ରାଉରକେଲା ଅଫିସ,୧୪।୩: ରାଉରକେଲା ସେକ୍ଟର-୧୬ରେ ରହୁଥିବା ଗରିବ ମହିଳା ସୁବର୍ଣ୍ଣମାଳା ପଟ୍ଟନାୟକ ରକ୍ତ କର୍କଟରେ ପୀଡ଼ିତ ଅଛନ୍ତି। ଏହି ରୋଗର ଉଚ୍ଚତର ଚିକିତ୍ସା ପାଇଁ ଅଧିକ ଅର୍ଥ ଆବଶ୍ୟକ। ପରିବାରର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବାରୁ ଏତେ ଟଙ୍କା ଯୋଗାଡ କରିବା ସମ୍ଭବ ହେଉନାହିଁ। ଫଳରେ ସୁବର୍ଣ୍ଣମାଳାଙ୍କ ଆବଶ୍ରକ ଚିକିତ୍ସା ହୋଇପାରୁନାହିଁ। ଏହାକୁ ନେଇ ପରିବାର ଲୋକେ ଚିନ୍ତାରେ ପଡିଛନ୍ତି।
ସୂଚନା ଅନୁସାରେ, ରାଉରକେଲା ସେକ୍ଟର-୧୬ରେ କିଶୋର ପଟ୍ଟନାୟକ ରୁହନ୍ତି। ପରିବାର କହିଲେ ତାଙ୍କ ସ୍ତ୍ରୀ ସୁବର୍ଣ୍ଣମାଳା ଏବଂ ଝିଅ ଭାଗ୍ୟଲକ୍ଷ୍ମୀ। କିଶୋର ଏକ ବେସରକାରୀ ଅନୁଷ୍ଠାନରେ ସୁରକ୍ଷା କର୍ମୀ ଭାବେ କାମ କରି ସୀମିତ ଦରମାରେ ପରିବାର ଚଳାଉଛନ୍ତି। ଗତ କିଛି ମାସ ତଳେ ସୁବର୍ଣ୍ଣମାଳାଙ୍କ ସ୍ତନରେ ଏକ ଟ୍ୟୁମର ସୃଷ୍ଟି ହେଲା। ଏସ୍ଟିଆଇ ମେଡିକାଲରେ ସ୍ବାସ୍ଥ୍ୟ ପରୀକ୍ଷା କରାଇବାରୁ ୫୦ହଜାର ଟଙ୍କା ଖର୍ଚ୍ଚରେ ଅସ୍ତ୍ରୋପଚାର କରାଗଲେ ଟ୍ୟୁମର ଭଲ ହେବ ବୋଲି ଡାକ୍ତର କହିଲେ। ମାତ୍ର ୭ହଜାର ଟଙ୍କା ବେତନ ପାଉଥିବା କିଶୋରଙ୍କ ପାଇଁ ୫୦ହଜାର ଟଙ୍କା ଯୋଗାଡ କରିବା କଷ୍ଟକର ହେଲା। ଫଳରେ ସେ ସୁବର୍ଣ୍ଣମାଳାଙ୍କ ଅସ୍ତ୍ରୋପଚାର କରାଇପାରିଲେନାହିଁ। ପାଖରେ ଯାହା କିଛି ସମ୍ବଳ ଥିଲା ସେଥିରେ କିଶୋର ମେଡିସିନ କିଣି ସ୍ତ୍ରୀଙ୍କୁ ଖାଇବାକୁ ଦେଲେ। ତେବେ ଔଷଧ କାମ ନ ଦେବାରୁ ଆର୍ଜିଏଚ୍ରେ ପରୀକ୍ଷା କରାଇବା ପରେ ସୁବର୍ଣ୍ଣମାଳା ରକ୍ତକର୍କଟ ରୋଗରେ ଆକ୍ରାନ୍ତ ଥିବା ଜଣାପଡିଥିଲା। ଡାକ୍ତରଙ୍କ ପରାମର୍ଶ କ୍ରମେ କଟକ ସ୍ଥିତ ଆଚାର୍ଯ୍ୟ ହରିହର ରିଜିଓନାଲ କ୍ୟାନସର ରିସର୍ଚ୍ଚ ସେଣ୍ଟରରେ ଅସ୍ତ୍ରୋପଚାର ପାଇଁ ୬ଲକ୍ଷ ଟଙ୍କା ଆବଶ୍ୟକ ଥିବାରୁ ଏତେଟଙ୍କା କେଉଁଠୁ ଯୋଗାଡ କରିବେ ସେହି ଚିନ୍ତାରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି କିଶୋର। ରାଉରକେଲା ବିଧାୟକ ସାରଦା ପ୍ରସାଦ ନାୟକ ସୁବର୍ଣ୍ଣମାଳାଙ୍କୁ କଟକ ହସ୍ପିଟାଲ ଯାଏ ପହଞ୍ଚାଇବା ଦାୟିତ୍ୱ ନେବେ ବୋଲି ପ୍ରତିଶ୍ରୁତି ଦେଇଛନ୍ତି। ତେବେ କୌଣସି ସରକାର କିମ୍ବା କୌଣସି ସହୃଦୟ ବ୍ୟକ୍ତି ସହଯୋଗ କଲେ ସୁବର୍ଣ୍ଣମାଳାଙ୍କ ଚିକିତ୍ସା ହୋଇପାରନ୍ତା ବୋଲି କିଶୋର କହିଛନ୍ତି। ସେ ଆହୁରି କହିଛନ୍ତି, ରାସନ କାର୍ଡ ପାଇଁ ଗତ ୨ବର୍ଷ ହେଲା ଯୋଗାଣ ବିଭାଗରେ ଆବେଦନ କରୁଛି। ମାତ୍ର ତାଙ୍କୁ ଏଯାଏ କାର୍ଡ ମିଳିନାହିଁ। ତେଣୁ ତାଙ୍କର ବିଜୁ ସ୍ବାସ୍ଥ୍ୟ ବୀମା କାର୍ଡ ହୋଇପାରୁନାହିଁ। ସ୍ବାସ୍ଥ୍ୟ କାର୍ଡ ଥିଲେ ସେ ତାଙ୍କ ସ୍ତ୍ରୀଙ୍କ ଚିକିତ୍ସା କରାଇପାରିଥାନ୍ତେ। ଏ ସମ୍ପର୍କରେ ରାଉରକେଲା ଏଡିଏମ୍ ଶୁଭଙ୍କର ମହାପାତ୍ରଙ୍କୁ ପଚାରିବାରୁ ସେ କହିଲେ, କିଶୋରଙ୍କୁ ୫ହଜାର ଟଙ୍କା ପୂର୍ବରୁ ପ୍ରଦାନ କରିଛୁ । ମୁଖ୍ୟମନ୍ତ୍ରୀ ରିଲିଫ ଫଣ୍ଡ୍ରୁ ୨୪ହଜାର ଟଙ୍କା ଦେଇଛୁ। ତେବେ ଆବଶ୍ୟକତା ଅନୁଯାୟୀ ପଦକ୍ଷେପ ନିଆଯିବ ବୋଲି ସେ କହିଥିଲେ।
