ଭୁବନେଶ୍ବର,୩୦ା୯(ବ୍ୟୁରୋ): ଭାଜପା କାର୍ଯ୍ୟକ୍ରମକୁ ବିଜେଡି ଡରୁଛି କି। ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ସଭା ଯେଉଁଦିନ ସେଦିନ କାହିଁକି ବିଜେଡି ସମ୍ମିଳନୀ କଲା। ଭାଜପାକୁ ସେମାନଙ୍କ ଏତେ ଭୟ କାହିଁକି ବୋଲି ପ୍ରଶ୍ନକରି ବର୍ଷିଛନ୍ତି ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ। ଜନତା ମଇଦାନଠାରେ ଗୁରୁବାର ଅନୁଷ୍ଠିତ ଶକ୍ତିକେନ୍ଦ୍ର କାର୍ଯ୍ୟକର୍ତ୍ତା ସମ୍ମିଳନୀରେ ଉଦ୍ବୋଧନ ଦେବା ଅବସରରେ ଅପରାଜିତା କହିଛନ୍ତି, ୨୨ ବର୍ଷ ଧରି ରାଜ୍ୟରେ ଶାସନ କରୁଥିବା ଦଳର ଡର ଅଛି କି। ଭାଜପା ସଭାପତି ଆସିବା ଶୁଣି ତରବରରେ ବରମୁଣ୍ଡା ପଡ଼ିଆରେ ସଭା କଲେ। ଆଉ କେବେ ସେମାନଙ୍କୁ ସମୟ ହେଲା ନାହିଁ। ଏହି କାର୍ଯ୍ୟକ୍ରମକୁ ରାଜ୍ୟର ୧୦୦୮ ମଣ୍ଡଳରୁ କର୍ମୀ ଆସିଛନ୍ତି। ସେମାନଙ୍କୁ ରୋକିବାକୁ ପ୍ରଶାସନ ଲାଗିଛି। ହେଲେ ଏଥିରେ ସଫଳ ହୋଇପାରୁନାହାନ୍ତି ବୋଲି ସେ କହିଛନ୍ତି। ଏହି ଅବସରରେ ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି, ଏଠିକା ମୁଖ୍ୟମନ୍ତ୍ରୀ ସାଧକ ନୁହନ୍ତି ବାଧକ। ଶକ୍ତିକେନ୍ଦ୍ରଗୁଡିକ ଦଳୀୟ ସଙ୍ଗଠନକୁ ସୁଦୃଢ଼ କରିବା ଦିଗରେ କାର୍ଯ୍ୟ କରିବାକୁ ସେ ପରାମର୍ଶ ଦେଇଛନ୍ତି। ନବୀନ ପଟ୍ଟନାୟକଙ୍କ ସରକାରକୁ ବଙ୍ଗୋପସାଗରେ ଫିଙ୍ଗିବା ପାଇଁ ସେ ଆହ୍ବାନ କରିଛନ୍ତି।
ଭାଜପାର ଏଭଳି ମନ୍ତବ୍ୟ ଉପରେ ପ୍ରତିକ୍ରିୟା ରଖି ବିଜେଡି ନେତ୍ରୀ ପ୍ରମିଳା ମଲ୍ଲିକ କହିଛନ୍ତି, ବିଜେଡିର ଏହି କାର୍ଯ୍ୟକ୍ରମ ନୂଆ ନୁହେଁ। ପ୍ରତିବର୍ଷ ବିଜେଡି ଜନସମ୍ପର୍କ ପଦଯାତ୍ରା କରୁଛି। ଆମେ ସବୁ ବର୍ଷ ଲୋକଙ୍କ ପାଖକୁ ଯାଉ, ସେମାନଙ୍କ ସୁବିଧା ଅସୁବିଧା ବୁଝିଥାଉ। ଦିଲ୍ଲୀ, ଗୁଜରାଟ କି ଗୋଆରୁ ନେତା ଆମେ ଧାର ଉଧାର ଆଣୁନାହୁଁ। ଆମେ ଓଡ଼ିଆ ଜାତିର ଏବଂ ମାଟିର ନେତା ନବୀନ ପଟ୍ଟନାୟକଙ୍କ ସାଙ୍ଗରେ ଅଛୁ। ଦିଲ୍ଲୀ, ଗୋଆ ଓ ଗୁଜରାଟରୁ ମନ୍ତ୍ର ଆଣିଲେ ତାହା ଓଡ଼ିଶାରେ କାମ ଦେବ ନାହିଁ। ଓଡ଼ିଶାରେ ନବୀନ ପଟ୍ଟନାୟକଙ୍କ ମନ୍ତ୍ର କାମ ଦେବ ବୋଲି ସେ କହିଛନ୍ତି। ବିଜେଡି ରାଜ୍ୟ ସଭା ସଦସ୍ୟ ସସ୍ମିତ ପାତ୍ର କହିଛନ୍ତି, ୬ ଲକ୍ଷ ଘର ଲୋକଙ୍କୁ ମିଳିବ ଯାହା ଆବାସ ପୋର୍ଟାଲ ଖୋଲିଲେ ସମ୍ଭବ ସେହି ପ୍ରସଙ୍ଗ ସମସ୍ତଙ୍କୁ ଆନ୍ଦୋଳିତ କରୁଛି। କେନ୍ଦ୍ରକୁ ବିଭିନ୍ନ ଯୋଜନାରେ ଯେଉଁ ପାଣ୍ଠି ଆସିବା କଥା ତାହା ସମସ୍ତଙ୍କୁ ଆନ୍ଦୋଳିତ କରୁଛି। ଏପରି ଅନେକ ପ୍ରସଙ୍ଗ ଅଛି ଯେଉଁଥିରେ ଓଡ଼ିଶାକୁ ହକ୍ ମିଳିବାର ଅଛି ସେକଥା ସେମାନେ କୁହନ୍ତୁ ବୋଲି ସସ୍ମିତ କହିଛନ୍ତି।
