ପ୍ୟାରିସ, ୩୦ା୬ ବ୍ରିଟେନର ମାର୍କ କାଭେଣ୍ଡିସ ଟୁର୍ ଡି’ ଫ୍ରାନ୍ସର ଚତୁର୍ଥ ଷ୍ଟେଜ୍ ଜିତିଛନ୍ତି। ୫ ବର୍ଷରେ ଏହା ହେଉଛି ତାଙ୍କର ପ୍ରଥମ ଏବଂ ଟୁର୍ରେ ମୋଟ ଉପରେ ଏହା ହେଉଛି ତାଙ୍କର ୩୧ତମ ଷ୍ଟେଜ୍ ବିଜୟ। ମଙ୍ଗଳବାର ରେଡନଠାରୁ ଫୋଗର୍ସ ୧୫୦.୪ କିଲୋମିଟର ଦୂରତା ବିଶିଷ୍ଟ ଏହି ରେସ୍ରେ କାଭେଣ୍ଡିସଙ୍କ ପଛକୁ ଯଥାକ୍ରମେ ନାସେର ବୋହାନି ଓ ଜାସ୍ପର ଫିଲିପ୍ସେନ୍ ରହିଥିଲେ। ଡଚ୍ ରାଇଡର ମାଥ୍ୟୁ ଭାନ୍ ଡର ପୋଏଲ ଓଭର ଅଲ୍ ଲିଡର ଭାବେ ୟେଲୋ ଜର୍ସି ବଜାୟ ରଖିଥିଲେ। ଆଉ ୩ଟି ଷ୍ଟେଜ୍ ଜିତିଲେ ଡିସେନିକ୍-କ୍ୱିକ୍-ଷ୍ଟେପ୍ ଟିମ୍ର କାଭେଣ୍ଡିସ୍ ଏଡି ମର୍କକ୍ସଙ୍କ ସର୍ବକାଳୀନ ୩୪ ଷ୍ଟେଜ୍ ବିଜୟର ସମକକ୍ଷ ହେବେ। ସୋମବାର ତୃତୀୟ ଷ୍ଟେଜ୍ ରେସ୍ ବେଳେ ଦୁର୍ଘଟଣାର ସମ୍ମୁଖୀନ ହୋଇଥିବା କେତେଜଣ ରାଇଡର ବିକ୍ଷୋଭ ପ୍ରଦର୍ଶନ କରିବାରୁ ରେସ୍ ୧ ମିନିଟ ଅଟକି ଥିଲା। ସେମାନଙ୍କ ମଧ୍ୟରେ ଜରେଣ୍ଟ ଥୋମାସ ଓ ୨୦୨୦ ରନର୍ସଅପ୍ ପ୍ରିମୋଜ ରୋଗ୍ଲିିକ୍ ଅନ୍ୟତମ ଥିଲେ।
