କୋରାପୁଟ,୨୮ା୧୦(ସ୍ବ.ପ୍ର.): କୋରାପୁଟ ଜିଲା ପାଡୁଆ ଥାନା ଅନ୍ତର୍ଗତ ଜଲାପୁଟ ଜଳଭଣ୍ଡାରରେ ରବିବାର ଏକ ଦେଶୀ ଡଙ୍ଗା ବୁଡ଼ି ୩ ଜଣ ଯୁବକ ନିଖୋଜ ହୋଇଯାଇଥିଲେ। ସେମାନେ ହେଲେ ପ୍ରଶାନ୍ତ ଖରା, ଚିତ୍ତ ଖିଲ ଓ ମନୋଜ କୁର୍ତ୍ତାଲ। ଖବର ପାଇ କୋରାପୁଟ ଓଡ୍ରାଫର ହାବିଲଦାର ଗୋପାଳ ନାୟକଙ୍କ ତତ୍ତ୍ୱାବଧାନରେ ଏକ ଟିମ୍ ଘଟଣା ସ୍ଥଳରେ ପହଞ୍ଚତ୍ ତଲାସି କରି ମନୋଜ କୁର୍ତ୍ତାଲଙ୍କ ମୃତଦେହ ଉଦ୍ଧାର କରିଛନ୍ତି। ତାଙ୍କ ଘର ପାଡୁଆ ଉପରସାହିରେ ବୋଲି ଜଣାପଡିଛି।
ଖବରରୁ ଜଣାପଡିଛି ରବିବାର ଏକ ଦେଶୀ ଡଙ୍ଗାରେ ପ୍ରଶାନ୍ତ ଚିତ୍ତ,ମନୋଜ, ଅଭୟ ହନ୍ତାଳ ଓ ମନୋଜ ହନ୍ତାଳ ୫ ଜଣ ଯୁବକ ଜଲାପୁଟ ଜଳଭଣ୍ଡାରର ରାମତା ଗ୍ରାମକୁ ଯାଉଥିଲେ। ହଠାତ୍ ସେମାନେ ଯାଉଥିବା ଡଙ୍ଗାଟି ଭାରସାମ୍ୟ ହରାଇ ବୁଡିଯାଇଥିଲା। ଫଳରେ ପ୍ରଶାନ୍ତ, ଚିତ୍ତ ଓ ମନୋଜ ନିଖୋଜ ହୋଇଯାଇଥିଲେ। ଅଭୟ ହନ୍ତାଳ, ମନୋଜ ହନ୍ତାଳ ପହଁରି ପହଁରି କୂଳକୁ ଚାଲି ଆସିଥିଲେ ା ସେମାନେ ଘଟଣା ସମ୍ପର୍କରେ କାହାକୁ କିଛି ନ କହି ନୀରବ ରହିଥିଲେ। ପରେ ନିଖୋଜ ଯୁବକଙ୍କ ପରିବାର ଲୋକେ ଅଭୟ ଓ ମନୋଜଙ୍କୁ ପଚରାଉଚରା କରିବା ପରେ ସେମାନଙ୍କ ସହ ଯାଇଥିବା ୩ ଯୁବକ ନିଖୋଜ ଥିବା କହିଥିଲେ। ଘଟଣା ସମ୍ପର୍କରେ ଭୟରେ ସେମାନେ କାହାକୁ କିଛି କହି ନ ଥିବା ପ୍ରକାଶ କରିଥିଲେ। ପାଡୁଆ ଥାନାରେ ସୋମବାର ରାତିରେ ନିଖୋଜ ଯୁବକଙ୍କ ପରିବାର ଲୋକେ ଏତଲା ଦେବା ପରେ ମଙ୍ଗଳବାର ସକାଳୁ କୋରାପୁଟ ଓଡ୍ରାଫ ଟିମ୍ ଘଟଣାସ୍ଥଳରେ ପହଞ୍ଚତ୍ ତଲାସି ଆରମ୍ଭ କରିଥିଲା। ଖବର ଲେଖା ହେବା ପର୍ଯ୍ୟନ୍ତ ଅନ୍ୟ ୨ ଯୁବକଙ୍କ ମୃତଦେହ ମିଳିନାହିଁ।
