ଯୋଡ଼ା,୧୬ା୨(ମାନସ ମହାନ୍ତି): କେନ୍ଦୁଝର ଜିଲା ଚମ୍ପୁଆ ବିଧାନସଭା କ୍ଷେତ୍ର ୨୦୦୯ଠାରୁ ଚର୍ଚ୍ଚାରେ ରହିଆସିଛି। ଅତୀତରେ କଂଗ୍ରେସର ଗଡ଼ କୁହାଯାଉଥିବା ଏହି ନିର୍ବାଚନମଣ୍ଡଳୀରେ ସ୍ବାଧୀନ ପ୍ରାର୍ଥୀ ଭାବେ ଜିତୁ ପଟ୍ଟନାୟକ ୨୦୦୯ରେ ଜିତିଥିବା ବେଳେ ୨୦୧୪ରେ ସନାତନ ମହାକୁଡ଼ ମଧ୍ୟ ସ୍ବାଧୀନ ପ୍ରାର୍ଥୀ ଭାବେ ବିଜୟଲାଭ କରି ପତିଆରା ଦେଖାଇଥିଲେ। ୨୦୧୯ରେ ବିଜେଡିରୁ ମୀନାକ୍ଷୀ ମହାନ୍ତ ବିଧାୟକ ହୋଇଥିଲେ।
ଖଣି ଅଞ୍ଚଳ ହୋଇଥିବାରୁ ଏହାକୁ ରାଜ୍ୟର ଅନ୍ୟତମ ଧନୀ ବିଧାନସଭା କ୍ଷେତ୍ର ଭାବେ ଅଭିହିତ କରାଯାଇଥାଏ। ବର୍ତ୍ତମାନ ଆସନ ବିଜେଡି ହାତରେ ଥିବା ବେଳେ ଆଗାମୀ ନିର୍ବାଚନ ପାଇଁ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସରେ ଆଶାୟୀଙ୍କ ସଂଖ୍ୟା ବଢ଼ିଚାଲିଲାଣି। ରାଜନୈତିକ ବିଶେଷଜ୍ଞଙ୍କ ମତରେ ଏହି ଆଶାୟୀଙ୍କ ମଧ୍ୟରୁ କେତେକେ ଟିକେଟ ନ ପାଇଲେ ହୁଏତ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ରଣାଙ୍ଗନକୁ ଆସିପାରନ୍ତି।
ବର୍ତ୍ତମାନର ସ୍ଥିତି ଦେଖିଲେ ଦୁଇ ପ୍ରମୁଖ ଦଳ ବିଜେଡି, ଭାଜପା ରହିଥିବା ବେଳେ ଏଠାରେ କଂଗ୍ରେସର ସେଭଳି ପ୍ରଭାବ ଥିବା ପରିଲକ୍ଷିତ ହେଉନାହିଁ। ପୂର୍ବତନ କଂଗ୍ରେସ ବିଧାୟକ ଧନୁର୍ଜୟ ସିଦ୍ଧୁ କଂଗ୍ରେସ ଛାଡ଼ି ପ୍ରଥମେ ଭାଜପା ଓ ପରେ ବିଜେଡିକୁ ଡିଆଁ ମାରିଥିଲେ। ସେହିପରି ଏବର ବିଜେଡି ଜିଲା ସଭାପତି ତଥା ପୂର୍ବତନ ସାଂସଦ ମାଧବ ସର୍ଦ୍ଦାର କଂଗ୍ରେସରୁ ଆସି ବିଜେଡିରେ ମିଶିଛନ୍ତି। ଅନେକ ଟାଣୁଆ ନେତା ବିଜେଡି ମୁହଁା ହୋଇଥିବାରୁ ଦଳରେ ଆଶାୟୀଙ୍କ ସଂଖ୍ୟା ବୃଦ୍ଧି ପାଇଛି।
ଯଦିଓ ଦଳ ଏ ପର୍ଯ୍ୟନ୍ତ କୌଣସି ନିଷ୍ପତ୍ତିି ନେଇ ନାହିଁ, ତେଣୁ ଆଶାୟୀ ଯେଝା ବାଟରେ ଭୁବନେଶ୍ୱର ଯାଇ ଟିକେଟ ଲବି କରୁଥିବା ଶୁଣିବାକୁ ମିଳିଛି। ବିଜେଡି ନେତା କୁଶ ଆପଟ, ବିଧାୟିକା ମୀନାକ୍ଷୀ ମହାନ୍ତ, ବଡ଼ବିଲ ପୌରାଧ୍ୟକ୍ଷ ଲକ୍ଷ୍ମଣ ମହାନ୍ତ, ଖଣି ତଥା ଶିଳ୍ପ ମାଲିକ ଶ୍ରୀନିବାସ ସାହୁ, ଯୋଡ଼ା ଟ୍ରକ୍ ମାଲିକ ସଂଘ ସମ୍ପାଦକ ସୁଶାନ୍ତ ବାରିକ, ରମଣୀ ନାଏକ ଏବଂ ଚମ୍ପୁଆ ଏନ୍ଏସି ଅଧ୍ୟକ୍ଷ ଗିରିଜା ଶଙ୍କର ସାହୁ ପ୍ରମୁଖଙ୍କ ନାମ ଆଶାୟୀ ଭାବେ ରହିଥିବା ଆଲୋଚନା ହେଉଛି। ଏଭଳି ସମୟରେ ଶୁଭଶ୍ରୀ ନାୟକ ନାମ୍ନୀ ଜଣେ ମହିଳା ବିଜେଡି ସଭାପତି ନବୀନ ପଟ୍ଟନାୟକଙ୍କ ଫଟୋ ଥିବା ପୋଷ୍ଟର ମାରି ଚର୍ଚ୍ଚାକୁ ଆସିଛନ୍ତି। ସେହିପରି ପୂର୍ବତନ ସ୍ବାଧୀନ ବିଧାୟକ ସନାତନ ମହାକୁଡ଼ ସମ୍ବଲପୁର ଓ କେନ୍ଦୁଝରରେ ହୋଇଥିବା କାର୍ଯ୍ୟକ୍ରମକୁ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ଙ୍କ ନିକଟତର ହେବାକୁ ଚେଷ୍ଟା କରିଛନ୍ତି। ଏହାକୁ ନେଇ ସନାଙ୍କ ସମର୍ଥକଙ୍କ ମଧ୍ୟରେ ତାଙ୍କ ନେତାଙ୍କ ଟିକେଟ ଆଶା ଉଜ୍ଜୀବିତ କରିଛି। ଆଶାୟୀଙ୍କ ସଂଖ୍ୟା ବଢୁଥିବାରୁ ତାହା ଦଳ ପାଇଁ ଅଡ଼ୁଆ ସ୍ଥିତି ସୃଷ୍ଟି କରିବ ବୋଲି ଆଲୋଚନା ହେଉଛି।
ଗତ ନିର୍ବାଚନରେ ବିଜେଡି ଓ ଭାଜପା ମଧ୍ୟରେ ଭୋଟ ବ୍ୟବଧାନ କମିଥିଲା। ଆସନ୍ତା ନିର୍ବାଚନରେ ଏହି ଦୁଇ ଦଳ ଭିତରେ ଲଢ଼େଇ ହୋଇପାରେ ବୋଲି କୁହାଯାଉଛି। ବିଜେଡି ଭଳି ଭାଜପାରେ ମଧ୍ୟ ଆଶାୟୀ ସଂଖ୍ୟା ବୃଦ୍ଧି ପାଇଛି। ସେମାନଙ୍କ ମଧ୍ୟରେ ମୁରଲୀ ଶର୍ମା, ସୁକେଶି ଓରାମ ଓ ଅଗନୁ ଚରଣ ମହାନ୍ତ ପ୍ରମୁଖ ଅଛନ୍ତି। ଅନ୍ୟପକ୍ଷରେ କଂଗ୍ରେସରେ ବିପ୍ଳବ ମିଶ୍ର, ଯଦୁମଣି ବାରିକ, ସରୋଜ ଓରାମ, ଗୁରୁ ବକ୍ସସିଂ ଆହଲୁୱାଲିଆ ପ୍ରମୁଖ ଆଶାୟୀ ଅଛନ୍ତି।
ବିଜୁ ଜନତା ଦଳ ସ୍ବାସ୍ଥ୍ୟ ବୀମା, ୫-ଟି ଜରିଆରେ ହୋଇଥିବା ବିକାଶକୁ ନେଇ ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଥିବା ବେଳେ ଖଣି, ଶିଳ୍ପ ସମୃଦ୍ଧ ଅଞ୍ଚଳରେ ଯୁବତୀଯୁବକଙ୍କ ବେରୋଜଗାର ସମସ୍ୟା, ଅତୀତରେ ଏଠାରେ ଘୋଷଣା କରାଯାଇଥିବା ନୂଆ ବସ୍ଷ୍ଟାଣ୍ଡ ଓ ହସ୍ପିଟାଲର ଉନ୍ନତୀକରଣ ଉପରେ ଭୋଟର ପ୍ରଶ୍ନ କରୁଛନ୍ତି। ସେହିପରି ଭାଜପା ପକ୍ଷରୁ ରାମ ମନ୍ଦିର, ମୋଦିଙ୍କ ଗ୍ୟାରେଣ୍ଟି ବିଷୟରେ କୁହାଯାଇ ଭୋଟରଙ୍କୁ ବିଶ୍ୱାସକୁ ଆଣିବା ଲାଗି ଚେଷ୍ଟା କରାଯାଉଥିଲେ ମଧ୍ୟ ଲୋକେ ସ୍ଥାନୀୟ ଅଞ୍ଚଳର ସମସ୍ୟାଗୁଡ଼ିକୁ ନେତାମାନଙ୍କୁ ଦର୍ଶାଉଛନ୍ତି। ଏଥିରେ ମୁଖ୍ୟତଃ ଯାତ୍ରୀବାହୀ ରେଳଗାଡ଼ିର ଅଭାବ ଓ ଅଧାପନ୍ତରିଆ ଜାତୀୟ ରାଜପଥ ଆଦିି ରହିଛି।
ଚମ୍ପୁଆ ରାଜନୀତିରେ ସବୁବେଳେ ସ୍ବାଧୀନ ପ୍ରାର୍ଥୀମାନେ ପ୍ରମୁଖ ଭୂମିକା ଗ୍ରହଣ କରିଥାନ୍ତି। ଭତ୍ତା ଦେଇ ଭୋଟରଙ୍କୁ ଆକୃଷ୍ଟ କରିବା ହେଉ ବା ସିନେମା ଜଗତର ନାମୀଦାମୀ କଳାକାରଙ୍କୁ ଆଣି ଏଠାରେ ଭୋଟରଙ୍କୁ ଆକୃଷ୍ଟ କରିବାର ଦୃଶ୍ୟ ଅତୀତରେ ବାରମ୍ବାର ଦେଖିବାକୁ ମିଳିଛି। ଯଦି ୨୦୦୦ ମସିହାରୁ ଦେଖାଯାଏ ଚମ୍ପୁଆ ନିର୍ବାଚନମଣ୍ଡଳୀରେ ଜଣେ ନେତା ଦୁଇ ଥର ଜିତିଥିବାର ନଜିର ନାହିଁ। ତେଣୁ ୨୦୨୪ ସାଧାରଣ ନିର୍ବାଚନରେ କିଏ କେଉଁ ଦଳରୁ ପ୍ରାର୍ଥୀ ହୋଇ ଜିତାପଟ ମାରୁଛନ୍ତି, ତାହାକୁ ଅପେକ୍ଷା।
