ବନ୍ତ,୨୫।୧୦(ସ୍ବ.ପ୍ର.)-ଭଦ୍ରକ ଜିଲା ବନ୍ତ ବ୍ଲକ ବଡ଼ମହିଷଗୋଠ ପଞ୍ଚାୟତର ଟିକିରା-ଶ୍ରୀରାମପୁର ଗ୍ରାମକୁ ସଂଯୋଗୀକରଣ ନିମନ୍ତେ ସାଳନ୍ଦୀ ନଦୀ ଉପରେ ନିର୍ମିତ ବିଜୁ ସେତୁ ଲୋକଙ୍କ କାମରେ ଆସୁନି। ଅବଧି ସରିବା ପରେ ବହୁ ବିଳମ୍ବରେ ସେତୁ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିଲା। କିନ୍ତୁ ଉଭୟ ପାର୍ଶ୍ୱରେ କିଛି ଲୋକଙ୍କ ବ୍ୟକ୍ତିଗତ ଜମି ଥିବାରୁ ଆପ୍ରୋଚ ରୋଡ୍ ନିର୍ମାଣ ପାଇଁ ପ୍ରଶାସନ ଓ ଜମି ମାଲିକଙ୍କ ମଧ୍ୟରେ ଏକାଧିକ ବାର ଆଲୋଚନା ସତ୍ତ୍ୱେ ଏପର୍ଯ୍ୟନ୍ତ ସମାଧାନ ହୋଇପାରୁ ନାହିଁ। ଗତ ଜୁନ୍ରେ ଜାଗା ଚିହ୍ନଟ ହୋଇଥିଲେ ବି ଅଧିକ ପ୍ରାପ୍ୟ ପାଇବା ଆଶାରେ ଜମି ମାଲିକମାନେ ଜାଗା ଛାଡ଼ିବାକୁ ରାଜି ହେଉନାହାନ୍ତି। ଫଳରେ ନଦୀ ପାର ହେବା ପାଇଁ ଅସ୍ଥାୟୀ ବାଉଁଶ ଚାରକୁ ଲୋକେ ଭରସା କରିଛନ୍ତି।
ପ୍ରକାଶ ଯେ, ଏହି ଅଞ୍ଚଳର ପ୍ରମୁଖ ବ୍ୟବସାୟିକ କେନ୍ଦ୍ର ଆଗରପଡ଼ା ବଜାରକୁ ଆସିବା ପାଇଁ ସାଳନ୍ଦୀ ନଦୀ ବାଧକ ହେଉଥିବାରୁ ସ୍ଥାନୀୟ ଜନସାଧାରଣଙ୍କ ଦାବି କ୍ରମେ ଏମ୍ପି ଓ ବିଧାୟକଙ୍କ ସହଯୋଗରେ ଏଠାରେ ବିଜୁ ସେତୁ ନିର୍ମାଣ ପାଇଁ ୪ କୋଟି ୨୧ ଲକ୍ଷ ୯୨ ହଜାର ୪୨୦ ଟଙ୍କାର ପ୍ରକଳ୍ପ ମଞ୍ଜୁର ହୋଇଥିଲା। ପୋଲ ନିର୍ମାଣ ଲାଗି ଟେଣ୍ଡର ପ୍ରକ୍ରିୟା ଶେଷ ହେବା ପରେ ମୁଖ୍ୟମନ୍ତ୍ରୀ ଶିଳାନ୍ୟାସ କରିଥିଲେ। ୨୦୧୬ ଫେବୃଆରୀ ୪ରେ ନିର୍ମାଣ କାର୍ଯ୍ୟ ଆରମ୍ଭ ହୋଇ ୨୦୧୭ ଅକ୍ଟୋବର ୩ରେ ଶେଷ ହେବାର ଥିଲା। କିନ୍ତୁ ଅବଧି ଶେଷ ହେବା ପରେ ବିଳମ୍ବରେ ତଥା ୨୦୨୦ ଜୁନ୍ ବେଳକୁ କାମ ସରିଥିଲା। ଏହି ପୋଲ ନିର୍ମାଣ ହେଲେ ଶ୍ରୀରାମପୁର, ଗୋପୀନାଥପୁର, ଟିକିରା ଆଦି ଗ୍ରାମର ୮ ହଜାର ଲୋକେ ଉପକୃତ ହେବେ ବୋଲି ଫଳକରେ ଉଲ୍ଲେଖ କରାଯାଇଛି। ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପୋଲ ନିର୍ମାଣ ସରିଥିଲେ ମଧ୍ୟ ଏଯାଏ ଆପ୍ରୋଚ୍ ରୋଡ୍ ନିର୍ମାଣ ହୋଇପାରି ନ ଥିବାରୁ ନଦୀରେ ଭରା ପାଣି ସମୟରେ ଛାତ୍ରୀଛାତ୍ର ବହୁ କଷ୍ଟରେ ସ୍କୁଲ, କଲେଜକୁ ଆସୁଥିବା ବେଳେ ବଜାରରେ ଦୋକାନ କରିଥିବା ବ୍ୟବସାୟୀ ଓ ସାଧାରଣ ଲୋକେ ବାଉଁଶ ଚାରରେ ନଦୀ ପାର ହୋଇ ଆଗରପଡ଼ା ବଜାରକୁ ଆସୁଛନ୍ତି। ଏ ସମ୍ପର୍କରେ କନିଷ୍ଠ ଯନ୍ତ୍ରୀ କୃଷ୍ଣପଦ ମହାନ୍ତିଙ୍କୁ ପଚାରିବାରୁ କହିଛନ୍ତି, ଟିକିରା ଗ୍ରାମକୁ ସଂଯୋଗ କରୁଥିବା ଆପ୍ରୋଚ ରୋଡ୍ ନିର୍ମାଣ ପାଇଁ ଜମି ମାଲିକମାନେ ଆବଶ୍ୟକ କାଗଜପତ୍ର ଜମା ଆରମ୍ଭ କରିଛନ୍ତି। ଆଉ ସପ୍ତାହେ ମଧ୍ୟରେ ଜମି ଅଧିଗ୍ରହଣ ହୋଇଯିବ। କିନ୍ତୁ ଶ୍ରୀରାମପୁର ଗ୍ରାମକୁ ସଂଯୋଗ କରୁଥିବା ଆପ୍ରୋଚ ରୋଡ୍ ଲାଗି ଜମି ମାଲିକମାନେ ଅଧିକ ମୂଲ୍ୟ ଦାବି କରୁଥିବାରୁ ଅଧିଗ୍ରହଣ ହୋଇପାରୁ ନାହିଁ।
