ଭୁବନେଶ୍ୱର,୧୪।୯ (ବ୍ୟୁରୋ): ଆୟକର ଟିକସ ରିଫଣ୍ଡ୍ ଠକେଇ ମାମଲାରେ କ୍ରାଇମ୍ବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଦିଲ୍ଲୀ ଏନ୍ସିଆର୍ ଅଞ୍ଚଳରୁ ଜଣେ ଚାର୍ଟାଡର୍ର୍ ଆକାଉଣ୍ଟାଣ୍ଟ୍(ଇଣ୍ଟରମିଡିଏଟ)ଙ୍କୁ ଗିରଫ କରିଛି। ସେ ହେଲେ ହରିୟାଣା ଫରିଦାବାଦ୍ର ନୀରଜ ସିଙ୍ଗ୍ଲା(୨୮)। ଅଭିଯୁକ୍ତ ନୀରଜଙ୍କୁ ଗତ ଶୁକ୍ରବାର ଗିରଫ ପରେ ଫରିଦାବାଦ୍ ଜେଏମ୍ଏଫ୍ସି କୋର୍ଟକୁ ଚାଲାଣ କରାଯାଇଥିଲା। ସେଠାରୁ ଅଭିଯୁକ୍ତଙ୍କୁ ୩ଦିନିଆ ଟ୍ରାଞ୍ଜିଟ ରିମାଣ୍ଡରେ ଆଣି ଇଓଡବ୍ଲ୍ୟୁ ମଙ୍ଗଳବାର ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ହାଜର କରିଥିଲା। ଜାମିନ ନାମଞ୍ଜୁର ହେବାରୁ ନୀରଜଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ନୀରଜଙ୍କୁ ୩ ଦିନିଆ ରିମାଣ୍ଡରେ ନେବାକୁ ଇଓଡବ୍ଲ୍ୟୁ ଆବେଦନ କରିଥିଲା। ଏନେଇ ଅନୁମତି ମିଳିଥିବା ବେଳେ ବୁଧବାର ଅପରାହ୍ନଠୁ ତାଙ୍କୁ ଜେଲରୁ ଅଣାଯାଇ ପଚରାଉଚରା କରାଯିବ। ଏଥିସହ ଏହି ର଼୍ୟାକେଟରେ ଥିବା ଅନ୍ୟମାନଙ୍କୁ ଗିରଫ କରାଯିବାକୁ ଚେଷ୍ଟା କରାଯିବ ବୋଲି ଇଓଡବ୍ଲ୍ୟୁ ଏସ୍ପି ଦିଲୀପ ତ୍ରିପାଠୀ କହିଛନ୍ତି।
ସୂଚନା ଅନୁଯାୟୀ, ଅଭିଯୁକ୍ତ ନୀରଜଙ୍କ ଏମ୍/ଏସ୍ ଅଲ୍ ଇଣ୍ଡିଆ ଟ୍ରାନ୍ସପୋର୍ଟ ସର୍ଭିସେସ୍, ସିକେଏସ୍ ଆକାଉଷ୍ଟିକ୍ସ ଓ ଏମ୍/ଏସ୍ ଜିଡିଏସ୍ ଆସୋସିଏସ୍ଟ୍ସ ନାମରେ ୩ କମ୍ପାନୀ ରହିଛି। ଅଭିଯୁକ୍ତ ନୀରଜ ଏବଂ ଅନ୍ୟମାନେ ଟିଡିଏସ୍ ରିଫଣ୍ଡ ଠକେଇ କରିବାକୁ ଆପରାଧିକ ଯୋଜନା କରିଥିଲେ। ରସୁଲଗଡ଼ସ୍ଥିତ ଏମ୍/ଏସ୍ ଆଇଏଏମ୍ଓ ସଲ୍ୟୁଶନ୍ ପ୍ରାଇଭେଟ ଲିମିଟେଡ୍ କମ୍ପାନୀର ୨୦୧୯-୨୦ ଚାଲାଣକୁ ୨୦୨୦-୨୧ର ଦର୍ଶାଇ ଟିଡିଏସ୍ ରିଫଣ୍ଡ ପାଇବାକୁ ଆୟକର ବିଭାଗରେ ଆବେଦନ କରିଥିଲେ। ୩୨ ଜଣ ହିତାଧିକାରୀଙ୍କୁ ୨.୭୦ କୋଟି ଟଙ୍କା ଟିଡିଏସ୍ ରିଫଣ୍ଡ ମିଳିବାକୁ ଥିବା ତାଙ୍କ ଆବେଦନରେ ଦର୍ଶାଇଥିଲେ। ଏହାପରେ ଆୟକର ବିଭାଗ ପକ୍ଷରୁ ପର୍ଯ୍ୟାୟକ୍ରମେ ୧.୪୦ କୋଟି ଟଙ୍କା ଦିଆଯିବା ପରେ ଫେକ୍ ବୋଲି ଜଣାପଡ଼ିବାରୁ ଏହା ଉପରେ ରୋକ ଲାଗିଥିଲା। ଏହି ଠକେଇ ର଼୍ୟାକେଟ ବିଷୟରେ ଜଣାପଡ଼ିବା ପରେ ଆୟକର ବିଭାଗ ପକ୍ଷରୁ ଇଓଡବ୍ଲ୍ୟୁରେ ଅଭିଯୋଗ ହୋଇଥିଲା। ଇଓଡବ୍ଲ୍ୟୁ ଅଗଷ୍ଟ ୨୭ରେ ଆଇଟି ଆକ୍ଟ ସହ ଆଇପିସିର ବିଭିନ୍ନ ଦଫାରେ ଏକ ମାମଲା (ନଂ.୧୫/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ୧ କୋଟି ୪୦ ଲକ୍ଷ ଠକେଇ ଟଙ୍କା ମଧ୍ୟରୁ ୧୭.୭୭ ଲକ୍ଷ ଟଙ୍କା ଅଭିଯୁକ୍ତ ନୀରଜଙ୍କ ଦ୍ୱାରା ଠକେଇ କରାଯାଇଥିବା ଜଣାପଡ଼ିଥିଲା। ଏପରି କି ବାକି ଟଙ୍କା ଅନ୍ୟ ଅଭିଯୁକ୍ତଙ୍କ ଆକାଉଣ୍ଟକୁ ଯାଇଥିବା ଇଓଡବ୍ଲ୍ୟୁ ଜାଣିବାକୁ ପାଇଛି।
