ଭୁବନେଶ୍ୱର, ୨୩।୧୦ (ବ୍ୟୁରୋ): ସନ୍ଥ ଭୀମ ଭୋଇ ଦୃଷ୍ଟିହୀନ ବିଦ୍ୟାଳୟରେ ବିଏମ୍ସି ପକ୍ଷରୁ ଶନିବାର ପାଳନ ହୋଇଛି ଦୀପାବଳି ପର୍ବ। ମେୟର ସୁଲୋଚନା ଦାସ, ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଡେପୁଟି ମେୟର ମଞ୍ଜୁଲତା କଅଁର, କମିଶନର ବିଜୟ ଅମୃତା କୁଲାଙ୍ଗେ, ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସ୍ମିତା ବିଶ୍ୱାଳ, ବିଏମ୍ସିର କର୍ପୋରେଟରଙ୍କ ଉପସ୍ଥିତିରେ ଏହି ଉସତ୍ବ ପାଳନ ହୋଇଥିଲା। ୨ବର୍ଷ ପରେ ବିନା କଟକଣାରେ ପର୍ବ ପାଳନ ହେବାକୁ ଯାଉଥିବାରୁ ସମସ୍ତଙ୍କ ମନରେ ଆନନ୍ଦ ଉଲ୍ଲାସ ଭରି ରହିଛି। ଅପରପକ୍ଷେ ବିଦ୍ୟାଳୟରେ ଥିବା ଏହି ସ୍ବତନ୍ତ୍ର ବର୍ଗର ଶିକ୍ଷାର୍ଥୀମାନେ କିପରି ସମାନ ଆନନ୍ଦ ଉପଭୋଗ କରିବେ ସେଥିପାଇଁ ବିଏମ୍ସି ପକ୍ଷରୁ ପ୍ରୟାସ କରାଯାଇଥିଲା।
ସହର ତଥା ରାଜ୍ୟରେ ସମସ୍ତେ ଏହି ମନୋବୃତ୍ତି ଆପଣେଇ ସହଭାଗିତା ଏବଂ ଅନ୍ତର୍ଭୁକ୍ତିକରଣକୁ ଗୁରୁତ୍ୱ ଦିଅନ୍ତୁ ବୋଲି ମେୟର କହିଥିଲେ। ଏଥିସହ ଅନୁଷ୍ଠାନର ଶିକ୍ଷାର୍ଥୀଙ୍କୁ ସହରର ସ୍ବଚ୍ଛତା ସମ୍ପର୍କିତ ଶିକ୍ଷା ସୂଚନା ଦେଇ ସେମାନଙ୍କୁ ସ୍ବଚ୍ଛ ଭୁବନେଶ୍ୱରର ଅନ୍ୟତମ ସାରଥି ଭାବେ ପରିଗଣିତ କରାଯିବ, ଯାହା ସାରା ରାଜ୍ୟରେ ଉଦାହରଣ ସୃଷ୍ଟି କରିବ ବୋଲି ମେୟର ସୂଚନା ଦେଇଥିଲେ। ସେହିପରି ସମାଜର ବିଭିନ୍ନ ବର୍ଗଙ୍କୁ ସାମିଲ୍ କରାଯାଇ ବିକାଶ କାର୍ଯ୍ୟକୁ ତ୍ୱରାନ୍ବିତ କରାଯାଉଥିବା କମିଶନର ବିଜୟ ଅମୃତା କୁଲାଙ୍ଗେ କହିଥିଲେ। ଏଥିସହ ସ୍ବତନ୍ତ୍ର ବର୍ଗଙ୍କ ପାଇଁ ପାର୍କରେ ଖେଳିବା ଏବଂ ଜାଣିବାର ସୁବିଧା ମଧ୍ୟ କରାଯାଇଛି। ଟିମ୍ ବିଏମ୍ସିର ଏହି ପଦକ୍ଷେପ ସହରର ଅନ୍ୟମାନଙ୍କୁ ପ୍ରଭାବିତ କରିବ ଏବଂ ଅନ୍ତର୍ଭୁକ୍ତିକରଣ ବିକାଶର ସ୍ବାଦ ସମସ୍ତଙ୍କୁ ଜଣାପଡିବ ବୋଲି କମିଶନର କହିଥିଲେ। ଆୟୋଜନରେ ଯୋଗଦେଇଥିବା ସମସ୍ତ ଛାତ୍ରୀଛାତ୍ରଙ୍କୁ ବିଧାୟକ ଜେନା ଉଦ୍ବୋଧନ ଦେଇଥିଲେ।
ଶବ୍ଦରହିତ ବାଣ ଫୁଟାଇବା, ଗୀତ ଗାଇବା, ଅନ୍ତେବାସୀ ଶିକ୍ଷାର୍ଥୀଙ୍କ ସହିତ କଥାବାର୍ତ୍ତା ହେବାରେ କର୍ପୋରେଟରମାନେ ମଜ୍ଜି ରହିଥିଲେ। ଶେଷରେ ସାନିଟେଶନ ଷ୍ଟାଣ୍ଡିଂ କମିଟି ଚେୟାରମ୍ୟାନ୍ ବିରଞ୍ଚତ୍ ନାରାୟଣ ମହାସୂପକାର ଅନ୍ୟ କର୍ପୋରେଟରଙ୍କ ସହ ମିଶି ବିଦ୍ୟାଳୟ ହତାରେ ପଡ଼ିଥିବା ପୋଡ଼ା ବାଣର ବର୍ଜ୍ୟ ନିଷ୍କାସନ କରି ସେହି ସ୍ଥାନ ପରିଷ୍କାର କରିଥିଲେ।
