ଖୋର୍ଦ୍ଧା ଅଫିସ,୧୦।୬: ଏକ ମାମଲାରେ କୋହଳ ଦଫା ଲଗାଇବା ପାଇଁ ଜଣେ ମହିଳାଙ୍କଠାରୁ ୬ହଜାର ଟଙ୍କା ଲାଞ୍ଚ ନେଉଥିବା ବେଳେ ବୋଲଗଡ ଥାନା ଏଏସ୍ଆଇ ଭଗବାନ ସ୍ବାଇଁ ଖୋର୍ଦ୍ଧା ଭିଜିଲାନ୍ସ ହାତରେ ଧରା ପଡିଛନ୍ତି। ଭିଜିଲାନ୍ସ ଟିମ୍ ତାଙ୍କଠାରୁ ଲାଞ୍ଚ ଟଙ୍କା ଜବତ କରିଛି।
ସୂଚନାନୁଯାୟୀ, ବୋଲଗଡ଼ ଥାନା ଅନ୍ତର୍ଗତ ଖରିଡାପଲ୍ଲୀର ସୁକାନ୍ତି ପଟ୍ଟନାୟକଙ୍କ ପୁଅ ଚନ୍ଦନ ଓ ସହଯୋଗୀ ମାଧବ ପ୍ରଧାନଙ୍କ ବିରୋଧରେ କୌଣସି ଏକ ଘଟଣାରେ ଏପ୍ରିଲରେ ମାମଲା ରୁଜୁ ହୋଇଛି। ସେମାନଙ୍କ ବିରୋଧରେ ରହିଥିବା ମାମଲାରେ କୋହଳ ଦଫା ଲଗାଇବା ପାଇଁ ପ୍ରମିଳା ଏଏସ୍ଆଇ ସ୍ବାଇଁଙ୍କ ସହ ଆଲୋଚନା କରିଥିଲେ। ଏ ବାବଦକୁ ସ୍ବାଇଁ ତାଙ୍କୁ ଦଶ ହଜାର ଲାଞ୍ଚ ମାଗିଥିଲେ। ସୁକାନ୍ତି ୬ ହଜାର ଟଙ୍କା ଦେବା ପାଇଁ ରାଜି ହୋଇଥିଲେ। ତେବେ ଏ ସଂକ୍ରାନ୍ତରେ ପ୍ରମିଳା ଖୋର୍ଦ୍ଧା ଭିଜିଲାନ୍ସରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସ ଟିମ୍ ପ୍ରସ୍ତୁତ ହୋଇ ଥିଲେ। ଯୋଜନା ମୁତାବକ ଥାନା କ୍ୟାମ୍ପସ ଭିତରୁ ଏଏସ୍ଆଇ ସ୍ବାଇଁ ଲାଞ୍ଚ ଟଙ୍କା ନେଉଥିବା ବେଳେ ପୂର୍ବରୁ ଛପି ରହିଥିବା ଟିମ୍ ତାଙ୍କୁ ଧରିଥିଲେ।
