କାକ୍ଟସ୍ ହେଉଛି ଏକ କଣ୍ଟକମୟ ଉଦ୍ଭିଦ; ଯାହାକୁ ଖାଲି ହାତରେ ଧରିବାକୁ ବି ଡର ଲାଗେ। କିନ୍ତୁ ଜାଣିଲେ ଆଶ୍ଚର୍ଯ୍ୟ ହେବେ ମେକ୍ସିକୋର ପୁନ୍ଟା ମିଟାଠାରେ ପର୍ଯ୍ୟଟକଙ୍କୁ କାକ୍ଟସ୍ର ମସାଜ୍ ଦିଆଯାଇଥାଏ; ଆଉ ଯାହାର ଭଲ ଚାହିଦା ବି ସେଠାରେ ରହିଛି। କାରଣ ଏହି ମସାଜ୍ ଯନ୍ତ୍ରଣାଦାୟକ ନ ହୋଇ ବେଶ୍ ଆରାମ ଦାୟକ ହୋଇଥାଏ। ଶୁଣି ଆଶ୍ଚର୍ଯ୍ୟ ଲାଗୁଛି ନା, କଣ୍ଟକିତ ଉଦ୍ଭିଦରେ ପୁଣି ଆରାମଦାୟକ ମସାଜ୍ ! ଆଜ୍ଞା ହଁ, ଏହା ଶତ ପ୍ରତିଶତ ସତ। କାରଣ ଏଠାରେ କାକ୍ଟସ୍ର ସବୁ କଣ୍ଟାକୁ କାଢି ସାରିବା ପରେ ତା’ପରେ ସେଥିରେ ମସାଜ୍ ଦିଆଯାଇଥାଏ। ଏହି ମସାଜ୍ ଥେରାପିରେ ମୁଖ୍ୟତଃ ହାକାଲି କାକ୍ଟସ୍ ବ୍ୟବହାର କରାଯାଉଥିବାରୁ ଏହା ହାକାଲି କାକ୍ଟସ୍ ମସାଜ ନାମରେ ପରିଚିତ। ଚର୍ମରେ ଜଳୀୟ ଅଂଶ ବୃଦ୍ଧି ସହ ଚର୍ମର ଉଜ୍ଜ୍ୱଳତା ବଢାଇବା ପାଇଁ ସାଧାରଣତଃ ଏହି ମସାଜ ଦିଆଯାଇଥାଏ। ତେଣୁ ମେକ୍ସିକୋର ସମୁଦ୍ର ବେଳାଭୂମିକୁ ବୁଲିବାକୁ ଯାଉଥିବା ପର୍ଯ୍ୟଟକମାନେ ଏହି ମସାଜର ଭରପୂର ଆନନ୍ଦ ନେଇଥାନ୍ତି।
