊର୍ଦ୍ଧ୍ୱ ସମୟ ରହିବା ପରେ ଆର୍ଡେର୍ନ ଗୁରୁବାର ଇସ୍ତଫା ଘୋଷଣା କରି ସମସ୍ତଙ୍କୁ ସ୍ତବ୍ଧ କରିଦେଇଥିଲେ। ସେ ଏବେ ଦେଶର ନେତୃତ୍ୱ ନେବା ଲାଗି ସମର୍ଥ ନୁହନ୍ତି ବୋଲି କହିଥିଲେ। ପ୍ରଧାନମନ୍ତ୍ରୀ ପଦ ପାଇଁ ଅନ୍ୟ କେହି ପ୍ରାର୍ଥୀ ହୋଇ ନ ଥିବାରୁ ଲେବର ପାର୍ଟି ସଦସ୍ୟମାନେ ହିପ୍କିନ୍ସଙ୍କୁ ସମର୍ଥନ ଦେବା ସୂଚନା ମିଳୁଛି। ଦେଶରେ ସାଧାରଣ ନିର୍ବାଚନ ପୂର୍ବରୁ ହିପ୍କିନ୍ସ ପ୍ରଧାନମନ୍ତ୍ରୀ ପଦରେ ୮ ମାସରୁ କମ୍ ସମୟ ରହିବେ। ଲେବର ପାର୍ଟି ମୁଖ୍ୟ ବିରୋଧୀ ଦଳ ନ୍ୟାଶନାଲ ପାର୍ଟିକୁ ପରାସ୍ତ କରିବ ବୋଲି ଜନମତ ସର୍ଭେରୁ ସୂଚନା ମିଳିଛି।
