ବହି ପଢ଼ିବା ଅନେକଙ୍କର ଅଭ୍ୟାସ ଥାଏ। ସେମାନଙ୍କ ପାଇଁ ବହି ଅବସରର ସାଥୀଟିଏ। ତେବେ ଏହି ବହିକୁ ନେଇ ଯେ ସୁନ୍ଦର କଳାକୃତି ଗଢ଼ି ହେବ ତାହା ଅନେକେ ଜାଣି ନ ଥିବେ। ଏଲିଜାବେଥ୍ ସାଗାନ୍ ନାମ୍ନୀ ଜଣେ ପୁସ୍ତକପ୍ରେମୀ ବହିରେ ତିଆରି କରୁଛନ୍ତି ଏମିତି କିଛି ନିଆରା କଳାକୃତି; ଯାହାକୁ ଦେଖିଲେ ଲାଗେ ସତେ ଯେମିତି ସେଗୁଡ଼ିକ ଗୋଟେ ଗୋଟେ ସୁନ୍ଦର ଆର୍ଟପିସ୍। ୨୦୧୬ରୁ ସେ ଏଭଳି କଳାକୃତି କରି ଆସୁଛନ୍ତି। ଏବେ ତାଙ୍କର ଇନ୍ଷ୍ଟାଗ୍ରାମରେ ୨୦୦ହଜାର ଫଲୋୟର ଅଛନ୍ତି। ଏଲିଜାବେଥ୍ ଏତେ ବହି ପଢ଼ନ୍ତି ଯେ, ତାଙ୍କର ଏକ ଲାଇବ୍ରେରୀ ଅଛି। ସେ ଏହି ବହିଗୁଡ଼ିକୁ ସୁନ୍ଦରଭାବେ ସଜାଇ ପରୀ କଥାର କାହାଣୀ ଭଳି କଳାକୃତି ଗଢ଼ନ୍ତି; ଯେଉଁଥିରେ ସେ ନିଜେ ଏକ ଚରିତ୍ର ହୋଇଥାନ୍ତି। ଆଉ ଏହି ସୁନ୍ଦର କଳାକୃତିର ଚିତ୍ରୋତ୍ତଳନ କରନ୍ତି ତାଙ୍କର ବନ୍ଧୁ ଜେମ୍ସ ଟ୍ରେଭିନୋ। ଦୁହିଁଙ୍କ ଯୁଗଳବନ୍ଦୀରେ ତିଆରି ହେଉଥିବା ଏହି କଳାକୃତି ସମସ୍ତଙ୍କୁ ବେଶ୍ ପସନ୍ଦ ହେଉଛି। କେତେବେଳେ ସେ ବହି ସାହାଯ୍ୟରେ ଜଳପରୀ ସାଜନ୍ତି ତ କେବେ ପ୍ରଜାପତି। ପୁଣି କେବେ ହ୍ୟାରୀ ପୋଟର୍ ଭଳି ଜାଦୁର ଝାଡୁ ଧରି ଉଡ଼ିବା ଦୃଶ୍ୟ ତିଆରି କରନ୍ତି। ଆଉ ଏ ସବୁ ଦେଖିବାକୁ ବେଶ୍ ଚମତ୍କାର ଲାଗେ।
