ପିପିଲି, ୮ା୪(ସ୍ବ.ପ୍ର): ଉପନିର୍ବାଚନ ପୂର୍ବରୁ ବୁଧବାର ଅତିରିକ୍ତ ପୋଲିସ ମହାନିର୍ଦ୍ଦେଶକ(ଆଇନ ଶୃଙ୍ଖଳା) ଯଶଓ୍ବନ୍ତ ଜେଠଓ୍ବା ପିପିଲି ଗସ୍ତ କରି ଆଇନଶୃଙ୍ଖଳା ପରିସ୍ଥିତି ସମ୍ପର୍କରେ ବରିଷ୍ଠ ପୋଲିସ ଅଧିକାରୀଙ୍କ ସହ ଆଲୋଚନା କରିଛନ୍ତି। ନିର୍ବାଚନକୁ ସ୍ବଚ୍ଛ, ନିରପେକ୍ଷ ଓ ଶାନ୍ତିଶୃଙ୍ଖଳାରେ କରିବା ପାଇଁ ସମସ୍ତ ବ୍ୟବସ୍ଥା ଉପରେ ଗୁରୁତ୍ୱ ଦେଇଛନ୍ତି। ନିର୍ବାଚନ ସୁପରିଚାଳନା ପାଇଁ ଏବେ ୧୮ପ୍ଲାଟୁନ୍ ଓଏସ୍ଏପି ଫୋର୍ସ ମୁତୟନ କରାଯାଇଛି। ଏଥିସହ ଖୁବ୍ଶୀଘ୍ର ୩ କମ୍ପାନୀ କେନ୍ଦ୍ରୀୟ ଫୋର୍ସ ନିର୍ବାଚନ ମଣ୍ଡଳୀରେ ମୁତୟନ ହେବେ ବୋଲି ଜେଠଓ୍ବା କହିଛନ୍ତି। ଉପନିର୍ବାଚନକୁ ଦୃଷ୍ଟିରେ ରଖି ପିପିଲି ଓ ଡେଲାଙ୍ଗ ଥାନା ଅଞ୍ଚଳରେ ବିଭିନ୍ନ ଅପରାଧମୂଳକ କାର୍ଯ୍ୟରେ ସମ୍ପୃକ୍ତ ଥିବା ଅଭିଯୋଗରେ ୫୦ଜଣଙ୍କୁ ଗିରଫ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏଥିସହ ଶାନ୍ତି ଭଙ୍ଗ କରିବା ସମ୍ଭାବନାରେ ୮୦୦ଜଣ ବ୍ୟକ୍ତି ବିଶେଷଙ୍କୁ ଚିହ୍ନଟ କରାଯାଇ ୧୦୭,୧୧୦ ଦଫାରେ କାର୍ଯ୍ୟାନୁଷ୍ଠାନ ନିଆଯାଇଛି ା ଏପରି କି ଅସ୍ତ୍ରଶସ୍ତ୍ର ଲାଇସେନ୍ସର ବିବରଣୀ ପ୍ରଶାସନ ନିକଟରେ ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଇଛି ା ସ୍ବତନ୍ତ୍ର ସ୍କ୍ବାଡ୍ ଗଠନ କରାଯାଇ ବିଭିନ୍ନ ବେଆଇନ ଗତିବିଧି ଉପରେ ତୀକ୍ଷ୍ଣ ଦୃଷ୍ଟି ରଖାଯାଇଛି। ହିଂସାମତ୍କ କାର୍ଯ୍ୟକଳାପ ସହିତ ଚୋରା ମଦ କାରବାର ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜିଲା ପୋଲିସକୁ ଜେଠଓ୍ବା ନିର୍ଦ୍ଦେଶ ଦେଇଛନ୍ତି। ପିପିଲି ତଥା ଜିଲା ସହ ସଂଲଗ୍ନ ୫ଟି ପ୍ରବେଶ ଓ ସୀମାବର୍ତ୍ତୀ ପଥକୁ ମାର୍କିଂ କରି ନାକାବନ୍ଦୀ କରିବା ସହ ୧୦ଟି ସ୍ଥାନରେ ସିସି କ୍ୟାମେରାରେ ସମସ୍ତ ଦୃଶ୍ୟ ନଜର ରଖିବାର ସ୍ବତନ୍ତ୍ର ବ୍ୟବସ୍ଥା କରାଯାଇଛି। ସେହି ଅଞ୍ଚଳଦେଇ ପିପିଲିକୁ ଆସୁଥିବା ସମସ୍ତ ମୋଟରଯାନକୁ କଡ଼ାକଡ଼ି ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଛି। ବିଭିନ୍ନ ବୁଥ୍ର ବର୍ଗୀକରଣ କରାଯିବା ସହ ସମ୍ବେଦନଶୀଳ ଓ ଅତିସମ୍ବେଦନଶୀଳ ବୁଥ୍ ଚିହ୍ନଟ କରି ସେଠାରେ ଅଧିକରୁ ଅଧିକ ପୋଲିସ ବାହିନୀ ସହିତ କେନ୍ଦ୍ରୀୟ ସୁରକ୍ଷାବଳକୁ ମୁତୟନ କରାଯିବ ବୋଲି ଜେଠୱା କହିଛନ୍ତି। ନିର୍ବାଚନ ଆୟୋଗଙ୍କ ନିୟମ ଅନୁଯାୟୀ କୋଭିଡ୍ ନିୟମର ଅନୁପାଳନ ଓ ଆଦର୍ଶ ଆଚରଣ ବିଧି ସଂକ୍ରାନ୍ତରେ ସେ ଉପସ୍ଥିତ ଅଧିକାରୀଙ୍କ ସହ ଆଲୋଚନା କରିଥିଲେ। ଏହି ସମୀକ୍ଷା ବୈଠକରେ କେନ୍ଦ୍ରାଞ୍ଚଳ ଆଇଜି ଜୟନାରାୟଣ ପଙ୍କଜ, ଡିଆଇବି ଡିଏସ୍ପି ହୃଷୀକେଶ ପଣ୍ଡା, ପୁରୀ ଏସ୍ପି କନ୍ୱର ବଲୱନ୍ତ ସିଂ, ଅତିରିକ୍ତ ଏସ୍ପି ପ୍ରଫୁଲ୍ଲ ଚନ୍ଦ୍ର ବଡ଼ଜେନା, ପିପିଲି ଏସଡିପିଓ ଦେବଦତ୍ତ ବରାଳ, ପିପିଲି ଥାନା ଅଧିକାରୀ ଗୌରାଙ୍ଗ ଚରଣ ପୃଷ୍ଟି, ଡେଲାଙ୍ଗ ଥାନା ଅଧିକାରୀ ରଶ୍ମିରଞ୍ଜନ ପଟ୍ଟନାୟକ, ବଳଙ୍ଗା ଓଆଇସି ସମର କୁମାର ପାଇକରାୟ , ସତ୍ୟବାଦୀ ଥାନା ଅଧିକାରୀ ଦେବୀପ୍ରସାଦ ପାତ୍ର ପ୍ରମୁଖ ଉପସ୍ଥିତ ଥିଲେ।
