ଢେଙ୍କିକୋଟ,୨୨ା୫(ଡି.ଏନ୍.ଏ.): କେନ୍ଦୁଝର ଜିଲା ଢେଙ୍କିକୋଟ ପଞ୍ଚାୟତରେ ରବିବାର ଅପରାହ୍ନରେ କାଳବୈଶାଖୀ ପ୍ରଭାବରେ ବର୍ଷା, ଝଡ଼ ତୋଫାନ ହୋଇଥିଲା। ଅନେକ ଗଛ ଭାଙ୍ଗିବା ସହ ଘରର ଛପର ଉଡ଼ିଯାଇଥିଲା। ଢେଙ୍କିକୋଟ୍ ପଞ୍ଚାୟତ, ଲଙ୍ଗଳକଣ୍ଟି ଗ୍ରାମ, ଢେଙ୍କିକୋଟ ଗ୍ରାମ, ବଡ଼ମସିଣାବିଲା ପଞ୍ଚାୟତ ପେଚା ସାହିରେ ୫ରୁ ଊର୍ଦ୍ଧ୍ୱ ବିଦ୍ୟୁତ୍ ଖୁଣ୍ଟ ଉପୁଡ଼ି ପଡ଼ିଥିଲା। ଲଙ୍ଗଳକଣ୍ଟି ଗ୍ରାମର ଗୁରୁଚରଣ ମହାରଣା(୭୫)ଙ୍କ ଦୁଇ ବଖରା ଘରର ସମ୍ପୂର୍ଣ୍ଣ ଆଜବେଷ୍ଟସ ଛପର ଉଡ଼ାଇ ଦେଇଥିବାରୁ ସେ ବେସାହାରା ହୋଇପଡ଼ିଛନ୍ତି। ପଡ଼ୋଶୀଙ୍କ ବାରଣ୍ଡାରେ ଆଶ୍ରୟ ନେଇଛନ୍ତି। ଏ ସମ୍ପର୍କରେ ସରପଞ୍ଚ ଖଇର ନାଏକ କହିଛନ୍ତି, ସେ ବିଡିଓ ଓ ତହସିଲଦାରଙ୍କୁ ଏ ସମ୍ପର୍କରେ ଜଣାଇବେ। ଜରୁରୀକାଳିନ ଭିତ୍ତିରେ ତାଙ୍କୁ ଥଇଥାନ ବ୍ୟବସ୍ଥା କରିବା ସହ ବିଜୁ ପକ୍କା ଘର ଯୋଜନାରେ ସାମିଲ କରିବା ପାଇଁ କହିବି ବୋଲି ପ୍ରକାଶ କରିଛନ୍ତି। ଆରଆଇ ସନ୍ତୋଷ ସାହୁ କହିଛନ୍ତି, ଦରଖାସ୍ତ ଦେଲେ ଆମ୍ଭେ ପଲିଥିନ ଯୋଗାଇଦେବେ।
