ପୁଣେ,୩୦।୧: ନିକଟରେ ବମ୍ବେ ହାଇକୋର୍ଟ ଏକ ଘରୋଇ ହିଂସାର ଶୁଣାଣି ସମୟରେ ଅଜବ ଟିପ୍ପଣୀ ଦେଇଛନ୍ତି। ଯାହାକୁ ନେଇ ଚର୍ଚ୍ଚା ଜୋର ଧରିଛି। କୋର୍ଟ ଏହି ମାମଲାର ଶୁଣାଣି କରି କହିଛନ୍ତି, ‘ଯୋଡି ସ୍ବର୍ଗରେ ନୁହେଁ, ନର୍କରେ ହୁଏ ସୃଷ୍ଟି’ । ନଭି ମୁମ୍ବାଇର ଜଣେ ମହିଳା ସ୍ବାମୀଙ୍କ ନାଁରେ ଯୌତୁକ ନିର୍ଯାତନା ମାମଲା ରୁଜୁ କରିଥିଲେ। ଏହି ମାମଲାରେ ମହିଳାଙ୍କ ସ୍ବାମୀ ଜାମିନ ଆବେଦନ କରିଥିଲେ। ଏହାର ଶୁଣାଣି କରି ହାଇକୋର୍ଟର ଜଷ୍ଟିସ ସାରଙ୍ଗ କୋତୱାଲଙ୍କ ଏକ ବେଞ୍ଚ କହିଛନ୍ତି, ଉଭୟ ସ୍ତ୍ରୀ-ସ୍ବାମୀ ପରସ୍ପର ବିରୋଧରେ ମାମଲା ରୁଜୁ କରିଥିଲେ। ଉଭୟଙ୍କ ମଧ୍ୟରେ ଝଗଡା ଏତେ ପରିମାଣରେ ବଢିଯାଇଛି ଯେ ଦୁହେଁ ଏବେ ଏକାଠି ରହିବା ମଧ୍ୟ ଅସମ୍ଭବ। ଉଭୟଙ୍କ ମଧ୍ୟରେ ବାରମ୍ବାର କୌଣସି କଥାକୁ ନେଇ ଝଗଡା ହେଉଛି। ମାମଲା ଶୁଣାଣି ସମୟରେ ଜଷ୍ଟିସ୍ କୋତଓ୍ବାଲ ଏତେ ରାଗି ଯାଇଥିଲେ ଯେ, ହଠାତ୍ କହିଥିଲେ, ଯୋଡି ସ୍ବର୍ଗରେ ନୁହେଁ, ନର୍କରେ ସୃଷ୍ଟି ହୋଇଥାଏ।
ନଭେମ୍ବର ୨୦୧୭ରେ ଏହି ଦମ୍ପତି ବିବାହ କରିଥିଲେ ଏବଂ ସେମାନଙ୍କର ଏକ ତିନି ବର୍ଷର ପୁଅ ଅଛି। ପତ୍ନୀ କହିଛନ୍ତି, ବିବାହ ସମୟରେ ଶାଶୁଘର ଲୋକ ପରିବାର ସଦସ୍ୟ ପ୍ରତ୍ୟେକ ଗୋଟିଏ ସୁନା ମୁଦ୍ରା ଚାହୁଁଥିଲେ ମଧ୍ୟ ତାଙ୍କ ପରିବାର ଦେବାକୁ ମନା କରିଦେଇଥିଲେ। ବିବାହ ପରେ ତାଙ୍କ ଶାଶୁ ଏବଂ ଶ୍ୱଶୁର ତାଙ୍କୁ ସେମାନଙ୍କ ଦାବି ବିଷୟରେ ମନେ ପକାଉଥିଲେ ଏବଂ ସ୍ବାମୀ ତାଙ୍କୁ ନିର୍ଯାତନା ଦେଉଥିଲେ। ମହିଳା ଅଭିଯୋଗ କରିଛନ୍ତି ଯେ ଭାସିରେ ଫ୍ଲାଟ କିଣିବା ପାଇଁ ସେ ୧୩.୫ ଲକ୍ଷ ଟଙ୍କା ଦେଇଛନ୍ତି ଏବଂ ସେମାନେ ନଭେମ୍ବର ୨୦୧୯ରୁ ସେଠାରେ ରହିବାକୁ ଲାଗିଲେ, କିନ୍ତୁ ସ୍ବାମୀ ଅଧିକ ଟଙ୍କା ମାଗିବାରୁ ଝଗଡା ଜାରି ରହିଲା। ତାଙ୍କ ପତ୍ନୀ ତାଙ୍କୁ ମାଡ ମାରିଥିବା କହି ମହିଳାଙ୍କ ସ୍ବାମୀ ନିଜ ଶରୀରରେ କିଛି କ୍ଷତ ସୃଷ୍ଟି କରିଛନ୍ତି ବୋଲି ଅଭିଯୋଗରେ ସେ ଉଲ୍ଲେଖ କରିଛନ୍ତି। ସେପଟେ ସ୍ବାମୀ ମଧ୍ୟ ସ୍ତ୍ରୀଙ୍କ ନାଁରେ ପାଲଟା ଅଭିଯୋଗ ଆଣିଛନ୍ତି। କୋର୍ଟ ସମ୍ପୃକ୍ତ ବ୍ୟକ୍ତିଙ୍କୁ ଆଗୁଆ ଜାମିନ ପ୍ରଦାନ କରିଛନ୍ତି।
