ଟୋକିଓ,୧୬ା୯: ଚାଇନାର ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ଗୃହବନ୍ଦୀ ରହିଥିବା ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ପ୍ରତିରକ୍ଷା ମନ୍ତ୍ରୀ କେଉଁଠି ଅଛନ୍ତି ବୋଲି ଜାପାନରେ ଥିବା ଆମେରିକା ରାଷ୍ଟ୍ରଦୂତ ସୋସିଆଲ ମିଡିଆରେ ପ୍ରଶ୍ନ ଉଠାଇଥିଲେ। ୨ ସପ୍ତାହ ହେଲା ଲି’ଙ୍କୁ ସର୍ବସାଧାରଣରେ ଦେଖିବାକୁ ମିଳି ନ ଥିବାରୁ ଏଭଳି ଚର୍ଚ୍ଚା ଜୋର୍ ଧରିଛି। ଭିଏଟ୍ନାମକୁ ସେ ଗସ୍ତରେ ଯାଇଥିବାର ଦେଖାଯାଉ ନାହିଁ। ସିଙ୍ଗାପୁରର ନୌସେନା ମୁଖ୍ୟଙ୍କ ସହ ଲି’ଙ୍କର ବୈଠକ ଧାର୍ଯ୍ୟ ହୋଇଥିଲେ ମଧ୍ୟ ସେ ଅନୁପସ୍ଥିତ ରହିଥିଲେ। ସୋସିଆଲ ମିଡିଆରେ ଉକ୍ତ ପୋଷ୍ଟ ସହ ଏକ ହାସ୍ଟ୍ୟାଗ୍ ରହିଛି ଓ ଓ୍ବିଲିୟମ ସେକ୍ସ୍ପିୟରଙ୍କ ହାମ୍ଲେଟ ନାଟକର ଏକ ସଂଳାପ ‘ସମ୍ଥିଙ୍ଗ୍ ଇଜ୍ ରୋଟନ୍ ଇନ୍ ଦି ଷ୍ଟେଟ୍ ଅଫ୍ ଡେନ୍ମାର୍କ’ ବୋଲି ଲେଖାଯାଇଛି। ଗତ ୮ ତାରିଖରେ ରହମ୍ ଏମାନୁଏଲ୍ ଚାଇନା ପ୍ରତିରକ୍ଷା ମନ୍ତ୍ରୀଙ୍କ ଅନୁପସ୍ଥିତିକୁ ଆଗଥା କ୍ରିଷ୍ଟିଙ୍କ ଉପନ୍ୟାସ ସହ ତୁଳନା କରିଥିଲେ। ତେବେ ଉକ୍ତ ଚର୍ଚ୍ଚା ଉପରେ ଚାଇନା ବହିର୍ବ୍ୟାପାର ଏବଂ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୌଣସି ମନ୍ତବ୍ୟ ଦିଆଯାଇ ନାହିଁ। ଲି ଶେଷ ଥର ପାଇଁ ଅଗଷ୍ଟ ୨୯ରେ ବେଜିଂରେ ଦେଖାଯାଇଥିଲେ। ଆଫ୍ରିକୀୟ ଦେଶଗୁଡ଼ିକର ସୁରକ୍ଷା ଫୋରମ୍କୁ ସେ ଉଦ୍ବୋଧନ ଦେଇଥିଲେ। ଅନ୍ୟ ଏକ ରିପୋର୍ଟ ଅନୁଯାୟୀ ଚାଇନା ପ୍ରତିରକ୍ଷା ମନ୍ତ୍ରୀଙ୍କ ବିରୋଧରେ ତଦନ୍ତ ଚାଲିଥିବା ଆମେରିକା ସରକାର ବିଶ୍ୱାସ କରୁଛନ୍ତି। ତେବେ କି ପ୍ରକାର ତଦନ୍ତ ତାହା ସ୍ପଷ୍ଟ ଭାବେ ଜଣାପଡ଼ିନାହିଁ। ଚାଇନା ପ୍ରତିରକ୍ଷା ମନ୍ତ୍ରୀଙ୍କ ରହସ୍ୟମୟ ଉଭାନକୁ ନେଇ ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ପ୍ରତି ଅଙ୍ଗୁଳି ଉଠିଛି।
