ଭୁବନେଶ୍ୱର, ୨୭।୧୨ (ବ୍ୟୁରୋ):ନିଖିଳ ଓଡ଼ିଶା ରାସ୍ତାପାର୍ଶ୍ୱ ଉଠାଦୋକାନୀ ମହାସଂଘ ସହ ଆଲୋଚନା କରିଛି ବିଏମ୍ସି। ସୋମବାର ଉତ୍ତର ବିଏମ୍ସି କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ମହାସଂଘର ୧୦ ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଥିଲା। ଉଠା ଦୋକାନ ଉଚ୍ଛେଦକୁ ତୁରନ୍ତ ବନ୍ଦ କରିବା, ଉଚ୍ଛେଦ ଦୋକାନୀଙ୍କୁ କ୍ଷତିପୂରଣ ସହ ଭେଣ୍ଡିଂଜୋନ୍ରେ ଥଇଥାନ କରିବା, ଉଚ୍ଛେଦ ସମୟରେ ଗାଳିଗୁଲଜ କରୁଥିବା ଅଧିକାରୀଙ୍କୁ ଆପରାଧିକ ଆଇନ ଅନୁଯାୟୀ ଗିରଫ କରିବା, ଉଚ୍ଛେଦ ସମୟରେ ମାନବିକତା ଅବଲମ୍ବନ କରିବା, ଉଚ୍ଛେଦ ହୋଇଥିବା ଦୋକାନୀଙ୍କ ତାଲିକା ଅନୁଯାୟୀ ୧ମାସ ମଧ୍ୟରେ ଥଇଥାନ କରିବା, ମହାସଂଘ କମିଟି ସହ ଆଲୋଚନା କରି ଉଚ୍ଛେଦ କରିବା, ଭେଣ୍ଡିଂଜୋନ୍ରେ ସ୍ଥାନୀୟ ଉଠା ଦୋକାନୀଙ୍କୁ ଥଇଥାନ କରିବା ଓ ବିଏମ୍ସି ସ୍କ୍ବାଡ୍ ସହିତ ମହାସଂଘର ସ୍କ୍ବାଡ୍କୁ ସାମିଲ୍ କରି ବିଭିନ୍ନ ଉନ୍ନତିମୂଳକ କାର୍ଯ୍ୟ କରିବା ଉପରେ ଡେପୁଟି କମିଶନର ପୁରନ୍ଦର ନନ୍ଦଙ୍କ ସହ ଆଲୋଚନା କରାଯାଇଥିଲା। ଏନେଇ ଉପରିସ୍ଥ ଅଧିକାରୀଙ୍କ ସହ ଆଲୋଚନା କରାଯାଇ ତୁରନ୍ତ ସମାଧାନ କରିବାକୁ ନନ୍ଦ ପ୍ରତିଶ୍ରୁତି ଦେଇଥିଲେ। ଏଥିସହ ଉତ୍ତର ବିଏମ୍ସି ଅଞ୍ଚଳରେ ୩୦ଟି ଭେଣ୍ଡିଂଜୋନ ତିଆରି କରିବା ପାଇଁ ଜିଏ ବିଭାଗକୁ ଜାଗା ମଗାଯାଇଛି। ଜାଗା ମିଳିବା ପରେ ଉଚ୍ଛେଦ ଦୋକାନୀଙ୍କୁ ସେଠାରେ ଥଇଥାନ କରାଯିବ ବୋଲି ସେ କହିଥିଲେ। ତେବେ ଭୁବନେଶ୍ୱର ମଧ୍ୟ ନିର୍ବାଚନ ମଣ୍ଡଳୀରେ ଉଚ୍ଛେଦ କାର୍ଯ୍ୟ ଜାରି ରହିଥିବାରୁ ଏହାକୁ ବିରୋଧ କରାଯାଇଥିଲା। ପ୍ରତିବାଦ ସ୍ବରୂପ ୩୦ ତାରିଖରେ ବିଏମ୍ସି, ବିଡିଏ, ନବୀନ ନିବାସ, କଳିଙ୍ଗ ଷ୍ଟାଡ଼ିୟମର ୪ଟି ଗେଟ୍କୁ ଉଠାଦୋକାନୀ ଏବଂ ତାଙ୍କ ପରିବାର ସଦସ୍ୟ ଘେରାଉ କରିବେ ବୋଲି ମହାସଂଘ ସଭାପତି ପ୍ରତାପ ସାହୁ ସୂଚନା ଦେଇଛନ୍ତି। ବୈଠକରେ ଆସିଣ୍ଟାଣ୍ଟ କମିଶନର ଉମେଶ ଚନ୍ଦ୍ର ଲେଙ୍କା, ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ, ମହାସଂଘର ଅନୁଜ ପ୍ରଧାନ, ଜଗବନ୍ଧୁ ବେହେରା, କରୁଣାକର ରାଉତ, ଏସ୍.କେ. ଗୁହୁ ପ୍ରମୁଖ ଉପସ୍ଥିତ ଥିଲେ।
