ଭୁବନେଶ୍ୱର, ୧୧।୩ (ବ୍ୟୁରୋ): ପ୍ରତି ଓ୍ବାର୍ଡରେ ଆମିଷ ମାର୍କେଟ ନିର୍ମାଣ ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପ୍ରତିଶ୍ରୁତି ଦେଇଥିଲା। ୨ବର୍ଷ ମଧ୍ୟରେ ନିର୍ମାଣ କରାଯିବାକୁ ଲକ୍ଷ୍ୟ ରଖିଥିବାବେଳେ ଏନେଇ ପ୍ରତି ଦୁଇ ମାସରେ ଥରେ ଆମିଷ ବ୍ୟବସାୟୀ ସଂଘ ସହିତ ଆଲୋଚନା କରଯିବାକୁ ଧାର୍ଯ୍ୟ ହୋଇଥିଲା। ମାତ୍ର ଇତି ମଧ୍ୟରେ ୩ମାସ ବିତି ଯାଇଥିଲେ ବି ଦ୍ୱିତୀୟ ବୈଠକ ହୋଇ ପାରୁନାହିଁ। ଭୁବନେଶ୍ୱର ଆମିଷ ବ୍ୟବସାୟୀ ମହାସଂଘ (ମାଂସ ବିଭାଗ) ପକ୍ଷରୁ ବାରମ୍ବାର ଏନେଇ ବିଏମ୍ସିକୁ ଅବଗତ କରାଯିବା ସତ୍ତ୍ୱେ ସେମାନେ ଆଲୋଚନା ପାଇଁ ଡାକୁନାହାନ୍ତି। ଏପରିକି ମହାସଂଘ ପକ୍ଷରୁ ମାର୍ଚ୍ଚ ୧ରେ ମେୟର ସୁଲୋଚନା ଦାସ ଏବଂ କମିଶନର ବିଜୟ ଅମୃତା କୁଲାଙ୍ଗେଙ୍କୁ ଦାବିପତ୍ର ଦିଆଯାଇଥିଲା। ୧୦ ଦିନ ପରେ ବି ସେମାନଙ୍କ ଠାରୁ କୌଣସି ଉତ୍ତର ମିଳିପାରି ନ ଥିବାରୁ ମହାସଂଘ ପକ୍ଷରୁ କ୍ଷୋଭ ପ୍ରକାଶ କରାଯାଇଛି। ସେହିପରି ବିଏମ୍ସି କେବଳ ମିଥ୍ୟା ପ୍ରତିଶ୍ରୁତି ଦେଇ ବ୍ୟବସାୟୀଙ୍କୁ ଭଣ୍ଡାଇ ଚାଲିଛି ବୋଲି ଅଲ୍ ଓଡ଼ିଶା ଆମିଷ ବ୍ୟବସାୟୀ ମହାସଂଘ ରାଜ୍ୟ ସଭାପତି ସେଖ୍ ମୁନ୍ତାକିମ୍ ବକ୍ସ ଅଭିଯୋଗ କରିଛନ୍ତି। ଘାଟିକିଆଠାରେ ନିର୍ମିତ ହୋଇଥିବା ଅତ୍ୟାଧୁନିକ ମାଂସ ମାର୍କେଟ ନିର୍ମାଣରେ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଥିଲା। ୬୭ଟି ଓ୍ବାର୍ଡରେ ସେଭଳି (ମାଛ, ଚିକେନ୍, ମଟନ୍) ଅତ୍ୟାଧୁନିକ ଆମିଷ ମାର୍କେଟ ନିର୍ମାଣ କରିବା ପାଇଁ ପ୍ରାୟ ୧ଶହ କୋଟିର ବଜେଟ୍ ଆବଶ୍ୟକ। ମାତ୍ର ବିଏମ୍ସିର ଚଳିତ ବଜେଟ୍ରେ ଆମିଷ ହାଟ ନିର୍ମାଣ ପାଇଁ କୌଣସି ଅଟକଳ ରଖାଯାଇ ନାହିଁ। ଅପରପକ୍ଷେ ଥଇଥାନ ନ କରି ବିଏମ୍ସି ଆମିଷ ବ୍ୟବସାୟୀଙ୍କୁ ବାରମ୍ବାର ଉଚ୍ଛେଦ କରୁଥିବାରୁ ସେମାନେ ନିଜର ଗୁଜୁରାଣ ମେଣ୍ଟାଇବାରେ ସଫଳ ହେଉନାହାନ୍ତି। କେଉଁଠି ପରିମଳ ନାମରେ ତ ଆଉ କେଉଁଠି ସୁରକ୍ଷା ଦୃଷ୍ଟିରୁ ସେମାନଙ୍କ ଦୋକାନ ବନ୍ଦ କରାଯାଉଛି। ରାସ୍ତା କଡ଼ରେ ବସି ମାଛ ବିକୁଥିବା ବ୍ୟବସାୟୀଙ୍କୁ ଉଠାଇ ଦିଆଯାଉଛି। ତେଣୁ ବିଏମ୍ସି ପ୍ରତିଶ୍ରୁତି ଦେଇ ଭୁଲି ଯାଇଥିବାରୁ ଏପରି ବିଭିନ୍ନ କ୍ଷେତ୍ରରେ ବିଏମ୍ସି ଉପରୁ ସହରବାସୀଙ୍କ ବିଶ୍ୱାସ ତୁଟି ଯାଉଥିବା ସେମାନେ କହିଛନ୍ତି।
ସୂଚନାଯୋଗ୍ୟ, ଭୁବନେଶ୍ୱରରେ ରହୁଥିବା ଲୋକଙ୍କ ମଧ୍ୟରେ ପ୍ରାୟ ୯୦ ପ୍ରତିଶତ ଲୋକ ଆମିଷ ପ୍ରିୟ। ଏମାନଙ୍କ ଚାହିଦା ମେଣ୍ଟାଇବା ପାଇଁ ସହରରେ ୩ହଜାର ୩୫୦ରୁ ଊର୍ଦ୍ଧ୍ୱ ଆମିଷ ବ୍ୟବସାୟୀ ରହିଛନ୍ତି। ସେମାନଙ୍କ ମଧ୍ୟରେ ୩୫୦ରୁ ଊର୍ଦ୍ଧ୍ୱ ମଟନ୍ ବ୍ୟବସାୟୀ ହୋଇଥିବାବେଳେ ୧ହଜାର ଚିକେନ୍ ବ୍ୟବସାୟୀ ଏବଂ ୨ହଜାରରୁ ଊର୍ଦ୍ଧ୍ୱ ମାଛ ବ୍ୟବସାୟୀ ରହିଛନ୍ତି। ସେହିପରି ସହରରେ ବଡ଼ ଆମିଷ ବଜାର ଭାବେ ୪ନଂ. ମାର୍କେଟ, ୩ ନଂ, ୧ ନଂ ମାର୍କେଟ, ବଡ଼ଗଡ଼ ହାଟ, ୮ନଂ ମାର୍କେଟ, ସୁନ୍ଦରପଦା, ଡମଣା ଆଦି କେତେକ ମାର୍କେଟ ରହିଛି। ଯେଉଁଠାରେ ମାଛ, ଚିକେନ୍, ମଟନ୍ ଉପଲବ୍ଧ ହେଉଛି। ତେବେ କେବଳ ୮ନଂ ମାର୍କେଟକୁ ଛାଡିଦେଲେ ଅନ୍ୟ ସବୁଠାରେ ଯିଏ ଯେପରି ଭାବେ ପାରୁଛନ୍ତି ବ୍ୟବସାୟ କରୁଛନ୍ତି। ସ୍ବଚ୍ଛତା କିମ୍ବା ବ୍ୟବସ୍ଥିତ ଢଙ୍ଗରେ ବ୍ୟବସାୟ କରାଯାଉ ନାହିଁ। ତେଣୁ ବ୍ୟବସ୍ଥିତ ଢଙ୍ଗରେ ବ୍ୟବସାୟ କରିବା ସହ ଆମିଷ ହାଟ ନିର୍ମାଣ କରିବା ପାଇଁ ୨୦୨୨ ଡିସେମ୍ବର ୫ରେ ଆୟୋଜିତ ବୈଠକରେ ନିଷ୍ପତ୍ତି ହୋଇଥିଲା। ଏଥିସହ ମୁଖ୍ୟ ରାସ୍ତାରେ ଆମିଷ ବେପାର ବନ୍ଦ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଥିଲା। ବ୍ୟବସାୟୀମାନେ ନିର୍ଦ୍ଦେଶ ମାନୁ ଥିବାବେଳେ ବିଏମ୍ସି ନିଜ ପ୍ରତିଶ୍ରୁତିରୁ ଓହରି ଯାଇଥିବା ମହାସଂଘ ଅଭିଯୋଗ କରିଛି।
