ଶାରଜା, ୧୯।୧୦(ପି.ଟି.)- ଚେନ୍ନାଇ ସୁପରକିଙ୍ଗ୍ସର ଡେଥ୍ ଓଭର ସ୍ପେଶାଲିଷ୍ଟ ଡ୍ବେନ ବ୍ରାଭୋ ଆହତ ହୋଇଛନ୍ତି। ଉରୁସନ୍ଧିରେ ଆଘାତ ଯୋଗୁ ସେ କିଛି ଦିନ କିମ୍ବା କିଛି ସପ୍ତାହ ପର୍ଯ୍ୟନ୍ତ ଖେଳିବା ସମ୍ଭାବନା ନାହିଁ ବୋଲି କୋଚ୍ ଷ୍ଟିଫେନ୍ ଫ୍ଲେମିଂ ସୂଚନା ଦେଇଛନ୍ତି। ଆହତ ସମସ୍ୟା ଯୋଗୁ ଶନିବାର ଅନୁଷ୍ଠିତ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚର ଶେଷ ଓଭରରେ ବ୍ରାଭୋ ବୋଲିଂକରିପାରି ନ ଥିଲେ। ଫଳରେ ବିଜୟ ପାଇଁ ୧୭ ରନ ଆବଶ୍ୟକ ଥିଲେ ହେଁ ଦିଲ୍ଲୀ ହାସଲ କରି ନେଇଥିଲା। ”ବ୍ରାଭୋ ଡାହାଣ ଉରୁସନ୍ଧିରେ ଆଘାତ ପାଇଛନ୍ତି। ଆହତ ସମସ୍ୟା ଗୁରୁତର ଥିବାରୁ ସେ ଗତ ମ୍ୟାଚର ଶେଷ ଭାଗରେ ପଡ଼ିଆକୁ ଓହ୍ଲାଇପାରି ନ ଥିଲେ। ଶେଷ ଓଭରରେ ବୋଲିଂ କରିପାରି ନ ଥିବାରୁ ସେ ଅତ୍ୟନ୍ତ ଦୁଃଖିତ। ଦଳପାଇଁ ତାଙ୍କର ପ୍ରତିଶ୍ରୁତିବଦ୍ଧତାର ପ୍ରମାଣ ଏଥିରୁ ମିଳିଛି। ବର୍ତ୍ତମାନ ପରିସ୍ଥିତିରେ ତାଙ୍କ ବିନା ଦଳକୁ ଆଗକୁ ଯିବାକୁ ହେବ “ ବୋଲି ଫ୍ଲେମିଂ କହିଛନ୍ତି। ବ୍ରାଭୋଙ୍କ ଅନୁପସ୍ଥିତିରେ ରବୀନ୍ଦ୍ର ଜାଡେଜାଙ୍କୁ ଶେଷ ଓଭର ବୋଲିଂ ଦିଆ ଯାଇଥିଲା। ”ଜାଡେଜା ଏଥିପାଇଁ ମାନସିକଭାବେ ପ୍ରସ୍ତୁତ ନଥିଲା। ମାତ୍ର ଏହାଛଡ଼ା ଆମ ନିକଟରେ ଅନ୍ୟ ବିକଳ୍ପ କିଛି ନ ଥିଲା। ଦିଲ୍ଲୀର ଶିଖର ଧାଓ୍ବନ ଭଲ ଖେଳିଲେ। ମାତ୍ର ଏକାଧିକ କ୍ୟାଚ ହାତଛଡ଼ା ଆମପାଇଁ ମହଙ୍ଗା ପଡ଼ିଲା“ ବୋଲି ଫ୍ଲେମିଂ କହିଛନ୍ତି।
