କେନ୍ଦ୍ରାପଡ଼ା, ୧୩।୩ (ଜଗନ୍ନାଥ ଧଳ): କେନ୍ଦ୍ର ସରକାର ସିଟିଜେନଶିପ ଆମେଣ୍ଡମେଣ୍ଟ ଆକ୍ଟ (ସିଏଏ) ଦେଶରେ ସୋମବାର ଲାଗୁ କରିଛନ୍ତି। ଏହାର ପ୍ରଭାବ କେନ୍ଦ୍ରାପଡ଼ା ଜିଲାରେ ଦେଖିବାକୁ ମିଳିଛି। ଉପାନ୍ତ ଅଞ୍ଚଳରେ ଅନୁପ୍ରବେଶକାରୀ ଭାବେ ଜୀବନଯାପନ କରୁଥିବା ବଙ୍ଗଳାଭାଷୀହିନ୍ଦୁମାନଙ୍କ ମଧ୍ୟରେ ଏଥିପାଇଁ ଖୁସିର ଝଲକ ଦେଖାଦେଇଛି। ୨୦୦୫ରୁ ଦେଶାନ୍ତର ନୋଟିସ ପାଇଥିବା ବଙ୍ଗଳାଭାଷୀହିନ୍ଦୁ ଏବେ ଭାରତରେ ରହିବାକୁ ଅନୁମତି ମିଳିଯିବ ବୋଲି ପ୍ରକାଶ କରିଛନ୍ତି।
ବରିଷ୍ଠ ଭାଜପା ନେତା ଭୁବନମୋହନ ଜେନା କହିଛନ୍ତି- ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନର ସଂଖ୍ୟାଗୌଣ ହିନ୍ଦୁ, ବୌଦ୍ଧ, ପାର୍ଶୀ ଆଦି ଲୋକ ବିଭିନ୍ନ କାରଣରୁ ନିର୍ଯାତିତ ହେଉଥିଲେ। ସେମାନଙ୍କ ଧାର୍ମିକ ଆସ୍ଥା ସହ ସାମାଜିକ ସୁରକ୍ଷା ବିପନ୍ନ ହୋଇପଡ଼ିଥିଲା। ଏମାନଙ୍କୁ ସିଏଏ ମାଧ୍ୟମରେ ନାଗରିକତା ପ୍ରଦାନ ପାଇଁ ଏହି ଆକ୍ଟରେ ବ୍ୟବସ୍ଥା ହୋଇଛି। ୧୯୭୧ମସିହାରେ ପାକିସ୍ତାନ ଓ ବାଂଲାଦେଶ ଯୁଦ୍ଧ ସମୟରେ କେନ୍ଦ୍ରାପଡ଼ା ଜିଲାରେ ମାତ୍ର ୧୨୩୭ଜଣଙ୍କୁ ଥଇଥାନ କରାଯାଇଥିଲା। ତେବେ ବାଂଲାଦେଶର ହିନ୍ଦୁମାନେ ମୌଳବାଦୀଙ୍କ ନିର୍ଯାତନା ସହି ନ ପାରି ଭାରତର ବିଭିନ୍ନ ସ୍ଥାନରେ ଶରଣାର୍ଥୀ ଭାବେ ଆଶ୍ରୟ ନେଇଛନ୍ତି। କେନ୍ଦ୍ରାପଡ଼ା ଜିଲାରେ ଏପରି ବ୍ୟକ୍ତିଙ୍କ ଚିହ୍ନଟ ଜିଲା ପ୍ରଶାସନ ପକ୍ଷରୁ କରାଯାଇଥିଲା। ୨୦୦୫ରେ ମହାକାଳପଡ଼ା ବ୍ଲକର ୧୫୫୧ ଜଣଙ୍କୁ ଚିହ୍ନଟ କରାଯାଇ ଦେଶାନ୍ତର ନୋଟିସ ହୋଇଥିଲା। ସିଏଏ ଲାଗୁ ପରେ ୨୦୧୪ ଡିସେମ୍ବର ୩୧ ଠାରୁ ଏହି ୩ ଦେଶର ହିନ୍ଦୁ ଶରଣାର୍ଥୀଙ୍କୁ ନାଗରିକତା ପ୍ରଦାନ କରାଯିବ ବୋଲି ବ୍ୟବସ୍ଥା ହୋଇଛି। ମହାକାଳପଡ଼ା ବ୍ଲକର ଯୁବନେତା ବିଜୟ ଶୁକ୍ଲା କହିଛନ୍ତି ଯେ, ସିଏଏ ଉପାନ୍ତ ଅଞ୍ଚଳରେ ବସବାସ କରୁଥିବା ବହୁ ଗରିବ ବ୍ୟକ୍ତିଙ୍କ ଭରସା ପାଲଟିବାକୁ ଯାଉଛି। ସେମାନଙ୍କ ନିକଟରେ ଜମି ନ ଥିବାରୁ ବିଭିନ୍ନ ସରକାରୀ ଯୋଜନାରୁ ବଞ୍ଚତ୍ତ କରାଯାଇଥିଲା। ଏପରିକି ଆବାସ ଯୋଜନା, ଖାଦ୍ୟ ସୁରକ୍ଷା, ସାମାଜିକ ନ୍ୟାୟରୁ ସେମାନେ ବଞ୍ଚତ୍ତ ହେଉଥିଲେ। ଏହାବ୍ୟତୀତ ବଙ୍ଗଳାଭାଷୀଭାବେ ଚିହ୍ନଟ ହୋଇଥିବାରୁ ଜୀବନଜୀବିକା ଉପରେ ବେଶ୍ ପ୍ରଭାବ ପକାଇଥିଲା। ସର୍ବଦା ଦେଶାନ୍ତର ଭୟ ସେମାନଙ୍କୁ ଲାଗି ରହିଥିଲା। ସିଏଏ ଲାଗୁରେ ଜୀବନ ଜୀବିକା ସ୍ବଚ୍ଛନ୍ଦ ହେବ ବୋଲି ସେ କହିଛନ୍ତି। ପୂର୍ବତନ ସରପଞ୍ଚ ନାରାୟଣ ହାଲଦାର କହିଛନ୍ତି ଯେ, ୧୯୫୧ରୁ ଏହି ଜିଲାରେ ବଙ୍ଗଳାଭାଷୀହିନ୍ଦୁ ଶରଣାର୍ଥୀ ଭାବେ ରହି ଆସିଛନ୍ତି। ସିଏଏ ସେମାନଙ୍କୁ ଆଶ୍ୱସ୍ତ କରିଛି। ୧୯୭୧ମସିହାରେ କେନ୍ଦ୍ର ସରକାରଙ୍କ ରେକର୍ଡରେ ଓଡ଼ିଶାରେ ମାତ୍ର ୩,୯୯୭ ଶରଣାର୍ଥୀ ଥିବା ବେଳେ ବାସ୍ତବରେ ଏହାର ସଂଖ୍ୟା ଯଥେଷ୍ଟ ଅଧିକ ଥିଲା। ଦୀର୍ଘ ୪ ପୁରୁଷ ଧରି ଭାରତୀୟ ଭାବେ ଗର୍ବ କରୁଥିବା ଏହି ଶରଣାର୍ଥୀଙ୍କୁ ସିଏଏ ଏକ ଅମୋଘ ଅସ୍ତ୍ର ହେବ ବୋଲି ସେ ପ୍ରକାଶ କରିଛନ୍ତି।
