ଭୁବନେଶ୍ୱର,୩୦।୫(ବ୍ୟୁରୋ): ବୟସ ମାତ୍ର ୧୦ ବର୍ଷ, କିନ୍ତୁ ପ୍ରତିଭା ଅନେକ। ପଞ୍ଚମ ଶ୍ରେଣୀରେ ପଢ଼ୁଥିଲେ ମଧ୍ୟ ବହୁ ପୁରସ୍କାରର ଅଧିକାରୀ। ଜଣେ ଅଭିନେତା, ସାମାଜିକ କର୍ମୀ ବ୍ୟତୀତ ତାଙ୍କର ଆଉଏକ ନୂଆ ପରିଚୟକୁ ନେଇ ଏବେ ସବୁଠି ଚର୍ଚ୍ଚା। ନାଁ ତା’ର ଏକାକ୍ଷର ପଟ୍ଟନାୟକ। ହେଲେ ବନ୍ଧୁ, ସମ୍ପର୍କୀୟ ଓ ସୋସିଆଲ ମିଡିଆରେ ସେ ଏବେ ‘କାର୍ ବୟ’ ଭାବେ ପରିଚିତ। କାରଣ ଏତେ ଛୋଟ ବୟସରୁ କାର୍କୁ ନେଇ ତାଙ୍କ ଜ୍ଞାନ, ନିଶା ଓ ସ୍ବପ୍ନ ତାଙ୍କୁ ଏପରି ପରିଚୟ ଦେଇଛି। ଏକାକ୍ଷରଙ୍କ ଘର ଜଟଣୀରେ ହୋଇଥିବାବେଳେ ସେ ପରିବାର ସହ ଭୁବନେଶ୍ୱର ସୁନ୍ଦରପଦାରେ ରହୁଛନ୍ତି। ମାତ୍ର ଦେଢ଼ ବର୍ଷ ବୟସରୁ କାର୍ ପ୍ରତି ତାଙ୍କର ଅହେତୁକ ଆଗ୍ରହ ଦେଖିବାକୁ ମିଳିଥିଲା। ସେ ସମସ୍ତ ଅଗ୍ରଣୀ କାର ଉତ୍ପାଦନକାରୀ କମ୍ପାନୀ, ଲୋକପ୍ରିୟ ମଡେଲଗୁଡିକର ଇତିହାସ, ତିଆରି, ବିକ୍ରୟ, ଭବିଷ୍ୟତର ମଡେଲ, ରୂପାନ୍ତର, ଉତ୍ପାଦନ ସୁବିଧା ଓ ବିକ୍ରୀ ଆଦି ବିଷୟରେ ଚଟାପଟ ଉତ୍ତର ଦେଇପାରନ୍ତି। ଏବେ ସୁଦ୍ଧା ୧୫ହଜାରରୁ ଅଧିକ ଖେଳନା କାର୍ ମଡେଲ୍କୁ ନେଇ ସେ ଏକ ସଂଗ୍ରହାଳୟ କରିଛନ୍ତି। ଏଥିରେ ସବୁ ନାମୀ କମ୍ପାନୀର ବିଭିନ୍ନ ମଡେଲର କାର୍ ରହିଛି। ଏହି କୁନି ବାଳକ ଅବସର ସମୟରେ ଭୁବନେଶ୍ୱର, କଟକ, ପୁରୀ ସହରରେ ଥିବା ସୋରୁମ ଗୁଡିକୁ ପରିଦର୍ଶନ କରି କର୍ମଚାରୀ ଓ ମାଲିକଙ୍କୁ କାର୍ ସମ୍ପର୍କିତ ବିଭିନ୍ନ ପ୍ରଶ୍ନ ପଚାରି ଚକିତ କରିଥାନ୍ତି। କାର୍ ପ୍ରତି ତାଙ୍କର ଏତେ ଦୁର୍ବଳତା ଯେ, ତାଙ୍କ କୋଠରିର ସମସ୍ତ ଆସବାବ ପତ୍ର ମଧ୍ୟ କାର୍ ଆକୃତିର। ସୁଯୋଗ ମିଳିଲେ ବଡ ହୋଇ ଦିନେ ନିଜର କାର ଡିଜାଇନ କରିବେ ବୋଲି ଏକାକ୍ଷର କହିଛନ୍ତି। ତେବେ ସେ ଏପରି ଏକ କାର୍ ଉଦ୍ଭାବନ କରିବା ପାଇଁ ଆଶା ରଖିଛନ୍ତି, ଯେଉଁ କାର୍ ବିନା ଚାଳକରେ ତାଙ୍କ ବାପାଙ୍କୁ ତାଙ୍କ ମନପସନ୍ଦର ସ୍ଥାନକୁ ନେଇ ଯାଇପାରିବ। ବିଭିନ୍ନ କାର ସମ୍ପର୍କରେ ତାଙ୍କର ଏହି ଜ୍ଞାନ ତାଙ୍କୁ ଘରେ ଘରେ ପରିଚିତ କରାଇ ପାରିଛି। ରାଜଧାନୀରେ କୌଣସି କାର୍ ଶୋ’ରୁମ୍ର ଉଦ୍ଘାଟନ୍ କରାଗଲେ ଏକାକ୍ଷରଙ୍କୁ ଖୋଜାପଡୁଛି। ମନ୍ତ୍ରୀ, ବିଧାୟକ, ଅଭିନେତା, ବିଶିଷ୍ଟ ବ୍ୟକ୍ତଙ୍କ ସହିତ ଅତିଥି ଭାବରେ ଯୋଗଦେଇ କାର ସମ୍ପର୍କରେ ବହୁ ଅଜଣା କଥା ଲୋକଙ୍କୁ କହୁଛନ୍ତି। ଏହା ସମସ୍ତଙ୍କୁ ବିସ୍ମିତ କରୁଛି। ପୁଅର ଏଭଳି ପ୍ରତିଭା ସମ୍ପର୍କରେ ପିତା ଅଭିନେତା ରୁଷି ପଟ୍ଟନାୟକ କୁହନ୍ତି, ଏକାକ୍ଷର ତାଙ୍କ ସହ ବାହାରକୁ ଗଲେ ରାସ୍ତା ସାରା କେବଳ କାର ବିଷୟରେ ହିଁ କଥା ହୁଏ। ଏପରିକି ଅଧ କିଲୋମିଟର ଦୂରରେ ଯାଉଥିବା କାର୍କୁ ଦେଖି ସେ ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରିଥାଏ। କୌଣସି ସମ୍ପର୍କୀୟ କାର କିଣିବା ପୂର୍ବରୁ ତା’ର ମତାମତ ନିଅନ୍ତି। ବଡ ହୋଇ ଅଟୋମୋବାଇଲ ଇଞ୍ଜିନିୟରିଂ କିମ୍ବା କାର୍ ଡିଜାଇନ କରିବା ତାର ସ୍ବପ୍ନ ରହିଛି।
