କୋକସରା,୨୯।୫(ଡି.ଏନ୍.ଏ.): କଳାହାଣ୍ଡି ଜିଲାର ପ୍ରମୁଖ ପର୍ଯ୍ୟଟନସ୍ଥଳ ଡୋକରୀଚଞ୍ଚରାର ଡୋକରୀଦରରେ ରବିବାର ଜଣେ ଯୁବକ ବୁଡି ନିଖୋଜ ହୋଇଯାଇଥିଲେ। ଘଟଣାର ୨୪ ଘଣ୍ଟା ପରେ ଭବାନୀପାଟଣା ଏବଂ କୋକସରା ଦମକଳ ଟିମ୍ର ମିଳିତ ପ୍ରୟାସରେ ସୋମବାର ମୃତଦେହ ଉଦ୍ଧାର ହୋଇଛି।
ସୂଚନା ଯୋଗ୍ୟ, ରବିବାର ଧର୍ମଗଡ଼ ସହରର ୪ ଜଣ ସାଙ୍ଗ ଡୋକରୀଚଞ୍ଚରାକୁ ବୁଲିବାକୁ ଆସିଥିଲେ। ପରେ ସେମାନେ ଡୋକାରୀଦର ଜଳପ୍ରପାତରେ ଗାଧେଇବା ଯାଇଥିଲେ। ସେତିକିବେଳେ ଅମନ ଅଗ୍ରୱାଲ(୨୫) ପାଣିରେ ବୁଡି ନିଖୋଜ ହୋଇଯାଇଥିଲେ। ଖବର ପାଇ ଆମପାଣି ପୋଲିସ ଓ କୋକସରା ଦମକଳ କର୍ମଚାରୀ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ହେଲେ ଅମନଙ୍କ କୌଣସି ପତ୍ତା ମିଳି ନ ଥିଲା। ସୋମବାର ସକାଳୁ ପୁଣି ଭବାନୀପାଟଣା ଓ କୋକସରା ଦମକଳ ଟିମ୍ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଦୀର୍ଘ ୨୪ ଘଣ୍ଟା ପରେ ଯୁବକଙ୍କ ମୃତଦେହ ଉଦ୍ଧାର ହୋଇଥିଲା। ପୋଲିସ ମୃତଦେହ ଜବତ କରି କୋକସରା ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇଥିଲା। ମୃତଦେହ ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଆମପାଣି ପୋଲିସ ଏକ ଅପମୃତ୍ୟୁ ମାମଲା(ନଂ.୩/୨୩) ରୁଜୁ କରି ତଦନ୍ତ ଚଳାଇଥିବା ଏଏସ୍ଆଇ ମନୋଜ ନାଏକ ସୂଚନା ଦେଇଛନ୍ତି।
ଉଦ୍ଧାର କାର୍ଯ୍ୟ ବେଳେ ଘଟଣାସ୍ଥଳରେ ଧର୍ମଗଡ଼ ଉପଜିଲାପାଳ ବେଦ ଭୂଷଣ, ଉପଖଣ୍ଡ ପୋଲିସ ଅଧିକାରୀ ଧିରଜ କୁମାର ଚୋପଦାର, ଆମପାଣି ଥାନା ଅଧିକାରୀ ଚତୁର୍ଭୁଜ ନାଏକ, ଅତିରିକ୍ତ ତହସିଲଦାର ମୋହନ ଚରଣ ଜେନା, କୋକସରା ବ୍ଲକ ଉପାଧ୍ୟକ୍ଷ ରାଜୀବ କୁମାର ଅଗ୍ରୱାଲ, ଜୁନାଗଡ଼ ଏନ୍ଏସି ଚେୟାରମ୍ୟାନ ମୁକେଶ ଅଗ୍ରୱାଲ, ଗୌତମ ଅଗ୍ରୱାଲ, ଶ୍ରୀକାନ୍ତ ଶର୍ମା ପ୍ରମୁଖ ଉପସ୍ଥିତ ରହିଥିଲେ।
