ବେଜିଂ,୩।୮: ଚାଇନାର ଉହାନ ସହରରେ ବର୍ଷକ ପରେ ପୁଣି ଥରେ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଯାହାକୁ ନେଇ ସହରରେ ଭୟର ବାତାବରଣ ଖେଳିଯାଇଛି। ତେଣୁ ସହରର ସମସ୍ତ ଲୋକଙ୍କୁ ଯାଞ୍ଚ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି। ସୂଚନାଯୋଗ୍ୟ, ଉହାନ ସହରରେ ୧କୋଟିରୁ ଅଧିକ ଲୋକ ବସବାସ କରନ୍ତି। ଏଭଳି ପରିସ୍ଥିତିରେ ନୂଆ କରୋନା ମାମଲା ସାମ୍ନାକୁ ଆସିବା ପରେ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି। ତେଣୁ ସରକାର ୧କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ସହରର ସମସ୍ତ ବାସିନ୍ଦାଙ୍କ କରୋନା ଯାଞ୍ଚ ଆରମ୍ଭ କରିବାକୁ ନିଷ୍ପତ୍ତି ନେଇଛନ୍ତି। ଏନେଇ ମଙ୍ଗଳବାର ଉହାନର ବରିଷ୍ଠ
ଅଧିକାରୀ ଲି ତାଓ ଗଣମାଧ୍ୟମକୁ ସୂଚନା ଦେଇଛନ୍ତି। ୨୦୧୯ରେ ଉହାନ ସହରରେ କରୋନା ସଂକ୍ରମଣର ପ୍ରଥମ ମାମଲା ସାମ୍ନାକୁ ଆସିଥିଲା। ଏହାପରେ ବିଶ୍ୱର ଅନ୍ୟ ଦେଶଗୁଡ଼ିକରେ କରୋନା ବ୍ୟାପିବା ଆରମ୍ଭ କରିଥିଲା। ସୂଚନା ମୁତାବକ ମଙ୍ଗଳବାର ଚାଇନାରେ ଗତ ୨୪ ଘଣ୍ଟାରେ ୬୧ନୂଆ କରୋନା ମାମଲା ଚିହ୍ନଟ ହୋଇଛି। ଚାଇନାର ଅତିକମ୍ରେ ୧୮ଟି ପ୍ରଦେଶରେ ଗତ ୧୦ଦିନ ମଧ୍ୟରେ ୩୦୦ ଘରୋଇ ସଂକ୍ରମଣ ମାମଲା ସାମ୍ନାକୁ ଆସିଛି। ଯାହା କେବଳ ଚାଇନା ପାଇଁ ନୁହେଁ ବରଂ ଏହା ବିଶ୍ୱର ଅନ୍ୟ ଦେଶମାନଙ୍କ ଲାଗି ଚିନ୍ତାର କାରଣ ପାଲଟିପାରେ।
