ବଲାଙ୍ଗୀର/କଣ୍ଟାବାଞ୍ଜି,୮ା୨(ସୁନିଲ କୁମାର ମହାନ୍ତି/ଗୁରୁ ଦୟାଲ ହଂସ): ବଲାଙ୍ଗୀର ଜିଲା କଣ୍ଟାବାଞ୍ଜି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗତ ୨୦୦୯ରେ ବିଜୁ ପଟ୍ଟନାୟକ ରକ୍ତଭଣ୍ଡାର ସ୍ଥାପିତ ହୋଇଥିଲା। ଏହି ରକ୍ତଭଣ୍ଡାରକୁ ତତ୍କାଳୀନ ପୂର୍ବତନ ବିଧାୟକ ଆୟୁବ ଖାଁଙ୍କ ପ୍ରଚେଷ୍ଟାରେ ହୋଇଥିଲା। ଏହି ରକ୍ତଭଣ୍ଡାର ୪୦ କିଲୋମିଟର ବ୍ୟାସାର୍ଦ୍ଧ ମଧ୍ୟରେ ଥିବା ଲୋକେ ଉପକୃତ ହେଉଥିଲେ। ହେଲେ ଗତ ୩ ମାସରୁ ଊର୍ଦ୍ଧ୍ୱ ହେବ ରକ୍ତଭଣ୍ଡାର ଅଚଳ ହୋଇ ପଡ଼ିଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଡାକ୍ତରଖାନାର ରକ୍ତଭଣ୍ଡାର ୟୁନିଟ୍ ଏକ ଗୁରୁତ୍ୱ ପୂର୍ଣ୍ଣ ହୋଇଥିଲେ ମଧ୍ୟ କାର୍ଯ୍ୟରତ ମେଡିକାଲ ଅଫିସର କିମ୍ବା ରୋଗୀ କଲ୍ୟାଣ ସମିତିର ଅଧ୍ୟକ୍ଷ ରକ୍ତ ଭଣ୍ଡାର ପ୍ରତି ନଜର ଦେଉନାହାନ୍ତି। ଯଦ୍ୱାରା ରକ୍ତଭଣ୍ଡାର ମାସ ମାସ ଧରି ବନ୍ଦ ପଡ଼ିରହିଛି। ଏକ ବିଶ୍ୱସ୍ତ ସୂତ୍ରରୁ ମିଳୁଥିବା ସୂଚନା ଅନୁସାରେ ରକ୍ତଭଣ୍ଡାରର ଲାଇସେନ୍ସ ନବୀକରଣ କରା ଯାଇ ନ ଥିବାରୁ ରକ୍ତଭଣ୍ଡାର ବନ୍ଦ ହୋଇ ପଡ଼ିଥିବା କୁହାଯାଉଛି। ଏହି ନବୀକରଣ ନ ହେବାରେ ପଛରେ କାହାର ସ୍ବାର୍ଥ ରହିଛି ବୋଲି ବୁଦ୍ଧିଜୀବୀ ମହଲରେ ଏବେ ଆଲୋଚନା ହେଉଛି। ରକ୍ତଭଣ୍ଡାର ବନ୍ଦରୁ ରୋଗୀ ହସ୍ତତନ୍ତ ହେଉଥିବା ଯୋଗୁ ତୁରନ୍ତ ରକ୍ତଭଣ୍ଡାର ଖୋଲିବାକୁ ଦାବି କରାଯାଇଛି।
