ଚଣ୍ଡିଗଡ଼/ନୂଆଦିଲ୍ଲୀ,୩୦।୧୨: ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଅସନ୍ତୁଷ୍ଟ ବିଧାୟକମାନଙ୍କୁ ମନାଇବା ପାଇଁ ମଙ୍ଗଳବାର ନିଜ କ୍ୟାବିନେଟ ସମ୍ପ୍ରସାରଣ କରିଥିଲେ। ହେଲେ ଏହି ବିସ୍ତାର ପରେ ଭାଜପାରେ ବିବାଦ ବଢ଼ିଛି। କାରଣ ଦୁଇ ନୂଆ ମନ୍ତ୍ରୀ କମଲ ଗୁପ୍ତା (ଭାଜପା) ଏବଂ ଦେବେନ୍ଦର ସିଂ ବବଲି (ଜେଜେପି)ଙ୍କୁ ଦେବା ପାଇଁ ମୁଖ୍ୟମନ୍ତ୍ରୀଙ୍କ ପାଖରେ ବିଭାଗ ନ ଥିଲା। ଏଥିଯୋଗୁ ସେ କ୍ୟାବିନେଟର ବରିଷ୍ଠ ସହଯୋଗୀ ଅନିଲ ଭିଜ୍ଙ୍କଠାରୁ ଗୃହ ବିଭାଗ ମାଗିଥିଲେ। ଭିଜ୍ ଏଥିରେ ଅସନ୍ତୁଷ୍ଟ ହୋଇ ନୂଆ ମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବକୁ ବର୍ଜନ କରିବା ସହ ଭାଜପାର କେନ୍ଦ୍ରୀୟ ନେତୃତ୍ୱଙ୍କ ନିକଟରେ ଫେରାଦ ହୋଇଥିଲେ। ଶେଷରେ ଖଟ୍ଟର ଓ ଭିଜ୍ ଗୋଟିଏ ଲେଖାଏ ବିଭାଗ ଛାଡ଼ି ନିଜ ଦଳର ଜଣେ ମନ୍ତ୍ରୀଙ୍କୁ ଦେଇଛନ୍ତି। ଉପମୁଖ୍ୟମନ୍ତ୍ରୀ ଦୁଷ୍ୟନ୍ତ ଚୌଟାଲା ମଧ୍ୟ ନୂଆକରି ଶପଥ ନେଇଥିବା ତାଙ୍କ ଦଳର ମନ୍ତ୍ରୀଙ୍କ ପାଇଁ ଗୋଟିଏ ବିଭାଗ ଛାଡ଼ିଦେଇଛନ୍ତି। ଏହି ଘଟଣାକ୍ରମକୁ ନେଇ ହରିୟାଣା ରାଜନୀତି ସରଗରମ ହୋଇଥିବାବେଳେ ଖଟ୍ଟର-ଭିଜ୍ ମୁହଁାମୁହିଁ ହେବା ଭାଜପାର ଅନ୍ତର୍କଳହକୁ ପଦାରେ ପକାଇଛି।
ହରିୟାଣା ମନ୍ତ୍ରିମଣ୍ଡଳରେ ଭାଜପା କୋଟାରୁ ହିସାର ବିଧାୟକ ଡ. କମଲ ଗୁପ୍ତା ଏବଂ ସହଯୋଗୀ ଜନନାୟକ ଜନତା ପାର୍ଟି (ଜେଜେପି)ରୁ ଟୋହାନା ବିଧାୟକ ଦେବେନ୍ଦର ସିଂ ବବଲିଙ୍କୁ ସାମିଲ କରାଯାଇଛି। ରାଜ୍ୟପାଳ ବନ୍ଦାରୁ ଦତ୍ତାତ୍ରେୟ ଚଣ୍ଡିଗଡ଼ସ୍ଥିତ ରାଜଭବନରେ ଉଭୟଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ସଂସ୍କୃତରେ ଶପଥ ନେଇଥିବା ରାଷ୍ଟ୍ରୀୟ ସ୍ବୟଂସେବକ ସଂଘ (ଆର୍ଏସ୍ଏସ୍) ପୃଷ୍ଠଭୂମିର କମଲ ଗୁପ୍ତା ହେଉଛନ୍ତି ଖଟ୍ଟରଙ୍କ ଘନିଷ୍ଠ ସହଯୋଗୀ। ଅନ୍ୟପକ୍ଷେ ହିନ୍ଦୀରେ ଶପଥ ନେଇଥିବା ଦେବେନ୍ଦର ହରିୟାଣରେ କେନ୍ଦ୍ରର ୩ କୃଷି ଆଇନ ବିରୋଧୀ ଆନ୍ଦୋଳନର ମୂଳ କୁହାଯାଉଥିବା ଫତେଗଡ଼ର ତୋହାନାରୁ ବିଧାନସଭାରେ ପ୍ରଥମ ଥର ପାଇଁ ପ୍ରତିନିଧିତ୍ୱ କରୁଛନ୍ତି। ଗତ ଜୁନ୍ରେ ବବଲି ନିଜ ନିର୍ବାଚନମଣ୍ଡଳୀକୁ ଯାଇଥିବାବେଳେ ଆନ୍ଦୋଳନରତ କୃଷକଙ୍କ ଘୋର ବିରୋଧର ସମ୍ମୁଖୀନ ହୋଇଥିଲେ। କୃଷକଙ୍କ ଆକ୍ରମଣରେ ତାଙ୍କ ଗାଡ଼ିର କାଚ ଭାଙ୍ଗିଯିବା ସହ ଡ୍ରାଇଭର ଆହତ ହୋଇଥିଲେ। ଦେବେନ୍ଦର ଜଣେ ପ୍ରମୁଖ ଜାଟ୍ ଚେହେରା। ୨୦୧୯ ନିର୍ବାଚନରେ ସେ ଭାଜପାର ତତ୍କାଳୀନ ରାଜ୍ୟ ସଭାପତି ସୁଭାଷ ବରାଳଙ୍କୁ ବିପୁଳ ଭୋଟ ବ୍ୟବଧାନରେ ହରାଇଥିଲେ।
ହରିୟାଣାରେ ଏହା ହେଉଛି ୨ ବର୍ଷ ମଧ୍ୟରେ ଦ୍ୱିତୀୟ ସମ୍ପ୍ରସାରଣ। ୯୦ ଆସନ ବିଶିଷ୍ଟ ହରିୟାଣା ବିଧାନସଭା ପାଇଁ ୨୦୧୯ ଅକ୍ଟୋବରରେ ନିର୍ବାଚନ ହୋଇଥିଲା। ଭାଜପା ଏବଂ ଜେଜେପି ପରସ୍ପର ବିରୋଧରେ ଲଢ଼ିଥିଲେ। ଭାଜପା ୪୦ ଆସନ ଜିତିଥିଲା। ସଂଖ୍ୟାଗରିଷ୍ଠତା ନ ମିଳିବାରୁ ଶେଷରେ ୧୦ ବିଧାୟକ ଥିବା ଜେଜେପି ସହ ମେଣ୍ଟ କରିବାକୁ ବାଧ୍ୟ ହୋଇଥିଲା। ଅକ୍ଟୋବର ୨୭ରେ ମନୋହର ଲାଲ ଖଟ୍ଟର ଏବଂ ଜେଜେପି ଅଧ୍ୟକ୍ଷ ଦୁଷ୍ୟନ୍ତ ଚୌଟାଲା ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ନଭେମ୍ବରରେ ଉଭୟ ଦଳର ୧୦ ବିଧାୟକଙ୍କୁ ମନ୍ତ୍ରୀ କରାଯାଇଥିଲା। ସଦ୍ୟ ବିସ୍ତାର ସହ ଖଟ୍ଟରଙ୍କୁ ମିଶାଇ କ୍ୟାବିନେଟରେ ମନ୍ତ୍ରୀଙ୍କ ସଂଖ୍ୟା ୧୪କୁ ବୃଦ୍ଧି ପାଇଛି। ତେବେ ୨ ନୂଆ ମନ୍ତ୍ରୀଙ୍କୁ ଦେବା ପାଇଁ ମୁଖ୍ୟମନ୍ତ୍ରୀଙ୍କ ପାଖରେ କୌଣସି ବିଭାଗ ନ ଥିବାରୁ ସେ ଅନିଲ ଭିଜ୍ଙ୍କୁ ଗୃହ ବିଭାଗ ମାଗିଥିଲେ। ଭିଜ୍ ଗୃହ ବିଭାଗ ଛାଡ଼ିବାକୁ ମନା କରିଦେଲେ। ସେ ସହରାଞ୍ଚଳ ପୌର ସଂସ୍ଥା ବିଭାଗ ଛାଡ଼ିଛନ୍ତି। ଖଟ୍ଟର ମଧ୍ୟ ସମସ୍ତଙ୍କ ପାଇଁ ଗୃହ ନିର୍ମାଣ ବିଭାଗ ଛାଡ଼ିଛନ୍ତି। ଏହି ଦୁଇ ବିଭାଗ କମଲ ଗୁପ୍ତାଙ୍କୁ ଦିଆଯାଇଛି। ସେହିପରି ଉପମୁଖ୍ୟମନ୍ତ୍ରୀ ଦୁଷ୍ୟନ୍ତ ଚୌତାଲା ଉନ୍ନୟନ ଓ ପଞ୍ଚାୟତ ବିଭାଗ ଛାଡ଼ିଛନ୍ତି। ତାଙ୍କ ଦଳରୁ ମନ୍ତ୍ରୀ ହୋଇଥିବା ଅନୁପ ଧନକ ପ୍ରତ୍ନତତ୍ତ୍ୱ ଓ ସଂଗ୍ରହାଳୟ ବିଭାଗ ଛାଡ଼ିଛନ୍ତି। ଏହି ଦୁଇ ବିଭାଗ ଦେବେନ୍ଦର ସିଂ ବବଲିଙ୍କୁ ଦିଆଯାଇଛି।
