ଭୁବନେଶ୍ୱର, ୧୬।୬ (ବନ୍ଦନା ସେଠୀ): ରାଜଧାନୀବାସୀଙ୍କୁ ମିଳିବ ‘କ୍ୟାଟେଲ ଥେରାପି’। ଏଥିପାଇଁ ଭୁବନେଶ୍ୱରସ୍ଥିତ ଜାମୁକୋଳିଠାରେ ନିର୍ମାଣ ହେବ ଆଉଏକ ବୃହତ୍ ଗୋଶାଳା। ଅତ୍ୟାଧୁନିକ ସୁବିଧା ସହ ଏଠାରେ ଏକ ସଙ୍ଗରେ ପ୍ରାୟ ୫ହଜାର ଗୋରୁ ରହିବା ପାଇଁ ବ୍ୟବସ୍ଥା କରାଯିବ। ତେବେ ଏହି ଗୋଶାଳାକୁ ବେଙ୍ଗାଲୁରୁ ଢାଞ୍ଚାରେ ନିର୍ମାଣ କରାଯିବ। ଏନେଇ ବିଏମ୍ସିର ଏକ ସ୍ବତନ୍ତ୍ର ଟିମ୍ ବେଙ୍ଗାଲୁରୁରେ ଥିବା ଶ୍ରୀଶ୍ରୀ ଗୋଶାଳା ବୁଲି ଦେଖିବା ସହ ଏହାର ମଡେଲକୁ ଅନୁକରଣ କରିଛନ୍ତି। ଏହି ଗୋଶାଳାରେ ଅତ୍ୟାଧୁନିକ ସୁବିଧା ଯେପରିକି – ଗୋରୁଙ୍କ ପାଇଁ ଥିବା ପାଣି କୁଣ୍ଡରେ ସେନ୍ସର ଦ୍ୱାରା ପାଣି ଭର୍ତ୍ତି କରାଯିବ। ଗୋବର ସଫା କରିବାକୁ ପଡିବ ନାହିଁ, ଏହା ଆପେ ଆପେ ଯାଇ ବାୟୋଗ୍ୟାସ୍ ଚାମ୍ବରରେ ପଡିବ। ଅପରପକ୍ଷେ ପ୍ରଥମ କରି ଏଠାରେ ଲୋକମାନେ କ୍ୟାଟେଲ ଥେରାପି ପାଇପାରିବେ। ଗାଈ କିମ୍ବା ଷଣ୍ଢଙ୍କୁ କୁଣ୍ଢାଇ ଧରି ତାଙ୍କ ବେକରେ ଓହଳିବା ଦ୍ୱାରା ଉଚ୍ଚ ରକ୍ତଚାପ କମିଥାଏ ବୋଲି ଗବେଷଣାରୁ ଜଣାପଡିଛି। ବେଙ୍ଗାଲୁରୁର ଗୋଶାଳାରେ ଏଭଳି ଥେରାପି କରାଯାଉଛି। ତେଣୁ ଏଠାରେ ମଧ୍ୟ ସେଭଳି ଏକାଧିକ ବ୍ୟବସ୍ଥା କରାଯିବ। ସେହିପରି ଏଠାକୁ ଆସିବାକୁ ଥିବା ପରିଦର୍ଶକଙ୍କ ରହଣି ବ୍ୟବସ୍ଥା କରାଯିବ। ଦିନେ ଦୁଇଦିନ ରହି କ୍ୟାଟେଲ ଥେରାପି ନେଇପାରିବେ ବୋଲି ବିଏମ୍ସି ଡେପୁଟି କମିଶନର ରମେଶ ଚନ୍ଦ୍ର ଜେନା ସୂଚନା ଦେଇଛନ୍ତି। ଗୋଶାଳାରେ ଗୋରୁଙ୍କ ପାଇଁ ସ୍ବତନ୍ତ୍ର ଶେଡ୍ ଓ ଘାସଚାଷ ଲାଗି ଜାଗା ରହିବ। ଏହା ପରିସରରେ ଗଛ ଲାଗିବ। ଗୋରୁମାନେ ବାହାରେ ବୁଲିବା ସହ ବିଶ୍ରାମ ନେଇପାରିବେ। ସେହିପରି ଅତ୍ୟାଧୁନିକ ମେଶିନ ଲଗାଯିବ। ନୂତନ ଗୋଶାଳାରେ ବାୟୋଗ୍ୟାସ ପ୍ଲାଣ୍ଟ ନିର୍ମାଣ ହେବ। ଗୋ-ମୂତ୍ରରୁ ଔଷଧୀୟ ଉତ୍ପାଦ ମଧ୍ୟ ପ୍ରସ୍ତୁତ କରାଯିବ। ୭ଦିନ ମଧ୍ୟରେ ଆର୍କିଟେକ୍ଚର ପ୍ଲାନ ପ୍ରସ୍ତୁତ କରାଯିବ। ଏବେ ପାଚେରି ନିର୍ମାଣ କାମ ଚାଲିଛି। ଜୁନ୍ ଶେଷସୁଦ୍ଧା ଟେଣ୍ଡର ପ୍ରକ୍ରିୟା ଆରମ୍ଭ ହୋଇ ୪ମାସ ମଧ୍ୟରେ ନିର୍ମାଣକାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଥିବା ଜେନା ସୂଚନା କହିଛନ୍ତି।
ଜାମୁକୋଳି ପାଖରେ ଥିବା ପ୍ରାୟ ୨୨ଏକର ଜମିରେ ଏହି ନୂତନ ଗୋଶାଳା ନିର୍ମାଣ କରାଯିବ। ଏଥିରେ ବୁଲା ଗୋରୁଙ୍କୁ ରଖିବାର ବ୍ୟବସ୍ଥା କରାଯିବ। ଏଠାରେ ଏକ ମେଡିକାଲ ହେଲ୍ଥ ସେଣ୍ଟର ରହିବ। ବିଏମ୍ସି ଅତିରିକ୍ତ କମିଶନର ସୂର୍ଯ୍ୟବଂଶୀ ମୟୂର ବିକାଶଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ୍ ବେଙ୍ଗାଲୁରୁରେ ଥିବା ଗୋଶାଳା ବୁଲି ଦେଖିଥିଲେ। ଏହି ଟିମ୍ରେ କର୍ପୋରେଟର ରାଜକିଶୋର ଦାସ, ଅଜିତ୍ ବେହେରା, ଆର୍କିଟେକ୍ଚର, ଇଂଜିନିୟରିଂ ଟିମ୍ ପ୍ରମୁଖ ଥିଲେ। ବିଏମ୍ସି ଅଞ୍ଚଳରେ ଦିନକୁ ଦିନ ବୁଲା ଗୋରୁଙ୍କ ସଂଖ୍ୟା ବଢ଼ିଚାଲିଛି। ଜାମୁକୋଳିଠାରେ ଥିବା ଗୋଶାଳାର ଆୟତନ କମ୍ ହୋଇଥିବାରୁ ସେଠାରେ ସମସ୍ତଙ୍କୁ ରଖିବା ପାଇଁ ଅସୁବିଧା ହେଉଛି। ତେବେ ନୂତନ ଗୋଶାଳା ନିର୍ମାଣ ହେବା ପରେ ଏହି ସମସ୍ୟା ଆଉ ରହିବ ନାହିଁ ବୋଲି କୁହାଯାଇଛି।
