ଭୁବନେଶ୍ୱର,୯।୭(ବ୍ୟୁରୋ):ଯୌତୁକ ସାମଗ୍ରୀ ହାତେଇବା ପରେ ପ୍ରଥମ ସ୍ତ୍ରୀଙ୍କୁ ମାଡ଼ ମାରି ଘରୁ ତଡ଼ି ଦେଇଥିଲେ। ଏବେ ଦ୍ୱିତୀୟ ସ୍ତ୍ରୀ ଆଣିଛନ୍ତି ସମାନ ଅଭିଯୋଗ। ତାଙ୍କ ଅଭିଯୋଗ ଆଧାରରେ କ୍ୟାପିଟାଲ ଥାନା ପୋଲିସ ଗୁରୁବାର ଅଭିଯୁକ୍ତ ସ୍ବାମୀ ତଥା ବିଲ୍ଡର ସୂର୍ଯ୍ୟନଗରରେ ରହୁଥିବା ପୁରୀ ଜିଲା ଚନ୍ଦନପୁର ଅଞ୍ଚଳର ପ୍ରିୟବ୍ରତ ମିଶ୍ର (୨୮)ଙ୍କୁ ଗିରଫ କରିଛି। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅନ୍ୟପକ୍ଷରେ ଏହି ମାମଲାରେ ସମ୍ପୃକ୍ତ ଥିବା ଅଭିଯୁକ୍ତଙ୍କ ମା’ବାପା କୋର୍ଟରୁ ଆଗୁଆ ଜାମିନ ପାଇଥିବା ପୋଲିସ କହିଛି।
ପୋଲିସ କହିବାନୁଯାୟୀ, ପ୍ରିୟବ୍ରତ ୨୦୧୮ ଜୁଲାଇ ୧୫ରେ କଟକ ଜିଲା ନିଆଳି ଅଞ୍ଚଳର ଜଣେ ଯୁବତୀଙ୍କୁ ପ୍ରଥମେ ବିବାହ କରିଥିଲେ। ଯୌତୁକ ବାବଦରେ ଗାଡ଼ି, ୭୦ ଭରି ସୁନା ଅଳଙ୍କାର ସହ ୨୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଦିଆଯାଇଥିଲା। ବାହାଘରର ୭ ଦିନ ପରେ ତାଙ୍କୁ ନିର୍ଯାତନା ଦେବା ଅରମ୍ଭ କରିଥିଲେ ପ୍ରିୟବ୍ରତ। ପରବର୍ତ୍ତୀ ସମୟରେ ତାଙ୍କ ଗର୍ଭ ନଷ୍ଟ ପାଇଁ ଉଦ୍ୟମ କରାଯାଇଥିଲେ ମଧ୍ୟ ଗୋଟିଏ ପୁଅ ଜନ୍ମ ହୋଇଥିଲା। ଏହାପରେ ପ୍ରିୟବ୍ରତଙ୍କ ସହ ମା ଓ ବାପା ନିର୍ଯାତନା ଦେଇ ତାଙ୍କୁ ଘରୁ ବିଦା କରିଦେଇଥିଲେ। ୨୦୨୧ ଫେବୃୟାରୀ ୯ରେ ଗଞ୍ଜାମ ଜିଲା ଖଲ୍ଲିକୋଟ ଥାନା ଅଞ୍ଚଳର ଅନ୍ୟଜଣେ ଯୁବତୀଙ୍କୁ ବିବାହ କରିଥିଲେ ପ୍ରିୟବ୍ରତ। ପ୍ରିୟବ୍ରତଙ୍କୁ ଜଣେ ଯୁବତୀ ଧୋକା ଦେଇଛନ୍ତି, ସେ ମାନସିକ ଚାପରେ ଅଛନ୍ତି, ତେଣୁ ବାହାରେ ବିବାହ କଲେ ବିପଦ ଥିବା କହି ଯୁବତୀଙ୍କୁ ଚୁପ୍ଚାପ୍ ଘର ଭିତରେ ବିବାହ କରାଇଥିଲେ ତାଙ୍କ ପରିବାର ଲୋକେ। ଏପରିକି ସେ ଯୌତୁକ ବାବଦକୁ ଆଣିଥିବା ସୁନାଗହଣା ସବୁ ଲକରରେ ରଖି ଦେଇଥିଲେ। ପ୍ରିୟବ୍ରତ ଦ୍ୱିତୀୟ ବିବାହ କରିଥିବା ଜାଣିବା ପରେ ପ୍ରଥମ ସ୍ତ୍ରୀ ପହଞ୍ଚତ୍ ବିରୋଧ କରିବା ସହ ପାଟିତୁଣ୍ଡ କରିଥିଲେ। ଏପଟେ ବାହାଘରର କିଛିଦିନ ପରେ ଦ୍ୱିତୀୟ ସ୍ତ୍ରୀଙ୍କ ଉପରେ ନିର୍ଯାତନା ଆରମ୍ଭ ହୋଇଥିଲା। ଆଉ ୫ ଲକ୍ଷ ଟଙ୍କା ଯୌତୁକ ଆଣିବାକୁ କହି ଶାରୀରିକ ଓ ମାନସିକ ନିର୍ଯାତନା ଦେବା ସହ ତାଙ୍କୁ ଘରୁ ବିଦା କରିଦେଇଥିଲେ। ଫଳରେ ସେ ଏପ୍ରିଲ ୧୭ରେ କ୍ୟାପିଟାଲ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୨୫୧) ରୁଜୁ କରି ତଦନ୍ତ ଆରମ୍ଭ କରିଥିଲା। ଅନ୍ୟପକ୍ଷରେ ସମସ୍ତ ଅଭିଯୋଗକୁ ପ୍ରିୟବ୍ରତ ମିଶ୍ର ଖଣ୍ଡନ କରିଛନ୍ତି।
