ନୂଆଦିଲ୍ଲୀ,୭ ।୪: ରାଜଧାନୀ ଦିଲ୍ଲୀରେ ଗୁରୁବାର ଏକ ଖବରଦାତା ସମ୍ମିଳନୀକୁ ସମ୍ବୋଧନ କରିବା ଅବସରରେ ଦିଲ୍ଲୀର ଉପମୁଖ୍ୟମନ୍ତ୍ରୀ ମନିଷ ସିସୋଡିଆ ଭାରତୀୟ ଜନତା ପାର୍ଟି(ଭାଜପା)କୁ ଟାର୍ଗେଟ କରିଛନ୍ତି । ସେ କହିଛନ୍ତି ହିମାଚଳ ପ୍ରଦେଶରେ ଆମ ଆଦମୀ ପାର୍ଟି(ଏଏପି)କୁ ବହୁ ସମର୍ଥନ ମିଳୁଛି । ଯାହାର ଖୁବ୍ ଚର୍ଚ୍ଚା କରାଯାଉଛି । ସିସୋଡିଆ କହିଛନ୍ତି କେଜରିୱାଲ ମଡେଲ ଅଫ ଗଭର୍ନେସ ଲୋକଙ୍କୁ ଆଶା ଦେଉଛି । ଲୋକେ ଏହି ମଡେଲକୁ ନିଜ ରାଜ୍ୟରେ ଲାଗୁ କରିବାକୁ ଚାହୁଁଛନ୍ତି । ସିସୋଡିଆ କହିଛନ୍ତି ଲୋକଙ୍କର ଆମ ଆଦମୀ ପାର୍ଟି ପ୍ରତି ଉତ୍ସାହ ଦେଖି ଭାଜପା ଡରି ଯାଇଛି ।
ସିସୋଡିଆ ଆହୁରି ମଧ୍ୟ କହିଛନ୍ତି ଯେଉଁଠି ନିର୍ବାଚନ ହେଉଛି ସେଠାରେ ଲୋକେ କେଜରିୱାଲଙ୍କୁ ଖୋଜୁଛନ୍ତି । ଗୁଜରାଟରେ ବି ଏଏପିକୁ ଜବରଦସ୍ତ ରେସପନ୍ସ ମିଳୁଛି । ଲୋକେ ବହୁ ସଂଖ୍ୟାରେ ଏଏପିକୁ ସମର୍ଥନ କରୁଛନ୍ତି । ସେହିଭଳି ହିମାଚଳ ପ୍ରଦେଶରେ ଲୋକଙ୍କ ଏଏପି ପ୍ରତି ଜବରଦସ୍ତ ରେସପନ୍ସ ଦେଖି ଏବେ ଭାଜପା ସେଠାରେ ମୁଖ୍ୟମନ୍ତ୍ରୀ ବଦଳାଇବା କଥା ଚିନ୍ତା କରିଛି । ସେ ଦାବି କରିଛନ୍ତି ଯେ ହିମାଚଳ ପ୍ରଦେଶରେ ଏଏପି ହିଁ ସରକାର ଗଠନ କରିବ । ହିମାଚଳ ପ୍ରଦେଶରେ ଭାଜପା ମୁଖ୍ୟମନ୍ତ୍ରୀ କୌଣସି କାମ କରି ନାହାନ୍ତି । ଏହାକୁ ଲୁଚାଇବାକୁ ଏବେ ଭାଜପା ମୁଖ୍ୟମନ୍ତ୍ରୀ ବଦଳାଇବାକୁ ଯାଉଛି । ଜୟରାମ ଠାକୁର ଜଣେ ଅପାରଗ ମୁଖ୍ୟମନ୍ତ୍ରୀ । ତେଣୁ ଏବେ ଭାଜପା ତାଙ୍କ ସ୍ଥାନରେ ଅନୁରାଗ ଠାକୁରଙ୍କୁ ମୁଖ୍ୟମନ୍ତ୍ରୀ କରିବାକୁ ଯାଉଛି । ତେବେ ଜୟରାମ ଠାକୁର ସିସୋଡିଆଙ୍କ ଏହି କଥାକୁ ଖାରଜ କରି ଦେଇଛନ୍ତି ।
