ଚମ୍ପୁଆ, ୨୧।୪(ଡି.ଏନ୍.ଏ.): ଅଫିସ କାର୍ଯ୍ୟରେ ଯାଉଥିବା ବେଳେ ଦୁର୍ଘଟଣାଗ୍ରସ୍ତଙ୍କୁ ନିଜ ଗାଡିରେ ଆଣି ମାନବିକତାର ନିଦର୍ଶନ ଦେଖାଇଛନ୍ତି ଚମ୍ପୁଆ ବିଡିଓ ଜ୍ୟୋତ୍ସ୍ନା ନାଏକ। ଖୁବ୍କମ୍ ଦିନ ଭିତରେ ଚମ୍ପୁଆ ବ୍ଲକର ଦାୟିତ୍ୱ ନେଇଥିବା ଜ୍ୟୋତ୍ସ୍ନାଙ୍କ ମାନବିକତା ପାଇଁ ତାଙ୍କୁ ଜନସାଧାରଣ ସାଧୁବାଦ ପ୍ରଦାନ କରିଛନ୍ତି। ସୂଚନା ଅନୁସାରେ ବୁଧବାର କାଳିକାପ୍ରସାଦ ଡଙ୍ଗାକଟା ନାଳ ନିକଟରେ ଏକ ବାଇକ ଦୁର୍ଘଟଣାଗ୍ରସ୍ତ ହୋଇଥିଲା। ଉକ୍ତ ବାଇକ୍ରେ ବିନୋଦ ଗିରି ଓ ତାଙ୍କ ଭଉଣୀ ଟୁରି ସାନନଈ ଯାଉଥିଲେ। ହଠାତ୍ ବ୍ରେକ୍ ମାରିବାରୁ ବାଇକ୍ରୁ ଉଭୟ ଛିଟିକି ପଡିଥିଲେ। ଫଳରେ ଟୁରି ଗିରିଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ସମାନ ଦିଗରୁ ଅଫିସ କାର୍ଯ୍ୟରୁ ଫେରୁଥିବା ବିଡିଓ ଏହା ଦେଖି ତୁରନ୍ତ ଟୁରିଙ୍କୁ ଉଦ୍ଧାର କରି ନିଜ ଗାଡିରେ ଚମ୍ପୁଆ ଡାକ୍ତରଖାନା ପହଞ୍ଚାଇବା ସହିତ ପ୍ରାଥମିକ ଚିକିତ୍ସା ପାଇଁ ଡାକ୍ତର ଭୀଷ୍ମ ପରିଡାଙ୍କ ସହ ଆଲୋଚନା କରିଥିଲେ।
