ଭୁବନେଶ୍ୱର,୧୩।୪ (ବ୍ୟୁରୋ): ଭୁବନେଶ୍ୱର ନୟାପଲ୍ଲୀ ଥାନା ଅଞ୍ଚଳରେ ଏକ ବିବାଦୀୟ ଜମିକୁ ଅକ୍ତିଆର କରିବାକୁ ଯାଇ ରାତିଅଧରେ ଜେସିବି ଲଗାଇ ଦୋକାନ ଘର ଭାଙ୍ଗି ଲୁଟ୍ ଘଟଣାରେ କମିଶନରେଟ ପୋଲିସ ଏପର୍ଯ୍ୟନ୍ତ ବାଉନ୍ସର ଗ୍ୟାଙ୍ଗର ୧୯ ଜଣଙ୍କୁ ଗିରଫ କରିଛି। ହେଲେ ଏହି ଗ୍ୟାଙ୍ଗର ମୁଖ୍ୟ ରାଘବ ଜେନା ଏବେବି ଫେରାର ଅଛନ୍ତି। ତେବେ ରାଘବ ଝାରପଡ଼ାସ୍ଥିତ ସରକାରୀ ଜମିରେ ଘର କରି ଭଡ଼ା ବାବଦକୁ ପାଉଥିବା ଲକ୍ଷାଧିକ ଟଙ୍କାରେ ଆପରାଧିକ କାର୍ଯ୍ୟକଳାପ ଚଳାଉଥିବା ଜଣାପଡ଼ିବା ପରେ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଯିଏ ଅନ୍ୟ ଦୋକାନ ଓ ଘର ଭାଙ୍ଗୁଥିଲେ ଏବେ ତାଙ୍କ ଘର ମାଟିରେ ମିଶିଛି। ବୁଧବାର ବିଏମ୍ସି ଜଏଣ୍ଟ ଏନ୍ଫୋର୍ସମେଣ୍ଟ୍ ଟିମ୍ ସହାୟତାରେ ପୋଲିସ ରାଘବଙ୍କ ୪୦ଟି ଘର ସମେତ ମୋଟ ୯୩ରୁ ଊର୍ଦ୍ଧ୍ୱ ଘର ଭାଙ୍ଗିଦେଇଛି। ମଧ୍ୟାହ୍ନରେ ଲକ୍ଷ୍ମୀସାଗର ଥାନା ନିକଟ ଛକରୁ କେନାଲ ରୋଡ୍ ପର୍ଯ୍ୟନ୍ତ ଏନ୍ଫୋର୍ସମେଣ୍ଟ୍ ଟିମ୍ ଜବରଦଖଲ ଉଚ୍ଛେଦ କରିଥିବାବେଳେ ୧୨ ପ୍ଲାଟୁନ ଫୋର୍ସ ସହ ୫୩ ପୋଲିସ ଅଧିକାରୀ ନିୟୋଜିତ ହୋଇଥିଲେ। ଜେସିବି ଦ୍ୱାରା ଘର ଓ ଦୋକାନ ଉଚ୍ଛେଦ କରାଯାଉଥିବାବେଳେ ସେଠାରେ ଉତ୍ତେଜନା ଦେଖାଦେଇଥିଲା। ଉକ୍ତ ଘରେ ରହୁଥିବା ଲୋକେ ପ୍ରବଳ ଖରାରେ ନାହିଁ ନ ଥିବା ହଇରାଣର ସମ୍ମୁଖୀନ ହୋଇଥିଲେ। ଏପରିକି ନୋଟିସ୍ ଦିଆ ନ ଯାଇ ଏଭଳି ପଦକ୍ଷେପ ନିଆଯାଇଥିବା ସେମାନେ ଅଭିଯୋଗ କରିଥିଲେ।
ଉଚ୍ଛେଦବେଳେ ଆପରାଧିକ ଯୋଜନା ଭଣ୍ଡୁର
ସବୁଠୁ ବଡ଼ କଥା ହେଉଛି, ଏହି ଜବରଦଖଲ ଉଚ୍ଛେଦବେଳେ ଆପରାଧିକ ଯୋଜନା ପାଇଁ ବୈଠକ ହେଉଥିବା ସ୍ଥାନ ମଧ୍ୟ ପୋଲିସ ନଜରକୁ ଆସିଥିଲା। ଉକ୍ତ ସ୍ଥାନରେ ସୋଫା ପଡ଼ିଥିବାବେଳେ ଭୋଜି ପାଇଁ ରୋଷେଇ ସରଞ୍ଜାମ ମଧ୍ୟ ଥିଲା। ଏପରିକି ପୋଲିସ ନଜରରୁ ବର୍ତ୍ତିବା ଉଦ୍ଦେଶ୍ୟରେ ଉକ୍ତ ସ୍ଥାନକୁ ଯିବା ପାଇଁ ଏକ ଛୋଟିଆ ଗଳି ରାସ୍ତା ମଧ୍ୟ କରାଯାଇଥିଲା। ଏସବୁ ଜଣାପଡ଼ିବା ପରେ ପୋଲିସ ଉକ୍ତ ସ୍ଥାନକୁ ମଧ୍ୟ ଜେସିବି ଦ୍ୱାରା ମାଟିରେ ମିଶାଇ ଦେଇଛି। ରାଘବ ପରିବାର ସହ ସେଠାରୁ କିଛି ଦୂରରେ ବିଳାସମୟ ଘରେ ରହୁଥିବାବେଳେ ଦୀର୍ଘବର୍ଷ ହେଲା ବସ୍ତି ଅଞ୍ଚଳରୁ ପାଉଥିବା ଉକ୍ତ ଭଡ଼ା ଟଙ୍କାରେ ଗ୍ୟାଙ୍ଗ୍ ଗଢ଼ି ସହରରେ ରାଜ୍ କରିବା ସହ ରୋଜଗାର ବଢ଼ାଇ ଚାଲିଥିଲେ। ଏଭଳି ପଦକ୍ଷେପ ଦ୍ୱାରା ତାଙ୍କ ରୋଜଗାର କମିବା ନେଇ ପୋଲିସ ଆଶା ରଖିଛି।
ଡିସିପି ପ୍ରକାଶ ଚନ୍ଦ୍ର ପାଲ ଏ ସମ୍ପର୍କରେ ଖବରଦାତା ସମ୍ମିଳନୀରେ କହିଛନ୍ତି, ବିଏମ୍ସି ଜରିଆରେ ଲୋକମାନଙ୍କୁ ଘର ଛାଡ଼ିବାକୁ ନୋଟିସ୍ କରାଯାଇଥିଲା। ହେଲେ ସେମାନେ ନ ଯିବାରୁ ଏଭଳି ପଦକ୍ଷେପ ନିଆଯାଇଛି। ତେବେ ଫେରାର ରାଘବଙ୍କ ନାଁରେ ବହୁ ଆପରାଧିକ ମାମଲା ରହିଥିବାବେଳେ ତାଙ୍କୁ ଖୁବ୍ଶ୍ରୀଘ୍ର ଗିରଫ କରିବାକୁ ପ୍ରୟାସ କରାଯାଉଥିବା ସେ କହିଛନ୍ତି।
ଜମି ଅକ୍ତିଆର ପାଇଁ କୋଟିଏ ଟଙ୍କା ସୁପାରି ନେଇଥିଲେ ରାଘବ
ନୟାପଲ୍ଲୀ ଥାନା ନିକଟରେ ଥିବା ପ୍ଲଟ୍ ନଂ.୧୪୭୦ ବିବାଦୀୟ ଜମିରେ ସୁବାସ ଅଗ୍ରୱାଲ ଓ ସୁବାସ ସାମଲ ଘର ଭଡ଼ା ନେଇ ଦୋକାନ କରିଥିଲେ। ତେଣୁ ଏହି ବିବାଦୀୟ ଜମିକୁ ଅକ୍ତିଆର କରିବା ପାଇଁ ମାଲିକ ରଞ୍ଜିତଙ୍କଠାରୁ ରାଘବ ପ୍ରାୟ ୧ କୋଟି ଟଙ୍କା ସୁପାରି ନେଇଥିଲେ। ଗତ ୨୪ ତାରିଖ ବିଳମ୍ବିତ ରାତିରେ ପ୍ରାୟ ୫୦ରୁ ଊର୍ଦ୍ଧ୍ୱ ବାଉନ୍ସର ବସ୍, ଜେସିବି ଓ ବାଇକ୍ରେ ଆସି ହଠାତ୍ ଦୋକାନକୁ ଭାଙ୍ଗିଦେବା ସହ ବହୁ ଟଙ୍କାର ଜିନିଷ ଚୋରିକରି ନେଇଥିଲେ। ଏ ନେଇ ଥାନାରେ ଅଭିଯୋଗ ପରେ ପୋଲିସ ୨ଟି ମାମଲା ରୁଜୁକରି ତଦନ୍ତ କରିଥିଲା।
