ଭଣ୍ଡାରିପୋଖରୀ, ୩୦।୮(ଡି.ଏନ.ଏ): ରାଜ୍ୟ ଭାଜପା ପ୍ରତିନିଧି ଦଳର ରାଜ୍ୟ ସଂଗଠନ ସମ୍ପାଦକ ମାନସ ମହାନ୍ତିଙ୍କ ନେତୃତ୍ୱରେ ଏକ ଟିମ୍ ଭଣ୍ଡାରିପୋଖରୀ ବ୍ଲକ ବୈତରଣୀ ନଦୀର ବନ୍ୟା ବିପନ୍ନ ଅଞ୍ଚଳ ପରିଦର୍ଶନ କରିଛନ୍ତି। ପୂର୍ବତନ ଜିଲା ସଭାପତି ବଦ୍ରୀ ନାରାୟଣ ଧଳଙ୍କ ସହ ପ୍ରତିନିଧି ଦଳରେ ରାଜ୍ୟ ପୂର୍ବତନ ସଂଗଠନ ସମ୍ପାଦକ ସାରଦା ଶତପଥୀ, କୃଷକମୋର୍ଚ୍ଚା ରାଷ୍ଟ୍ରୀୟ ଉପସଭାପତି ମହେଶ୍ୱର ସାହୁ, ପୃଥ୍ବୀରାଜ କୁଅଁର, ଆଲୋକ ସେଠୀ, ଭଦ୍ରକ ଜିଲା ସଭାପତି ହେମନ୍ତ ପାଢ଼ୀ ପ୍ରମୁଖ ବନ୍ୟାଞ୍ଚଳ ଗସ୍ତକରି କ୍ଷୟକ୍ଷତି ଦେଖିବା ସହ ବନ୍ୟାରେ କ୍ଷତି ହୋଇଥିବା ଚାଷଜମି ଅନୁଧ୍ୟାନ କରିଥିଲେ। ରହଣିଆ ଓ କୁରିଗାଁ ପଞ୍ଚାୟତର ବିଭିନ୍ନ ଗ୍ରାମ ବୁଲି ବିପନ୍ନ ମାନଙ୍କୁ ଶୁଖିଲା ଖାଦ୍ୟ ବିତରଣ କରିଥିଲେ। ଏହି ବନ୍ୟାରେ କ୍ଷତିଗ୍ରସ୍ତଙ୍କୁ ଆର୍ଥିକ ସହାୟତା ପ୍ରଦାନ, ଯେଉଁମାନଙ୍କ ଘର ଭାଙ୍ଗିଛି ସେ ପରିବାରକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର, କ୍ଷତିଗ୍ରସ୍ତ ଚାଷୀଙ୍କୁ ବିକଳ୍ପ ଚାଷପାଇଁ ମାଗଣାରେ ସାର, ବିହନ ଯୋଗାଣ ପାଇଁ ଏହି ପ୍ରତିନିଧି ଦଳ ଦାବି ଜଣାଇଛନ୍ତି। ବ୍ଲକର କଣ୍ଟିଘାଇ ଦ୍ୱାରା ବନ୍ୟା ଜଳ ଆସି ବହୁ କ୍ଷୟକ୍ଷତି ହେଉଥିବା ଓ ବନ୍ୟାରେ ଭାସି ଯାଇ ଦୁଇ ଜଣଙ୍କ ମୃତ୍ୟୁ ଘଟିଥିବା ପରିବାରକୁ ସମବେଦନା ଜଣାଇବା ସହ ବନ୍ୟାର ସ୍ଥାୟୀ ପ୍ରତିକାର ପାଇଁ ଆବଶ୍ୟକ ପଦକ୍ଷେପ ନେବାକୁ ପ୍ରତିନିଧି ଦଳ ଦାବି ଜଣାଇଛନ୍ତି।
