ନୂଆଦିଲ୍ଲୀ,୧୦ ।୧୨: ଗତ ବୁଧବାର କୁନ୍ନୁରର ନୀଳଗୀରି ଅଞ୍ଚଳରେ ବାୟୁସେନାର ଏମ୍ଆଇ୧୭ ଭି୫ ହେଲିକପ୍ଟର ଦୁର୍ଘଟଣା ହେବା ଫଳରେ ଦେଶର ପ୍ରଥମ ଚିଫ୍ ଅଫ୍ ଡିଫେନ୍ସ ଷ୍ଟାଫ୍(ସିଡିଏସ୍) ଜେନେରାଲ ବିପିନ ରାୱତ ଓ ତାଙ୍କ ପତ୍ନୀ ମଧୁଲିକା ରାୱତଙ୍କ ସମେତ ୧୩ ଜଣ ଶହୀଦ ହୋଇଥିଲେ । ଏବେ ପ୍ରତିରକ୍ଷା ମନ୍ତ୍ରଣାଳୟର ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଘଟଣାର ଯାଞ୍ଚ କରାଯାଉଛି । ଏୟାର ମାର୍ଶାଲ ମାନବେନ୍ଦ୍ର ସିଂଙ୍କ ନେତୃତ୍ୱରେ ଟିମ୍ ପାଣିପାଗର ସ୍ଥିତି ଓ ଦୁର୍ଘଟଣାର କାରଣ ଜାଣିବା ପାଇଁ ଦୁର୍ଘଟଣା ସ୍ଥଳରେ ଡ୍ରୋନ୍ ଲଗାଇଛନ୍ତି । ଫ୍ଲାଇଟ ଡାଟା ରେକର୍ଡ ପ୍ରଥମରୁ ସଂଗ୍ରହ କରାଯାଇଛି । ଟିମ୍ ବିସ୍ତୃତ ଭାବେ ଟେକନିକ ମୂଲ୍ୟାଙ୍କନ କରିବ ଓ ମନ୍ତ୍ରଣାଳୟକୁ ରିପୋର୍ଟ ଦେବ । ବାୟୁସେନା ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଯଦି ଉଡାଣ ଡାଟା ରେକର୍ଡରରେ ପେନ ଡ୍ରାଇଭକୁ ନେଇ କିଛି ଅସୁବିଧା ଉପୁଜେ ତେବେ ଟିମ୍ ରୁଷିଆ ପ୍ରତିରକ୍ଷା ବିଶେଷଜ୍ଞ ଟିମଙ୍କ ସାହାଯ୍ୟ ନେଇପାରେ । କାରଣ ଦୁର୍ଘଟଣା ହୋଇଥିବା ଏମ୍ଆଇ ୧୭ ଭି୫ ହେଲିକପ୍ଟର ରୁଷିଆ ଦ୍ୱାରା ନିର୍ମିତ ।
