ଅହମ୍ମଦାବାଦ୍,୧୧।୧୧: ଗୁଜରାଟ ବିଧାନସଭା ନିର୍ବାଚନର ତାରିଖ ଘୋଷଣା ହେବା ପରଠାରୁ ସମସ୍ତ ରାଜନୈତିକ ଦଳ ଜିତିବା ପାଇଁ କସରତ ଆରମ୍ଭ କରିଦେଇଛି। ଏଥି ସହିତ କିଛି ନେତା ଅଛନ୍ତି, ଯେଉଁମାନେ ଟିକେଟ ନ ମିଳିବାରୁ ରାଗିଯାଇ ଅନ୍ୟ ଦଳରେ ଯୋଗ ଦେଉଛନ୍ତି। ଆଜିକାଲି ଗୁଜରାଟରେ ଏଭଳି ପରିସ୍ଥିତି ଆସିଛି। ବର୍ତ୍ତମାନ ଏହି ତାଲିକାରେ ଭାଜପା ବିଧାୟକ କେସରୀ ସିଂ ସୋଲାଙ୍କିଙ୍କ ନାମ ମଧ୍ୟ ଯୋଡି ହୋଇଛି। ବଭାରତୀୟ ଜନତା ପାର୍ଟି ଆସନ୍ତା ବିଧାନସଭା ନିର୍ବାଚନରେ ମାତର ଆସନରୁ ବିଧାୟକ କେସରୀ ସିଂଙ୍କୁ ଟିକେଟ ଦେଇନାହିଁ। ସେଥିପାଇଁ କେସରୀ ସିଂ ଆମ ଆଦମୀ ପାର୍ଟିରେ ଯୋଗ ଦେଇ ବିଦ୍ରୋହୀ ମନୋଭାବ ପ୍ରଦର୍ଶନ କରିଛନ୍ତି। କେସର ସିଂ ଦାବି କରିଛନ୍ତି ଯେ ସେ ମାତାର ଆସନରୁ ପ୍ରତିଦ୍ୱନ୍ଦ୍ୱିତା କରିବେ। କିନ୍ତୁ ଆମ ଆଦମୀ ପାର୍ଟି ମହିପତ ସିଂଙ୍କୁ ମାତର ଆସନରୁ ପ୍ରାର୍ଥୀ ଘୋଷଣା କରିଛି।
କେସରୀ ସିଂ ସୋଲାଙ୍କି ଗୁଜରାଟର ମାତରରୁ ଭାଜପା ବିଧାୟକ ଅଛନ୍ତି। ଭାଜପା ଟିକେଟରେ ନିର୍ବାଚନ ଜିତିବା ପରେ ସେ ଦୁଇଥର ବିଧାନସଭାରେ ପହଞ୍ଚିଛନ୍ତି। କେସରୀ ସିଂ ତାଙ୍କ କାର୍ଯ୍ୟ ବିଷୟରେ ଅନେକ ସମୟରେ ବିବାଦରେ ରହିଥା’ନ୍ତି। ୨୦୨୧ରେ କେସରୀ ସିଂ ପାଭଗଡରେ ଏକ ମଦ ପାର୍ଟି ଏବଂ ଜୁଆ ଖେଳୁଥିବାବେଳେ ପୋଲିସ ତାଙ୍କୁ ଧରିଥିଲା। ଏହି ମାମଲାରେ କୋର୍ଟ ତାଙ୍କୁ ୨ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ଏହା ସହିତ ତାଙ୍କ ଉପରେ ଚାରି ହଜାର ଟଙ୍କା ଜୋରିମନା ମଧ୍ୟ ଲାଗୁ କରାଯାଇଥିଲା।
ଗୁଜରାଟ ବିଧାନସଭା ନିର୍ବାଚନ ପାଇଁ ନଭେମ୍ବର ୧୦ରେ ଭାଜପା ପ୍ରଥମ ତାଲିକା ପ୍ରକାଶ କରିଛି। ୧୮୨ ବିଧାନସଭା ଆସନ ମଧ୍ୟରୁ ୧୬୦ଟି ଆସନ ପାଇଁ ପ୍ରାର୍ଥୀ ଘୋଷଣା କରାଯାଇଛି। ଭାଜପା ଦ୍ୱାରା ପ୍ରକାଶିତ ପ୍ରାର୍ଥୀ ତାଲିକାରେ ୬୯ ଜଣ ବିଧାୟକଙ୍କୁ ପୁଣି ଟିକେଟ ମିଳିଥିବାବେଳେ ୩୩ ଜଣ ବିଧାୟକଙ୍କ ଟିକେଟ କଟାଯାଇଛି।
